Read Luka 1

LUK1kdc_014

¹Mkulu Teofili, Wanhu wengi wawamba ng'hani kwandika mbuli zija zilawilile kumwetu.²Wandika mbuli zija zitulongeligwe na wanhu waja wazonile kwa meso gao kusongela kuna ichanduso na wapetile uusenga.³Avo go mkulu, kwavija nizizahila vinogile mbuli zino kulawa kuna ichanduso, vinikona niye yokuwa vinoga kukwandikila goya mbuli zija zilawilile.⁴Notenda vino muladi ujuwe ukweli wose wa mbuli ziufundizigwe.

Kuvumbuka kwa Yohana Mbatizaji kopetigwa

⁵Kipindi acho Helode viyakalile mndewa wa Yudea, kukala na mulava nhosa, twaga jake Zakalia, wa kibumbila cha Abiya.Mwehe wake kakala Elizabeti, nayo vivija kalawa mulukolo lwa mulava nhosa Haluni.⁶Wose wabili wakala wotenda ganogile mgameso ga Mulungu, na kugagoga Malagizo gose ga Mndewa Mulungu.⁷Wakala waduhu wana kwavija Elizabeti kakala mgumba, na wose wabili wakala wavele.⁸Siku dimoja Zakalia kakala Mng'anda ya Mulungu yosang'hana isang'hano yake ya kulava nhosa, kamba viyatendaga mna izamu yake.⁹Zakalia kasaguligwa kwa kubwanha simbi, kamba viwatendaga walava nhosa, kwingila Mng'anda ya Mndewa yasome ubani.¹⁰Kipindi cha kusoma ubani vikivikile, wanhu wengi wakala kunze wompula Mulungu.¹¹Msenga wa kuulanga wa Mndewa kamulawilila Zakalia, kema mwambu wa mkono wa kudila wa upango wa kusomela ubani.¹²Zakalia viyamone, kasinhuka na kagwaya kwa bwembwe.¹³Lakini msenga wa kuulanga kamulongela, “Sekeudumbe, Zakalia! Mulungu kahulika kupula kwako. Mwehe wako Elizabeti kokulelela mwana wa kimbigalo, twaga jake komkema Yohana.¹⁴Kodeng'helela ng'hani na wanhu wengi wodeng'helela kwa kuvumbuka kwake.¹⁵Kokuwa munhu mkulu mgameso ga Mndewa. Honda yang'we ugimbi hebu divai. Kokuwa na Loho Yang'alile kusongela mna iinda ya mamake.¹⁶Kowatenda wanhu wengi wa Izilaeli wailumbe na Mndewa Mulungu wao.¹⁷Nayo komulongolela Mndewa, kokuwa na nguvu kamba mtula ndagu wa Mulungu Eliya. Kowatenda tata na wana wainogele, kowagalusa wanhu waja hawamtegeleza Mulungu wagese ganogile kamba wanhu wanogile, avo yamtandile Mndewa wanhu zake.”¹⁸Zakalia kamuuza msenga ija wa kuulanga, “Vino nojuwaze mbuli ino kamba ya ukweli? Niye na mwehe wangu twa wavele.”¹⁹Msenga ija kamwidika, “Niye na Gabilieli. Nokwima haulongozi ha Mulungu, heyo ayo yanhumile nonge na gweye kukupetela mbuli ino inogile.²⁰Lakini kwavija hutogole mbuli zangu zonda zilawilile mna ikipindi chake, sambi hudaha kulonga mbaka siku vonda ilawilile mbuli ino.”²¹Kipindi acho wanhu wakalile wombeta Zakalia, wakanganya habali kokawa kulawa Mng'anda ya Mulungu.²²Viyalawile kunze hadahile kulonga nao. Wajuwa hana kinhu cha unzonza kiyaonile Mng'anda ya Mulungu, kwavija kawagwaa kilaguso kwa kwinula makono gake, na kakala halonga.²³Viyamambukize sang'hano yake Mng'anda ya Mulungu, kabwela ukae.²⁴Hamwande kidogo imwehe Elizabeti kagoga inda. Hasegele ukayake kwa miezi mitano. Kalonga,²⁵“Hakimambukizo Mndewa kanisegezela kinyala mgameso ga wanhu!”

Kuvumbuka kwa Yesu kopetigwa

²⁶Elizabeti viyakalile na inda ya miezi sita, Mulungu kamtuma msenga wa kuulanga, twaga jake Gabilieli, yachole kudibuga da Nazaleti, mwiisi ya Galilaya.²⁷Kakala na usenga wa mhambe imoja yafungiligwe zengele na mbigalo imoja twaga jake Yusufu, yalawilile mulukolo lwa Mndewa Daudi. Mhambe ayo twaga jake Malia.²⁸Msenga ija kamcholela Malia, kamulongela, “Zihoze! Mndewa kahamoja na gweye. Nayo kakunogela ng'hani!”²⁹Malia viyauhulike usenga awo wa msenga wa kuulanga, kakala na mfundo ng'hani muumoyo wake, kakanganya usenga awo wofambula choni.³⁰Msenga ija kamulongela, “Malia, sekeudumbe, gweye kupata ng'hekewa ya Mulungu.³¹Kogoga inda na kolela mwana wa kimbigalo, nayo komkema Yesu.³²Kokuwa munhu mkulu, kokemigwa Mwana wa Mulungu yeli Uchanha Ng'hani. Mndewa Mulungu komgwaa kigoda cha undewa, kamba viyakalile Daudi muhenga wake.³³Kokuwa mtawala wa lukolo lwa Yakobo siku zose, na undewa wake wokuwa wa mazuwa gose!”³⁴Malia kamuuza msenga ija, “Niye na mhambe. Lelo mbuli ayo yokuwaze?”³⁵Msenga ija kamwidika, “Loho Yang'alile kokwizila, na nguvu za Mulungu zokugubika. Avo Mwana yonda yavumbuke kokuwa Yang'alile na kokemigwa Mwana wa Mulungu.³⁶Kumbuka ndugu yako Elizabeti. Wanhu wakala wolonga kakala mgumba, lakini sambi kana inda ya miezi sita, hamoja na uvele uyalinao.³⁷Kwavija kuduhu kinhu kimulemela Mulungu.”³⁸Malia kalonga, “Niye na msang'hanaji wa Mndewa, nailawilile kumwangu kamba viulongile.” Abaho msenga ija kasegela.

Malia komtembelela Elizabeti

³⁹Kumwande kidogo Malia kafunga mwanza, kalopola kuchola kuna idibuga dili mvigongo va isi ya Yudea.⁴⁰Kengila mng'anda ya Zakalia, kamulamusa Elizabeti.⁴¹Elizabeti viyahulike Malia komulamusa, king'hele kili mna iinda yake kizumha. Nayo Elizabeti kamemezigwa Loho Yang'alile,⁴²kalonga kwa sauti ng'hulu, “Gweye kunogeligwa kubanza watwanzi wose, na imwana yonda umulele konogeligwa!⁴³Habali mbuli ino ng'hulu inilawilile niye, mbaka mama wa Mndewa wangu keza kunhembelela?⁴⁴Vimhulike kondamusa, mwana king'hele yeli mna iinda yangu kazumha kwa kudeng'helela.⁴⁵Kumweda gweye utogola usenga wa Mndewa, kwavija wolawilila kumwako!”

Lwila lwa Malia

⁴⁶Malia kalonga,“Moyo wangu womgwaa nhogolwa Mndewa,⁴⁷Loho yangu yomdeng'helela kwavija Mulungu Mkombola wangu,⁴⁸kang'humbuka, niye msang'hanaji wake muhole!Kulawa sambi wanhu wose wong'hema munhu yamwedile,⁴⁹kwavija Mulungu Mkulu kanhendela vinhu vikulu.Twaga jake ding'ala.⁵⁰Kulawa lukolo na lukolo,kowonela bazi wanhu wose womtegeleza.⁵¹Katenda mbuli ng'hulu kwa mkono wake.Kawapwililisa wanhu weli na magoda mmizoyo yao.⁵²Kawahumulusa wandewa mna ivigoda vao va undewa,na kawenula wahole.⁵³Weli na nzala kawatenda wegute kwa vinhu vinogile nakawawinga matajili makono gaiyeka.⁵⁴Kasang'hana kija kiyalongile kwa wahenga zetu,keza kumtaza msang'hanaji wake Izilaeli.⁵⁵Kakumbuka kumonela bazi Abulahamu,na lukolo lwake lose siku zose!”⁵⁶Malia kakala kwa Elizabeti miezi midatu, abaho kabwela ukayake.

Kuvumbuka kwa Yohana Mbatizaji

⁵⁷Kipindi cha kuifungula Elizabeti vikivikile, kaifungula mwana wa kimbigalo.⁵⁸Wanhu weli behi nayo na ndugu zake viwahulike mbuli ng'hulu ziyatendeligwe na Mndewa, wadeng'helela hamoja nayo.⁵⁹Imwana viyavikize siku nane, wamwingiza kumbi. Walonda kumkema Zakalia, twaga da tatake,⁶⁰lakini mamake kalonga, “Bule, twaga jake Yohana.”⁶¹Wamulongela, “Kuduhu munhu mulukolo lwenu yeli na twaga dijo!”⁶²Abaho wamgwaa kilaguso tatake, wamuuza twaga gani diyalondile mwanage yakemigwe.⁶³Zakalia kawapula kibao cha kwandikila, kandika vino, “Twaga jake Yohana.” Wanhu wose wakanganya!⁶⁴Bahaja Zakalia kadaha kulonga, kamgwaa nhogolwa Mulungu.⁶⁵Wanhu weli behi nayo wadumba ng'hani. Mbuli izo za unzonza zibwililika kila hanhu kuvigongo va isi ya Yudea.⁶⁶Kila munhu yahulike mbuli ayo kaigelegeza, kauza, “Vino mwana ino kokuwa nani?” Kwavija udahi wa Mndewa ukala hamoja nayo.

Lwila lwa Zakalia

⁶⁷Zakalia tatake Yohana kamemezigwa Loho Yang'alile, kalonga usenga wa Mulungu,⁶⁸“Yatogoligwe Mndewa, Mulungu wa Izilaeli!Keza kuwataza wanhu zake na kuwagombola.⁶⁹Katugwaa Mkombola yeli na udahi,mzukulu wa Daudi msang'hanaji wake.⁷⁰Kamba viyalongile toka mwaka kubitila watula ndagu zake wang'alile,⁷¹kamba kotukombola na wanhu wang'hobo,na kulawa mmakono ga wanhu watwihile.⁷²Kalonga kowonela bazi wahenga zetu,na kokumbuka lagano jake ding'alile.⁷³Kaiduila kwa muhenga wetu Abulahamu,⁷⁴kutukombola mmakono ga wanhu watwihile,na kututenda tumsang'hanile bila kudumba,⁷⁵tuwe wanhu wang'alile na wanhu wotenda goyolonda Mulungu,siku zose za ugima wetu.

⁷⁶Gweye mwanangu, kokemigwa mtula ndagu wa Mulungu yeli Uchanha Ng'hani.Komulongolela Mndewa,kuitanda nzila yake.⁷⁷Kowalongela wanhu zake kamba wokomboligwa,na nzambi zao zogeligwa kumgongo.⁷⁸Mulungu wetu kana bazi na moyo unogile.Kotumwemwesela mulenge wa ukombozi kulawa kuulanga,⁷⁹na wowamwemwesela wanhu wose wokala mdiziza da ifa,na kulongoza magulu getu mnzila ya tindiwalo.”⁸⁰Imwana ija kagendelela kukula lukuli na kawa na nguvu mwiiloho. Kakala kuluwala mbaka siku dija viyalawilile mgameso ga wanhu wa Izilaeli.