Read Rucaxi 1

Rucaxi1hch_wbt

Teuquiru que mütiutavaüritüa

¹Yumüiretü meniuyuvaüriya memüteti'utüanicü naime hepaüsita tasata que mütiuyü.²Müme sutüapai memunenierixü, tupirisixi memacü niuqui 'aixüa manuyüne metecuxatatü, müme metateniyetuirieni mücü niuqui.³Neta nai que mütiuyü matüaripai hicüque heiseriemecü netinicuvaunecaitüni. 'Ayumieme nemareuyehüvirietü, Teuquiru 'acu, nepünevaüriya xexuime naime nemaraca'utüirienicü⁴yapemütimaicacü 'icü niuqui pemu'eni hepaüsita que mütise'i.

Que mütiutahüavarie, Vani 'ariqueque que mütinuivaquecai

⁵Mericüsü quepaucua Herurexi müti'aitametücai Cureya cuieyarisie, mara'acame 'aniuyeicacaitüni Huriyusixi teüteriyari vamara'acate xevitü hücütütü, Sacariya titevatü, 'Aviyaxi teüterimama metenitetevacaitüni mara'acate vahamatü müti'uximayacai. Yü'üya canexeiyacaitüni 'Erisaveti titevacame, mara'acame nu'ayatüme.⁶Yü'üitatü heiseriemecü yameteniyuriecaitüni Cacaüyari hüxie. Yametenicahucaitüni Ti'aitame que müti'aitacai naime, vahesie carahüivacacu.⁷Nunusi mepücahexeiyacai 'Erisaveti mücayüvecaicü. Mecani'uquiravesixitücaitüniri.⁸Mericüsü Sacariya mara'acametütü tini'uximayacaitüni Cacaüyari hüxie quepaucua 'Aviyaxi teüterimama vahesie mütiunaquixü.⁹Mara'acate que mütivayeiyaritücai, hesiena tiniunaque heiva Ti'aitame tuquitana meutahanicü, müticüsinaiyanicü.¹⁰Quepaucua maye'a mütitacüsinaiyacü, yunaitü teüteri tacua meniyuneneviecaitüni.¹¹Hicü nixeiya niuqui tuayame Ti'aitamesüa mieme mana 'utiveme müracüsinaiyasie serieta.¹²Sacariya 'ixeiyatü niuyuitüarieni yu'iyarisie, niutimani.¹³Hicü niuqui tuayame müpaü tinitahüave, Pepücaheumaca, Sacariya 'acu. 'A'ivaurica pü'enierie. 'A'üya 'Erisaveti xenive canitinuivitüamücü. Vani petiniterüvamücü.Peni'atemaviecamücü vaüca,'A'iyari cuini mieme ninaqui'acamücü¹⁴Yumüiretü mecaniyutemamaviecacuniQuepaucua mütinuiva.¹⁵Canimarivemücü Cacaüyari hüxie.Caxie vinuyari,Xeime vinuta pücaye'eni.'Iyari MütiyupataCaniviyamücü püta tinuivayu.¹⁶'Ixaherisixi teüteriyari yumüiremeTa'aurie canivaraxüriemücü,Ti'aitame memayexeiyanicüYucacaüyaritüme.¹⁷Canenucuhaitüiyamücü Ti'aitame'Eriyaxipaü tiuca'iyaritü,Türücariyaya hexeiyatü.Va'uquiyarima ta'aurie nivaraxüriemücü,Yütüriyama memüvara'erivanicü,Müme yuri memücate'erieTa'aurie nivaraxüriemücü,Müme heiseriemecü yamemütecahu vahepaü memüteyücühüavenicü.Nivacuha'aritüamücü teüteri,Ti'aitame memücueviecacü.¹⁸Hicü Sacariya müpaü tinicühüaveni niuqui tuayame, Que 'aneme 'inüariyaricü yanepütimaica. Necani'uquirasitüni, ne'üyata tucarieya ranutitüa.¹⁹Hicü niuqui tuayame müpaü tinicühüaveni, Ne Cüravieri necanihücütüni. Cacaüyari hüxie neniuveni. Yanemümatitahüavecü necaneyenü'arieni, nematitaxatüanicü 'icü niuqui 'aixüa manuyüne.²⁰Hicü camü, cayuvatü pepütiyerüni, pecaniuvetü pecanayeimücü mexi ca'aye'aveni, 'ecü yuri pemücatiuta'ericü neniuquisie. Peru neniuqui canaye'amücü quepaucua tucari maye'ani.²¹Mericüsü teüteri menicueviecaitüni Sacariya. Meni'iyarixiecaitüni 'emüreutevicaicü tuquita.²²Hicü vayeyaca niyutatexieni varahüavetü. Müme yametenetimani quename tixaütü tiuxei tuquita. 'Iya yumamacü nivacu'inüaritüvacaitüni. 'Aniucateitüni caniuvetü.²³Hicü heutiparecu 'uximayasicaya, yuquie caneyani.²⁴Hicü 'ana 'üyaya 'ayehucatü nayani 'Erisaveti. Niyu'avietacaitüni 'auxüme meseri müpaü 'utaitü,²⁵Camü, 'ipaü tiniuyurieni Ti'aitame, yuvaüriyatü 'aixüa münesiyurienicü, teüteri memücanesinanaimacacü.

Mariya que mütiutahüavarie, Quesusi 'ariqueque que mütitinuivaquecai

²⁶Mericüsü 'ataxevirieca meserisie Cacaüyari nitanü'ani yuniuqui tuayame Cüravieri, Carereya cuieyarisie quiecarisie Nasareti müracutevasie.²⁷'Üimari mücaxuriquicaisüa nitanü'ani Mariya mütitevacaisüa. Nitiviquieximecaitüni, 'uqui Cuse titevatü nitivitüniquecaitüni. Cuse Raviri caninunuiyarieyatücaitüni.²⁸Hicü Mariyasüa heutahaca niuqui tuayame, müpaü niutayüni, 'Aixüa 'acu. Ti'aitame 'aixüa catiniuca'iyarini 'ahesie mieme, 'ahamatü puyeica.²⁹Mücü yu'iyarisie niuyuitüarieni, yatinicu'erivacaitüni titayari müpaü mütivaüritüa.³⁰Niuqui tuayame müpaü tinitahüave, Pepücaheumaca, Mariya 'acu. Cacaüyari 'aixüa pütiuca'iyari 'ahesie mieme.³¹Hicüri pe'ayehucatü pecanayeimücü, pecanitinivemücü. Quesusi pecatiniterüvamücü.³²Canimarivemücü,Que mü'ane taheima macave nu'aya canimarivacamücü.Ravirisie caniyeyeimücü,Ti'aitame Cacaüyaritütü canipitüamücüRaviri 'uvenieyasie mayerünicüQue müti'aitacai 'iya.³³'Ixaherisixi teüteriyariCatinivata'aitüamücü yuheyemecü.Que müti'aitaPücatipare hasuacu.³⁴Hicü Mariya müpaü tinitahüave niuqui tuayame, Mericüte, quepaütütü 'ipaü pütiyüni. 'Uqui nepücamate.³⁵Niuqui tuayame müpaü tinitahüave,'Iyari Mütiyupata 'ahesie caninuamücü.Que mü'ane taheima macaveYutürücariyacü camani'etüriviyamücü.'Ayumieme nunusi mütinuiva canipasiemücüCacaüyarisie mieme,Müpaü catinimarivacamücüCacaüyari nu'ayatütü.³⁶Camü, 'a'iva yateva 'Erisaveti 'ayehucatü nayani 'ucarasitütü. 'Ataxeime meseri niyurieca 'iya caniveveme memüxatacai.³⁷Cacaüyari pücayutatexieni, naimecü püyüveni püta.³⁸Mariya müpaü tinitahüave, Mericüte, ne Ti'aitame necatini'uximayatameyatüni. Que pemaine yaquetiuyüni. Hicü niuqui tuayame caneyani.

Mariya que mürecu'ivataxü 'Erisavetisüa

³⁹Hicüsüari yucuha'aritüaca caneyani Mariya. Yumexüitüatü quiecarisie neta'ani hüri mananiere Cureya cuieyarisie.⁴⁰Sacariya quita heutahaca, nitavaüritüani 'Erisaveti.⁴¹Mericüsü 'Erisaveti quepaucua mi'eni Mariya 'ivaüritüacacu, nunusi neucuyuaxüani huriepana. Hicü 'Iyari Mütiyupata niviya 'Erisaveti.⁴²Müpaü niutayüni carima, Vaüca 'aixüa pepu'itüarie, hipatü 'ucari temüca'itüariepaü. 'Aixüa cani'itüariemücü que mü'ane pemütinuivitüani.⁴³Nehesie que tinaque neti'aitüvame varusieya münesi'ivatamiecü.⁴⁴Camü, 'avaürisica ne'u'eniecu, nunusi yutemavietü neucuyuaxüani nehuriepa.⁴⁵'Aixüa pecani'itüariemücü yuri pemütiuta'ericü quename 'aye'ani naitü que pemütiutahüavarie, Ti'aitame que mümaretahüavixü.⁴⁶Hicü Mariya müpaü niutayüni,Ne'iyari müpaü paine, Ti'aitame canitürücaüyeni.⁴⁷Ne'iyari niyutemavieca nehe'erivatüCacaüyari münesi'utavicueisitüacü.⁴⁸Caneniuxeiya ti'uximayatame que nemütihücü hesiena mieme,Sepa tixaü nemücatihücü.Camü, 'uxa'a varie yunaitü nuivarite'Aixüa ne'itüariecame mecaneni'eriecacuni.⁴⁹Que mü'ane mütürücaüyeMarivemecü caneniuyurieni.Mücü Pasiecame canixasivani.⁵⁰Canivanenimayaca yunaime memüteheiyehüvirie,Vanivemata nivanenimayaca.⁵¹Yücümana que mütiyurieneCanimasiücüni que mütitürücaüye.Nivareutaveiyaxüani müme memüteyucatave'erieYu'iyarisie que memütecu'eriva,⁵²Cuiepa te'aitamete nivarunavairieniTita memüte'aita,Müme tixaü memücatehüme pütaNivaruhüritüani vaüca.⁵³Memeuhacacuicucai nivarutihüniya 'aixüa mü'anecü.Memeuca'ucai nivareutanü'axüani memamaveme.⁵⁴Nisutüani tasiparevietü 'Ixaherisixi teüteriyariHesüana mieme temüte'uximayatamete,He'erivatü que mütivarutahüavixü ta'uquiyarima.Caninenimayaca 'Apurahami yuheyemecü,Cataninenimayaca tame hesiena temüyecü.⁵⁶Mericüsü Mariya 'Erisavetisüa niucateitüni 'esivatücacu haica meseri. 'Arique yuquie neyani.

Vani Ti'üyame que mütiutinuivaxü

⁵⁷Mericüsü tucari naye'ani 'Erisaveti mütinivenicü. 'Uquitüme niutiniveni.⁵⁸Hicü 'auravatari maremama yunaitü mete'utamarieca Ti'aitame vaüca que mütitanenimayataxü, hamatüana mecaniyutemamaviecaitüni.⁵⁹Hicü 'atahairieca tucarisie mecaniu'axüani me'i'inüaritüanique nu'esi Huriyusixi vaxitequiyacü. Sacariya mecateniterüvaquecaitüni 'uquiyarieyapaü.⁶⁰'Ana varusieya müpaü niutayüni, Tixaüsietü. Vani catinitevacamücü püta.⁶¹Müme müpaü metenitahüave, Haquevasü 'amare pumave müpaü titevatü.⁶²Yumamacü menitahüave quemasieya, que mütinaque mütiterüvarienicü.⁶³Xapa 'uta'ivauca, müpaü 'utaineme canaca'utüani, Vani catinitevacamücü püta. Yunaitü meniuhüxiyani.⁶⁴Hicü yapaucua nenieya niuxünarieni. Niutaniuni 'aixüa 'utaitü Cacaüyari hepaüsita.⁶⁵'Auravatari yunaitü mecanimamacaitüni. Naisarie Cureya hüriyarisie que mütiuyü catinicuxaxasivacaitüni.⁶⁶Yunaitü memü'enanacai meniyu'iyaritüacaitüni müpaü meteyücühüavetü, Que 'anetü payani 'icü nunusi. Mücü meta, Ti'aitame yütürücariyacü nipareviecaitüni.

Sacariya que mutayü, Cacaüyarisie mieme ticuxatatü

⁶⁷'Ana Cacaüyari 'Iyarieya Mütiyupata caniviyani nunusi 'uquiyarieya. Sacariya niutaniuni Cacaüyarisie mieme müpaü 'utaitü,⁶⁸'Aixüa queticühüavarüvani Ti'aitame,Que mü'ane 'Ixaherisixi mütacacaüyari.Nisutüani yuteüterima va'üviyatü,'Aixüa 'iyurienetü memüxünarienicü.⁶⁹Que mü'ane mütürücaüye niuquerieni, mütasitavicueisitüanicü,Raviri quie mieme,Raviri müti'uximayacaicü Cacaüyarisie mieme⁷⁰Meripaitü que mainecai que mütiyurieniquecai.Yametenicuxatacaitüni texaxatametemamaMemupasie hesiena mieme,Memutiniucacaicü hesiena mieme.Müpaü meniutiyuanecaitüni⁷¹Mütasi'utavicueisitüaniquecaicüMüme memütasi'aye'uni memücatasi'a'ivacü,Müme memütasi'uxive'erie memücatasi'a'ivacü.⁷²Müpaüta meniutiyuanecaitüniMüvanenimayataquecaicü ta'uquiyarimaHe'erivatü türatu mutavevi yücümana,⁷³Que mütiuyuhüritüa yaticühüavetü ta'uquiyari 'ApurahamiQuename tasipitüaniquecai⁷⁴
tecamamatüTemütavicueisitüarienicüMüme memütasi'aye'uni memücatasi'a'ivacü,Temeyexeiyanicü 'iya que mütinaque,⁷⁵Hesiena mieme tepasietü,Heiseriemecü yatetecahutü,Hüxiena te'u'uvatü mexi te'ayeneniere.⁷⁶'Ecü meta nunusi 'acu,Que mü'ane taheima macavesüa mieme tixaxatamePecatiniuterüvarüvamücü.Ti'aitame pepanucuhaitüiyaHuyeya 'aixüa pemüyurienicü.⁷⁷Teüterimama petinivatahecüatüamücüQue mütivatavicueisitüani pehaitü,Que mütivareuyehüvirieni müme 'axa memüte'uyuri pehaitü.⁷⁸Müpaü catiniyuriemücüTacacaüyari mütiyucanenimayacü.'Ayumieme que mü'ane taheima mümieme caninuamücü.⁷⁹Nivahecüariviyamücü müme yüvipa memütitei,Müme meta mecui'ivarümetü memüyüriyarieNivahecüariviyamücü.Ta'ücate cataniseiriyamücü,Temeu'uvanicü haque 'aixüa temütetaxeiyanicüCacaüyarimatü.⁸⁰Mericüsü nunusi caniverecaitüni. 'Iyarieya türücaüyetü nayani. Macumavesie neyeicacaitüni mexi tucarieya ca'aye'avecai cuxi masiücütü mayanicü 'Ixaherisixi vahüxie.