Read Luka 1

Luka1cwe_pbt

¹Mwenevale Seyofilo, “Wanhu wengi waiyoha fana viwadahile kwandika vinhu vovilawilile kumwetu.²Wandika vinhu vichilongiligwe na waja waviwonile kwa meso yawo na wasang'hani wa mbuli ija kulawa mwanduso na kupeta Mbuli Inogile.”³Ivo Mwenevale, kwaviya na niye nyhunguza vinogile vinhu ivo vose kulawa mwanduso, nilola vinogile na niye nikwandikile goya viya vilawilile.⁴Nosang'hana ivo muladi weye udahe kuumanya ukweli wose wa vinhu viya viufundizigwe.

Kwelekigwa kwa Yohana Mbatizi kwolagusigwa

⁵Siku ziya Helode viyakalile mfalume wa Yudeya, kukala na Mkulu wa nhambiko digogogo imwe, zina jake Zakaliya, wa chibumbila cha Abiya. Mke wake katangigwa Elizabeti, nayo kalawa muna ulukolo lwa Haluni.⁶Wose waidi wakala wanoga haulongozi ha Mulungu, kuno wokwamha malagilizo yose ya Mndewa.⁷Hawakalile na mwana bule, kwaviya Elizabeti kakala halela. Na wose waidi wakala walala ng'hani.⁸Siku dimwe Zakaliya kakala mwii Kaye ya Mulungu kotenda sang'hano yake ya kulava nhambiko fana viyatendaga mwii zamu yake.⁹Kulawa muna ichihendo cha wakulu wa nhambiko, mhiya imsagula Zakaliya kuhita kufukiza ubani mgati mwa Kaye ya Mndewa.¹⁰Lusita lwa kufukiza ubani vilufikile, lung'husesa lwa wanhu lukala hanze lwotosa.¹¹Maabaho Msenga wa Mndewa kulawa Kuulanga kamulawilila Zakaliya, kema ubanzi wa kulume wa chilingo cha kufukizila ubani.¹²Zakaliya viyamuwone, kasinhuka, kakala kogudema kuno kodumba.¹³Mbali msenga wa kuulanga ija kamulongela, “Sekeudumbe, Zakaliya! Mulungu kahulika nhosa yako. Mke wako kezakwelekela mwana wa chilume, na weye kwizamtanga Yohana.¹⁴Kwizasekelela ng'hani na kudeng'helela, na wanhu wengi wezasekelela kwa kwelekigwa kwake.¹⁵Kezakuwa mkulu ha ulongozi ha Mndewa. Hezakung'wa bule upele wala chinhu chochose chogela ukoligwa. Kezamemezigwa Muhe Yelile kusongela mmunda mwa mami yake.¹⁶Kezawabweleza wanhu wengi wa Isilaeli kwa Mndewa Mulungu wawo.¹⁷Kezamulongolela Mndewa, kezakuwa na ludabwa fana lwa Eliya mulotezi wa Mulungu kuwatenda china tata wawagese iwana wawo. Kezawahindula wanhu wohawamuhulika Mulungu wagese magesa ya wanhu wanogile, kuwatenda wanhu waisasale kumuhokela Mndewa.”¹⁸Zakaliya kamuuza msenga wa kuulanga ija, “Vino nizavimanyaze kuwa mbuli iyo izakuwa kweli? Niye na mulala na mke wangu iviya mulala.”¹⁹Msenga wa kuulanga ija kamwidika, “Niye na Gabuliyeli. Nokwima hanhu ha Mulungu. Iyo ni iyo yoyanitumile nilonge na weye na kukugalila mbuli ino inogile.²⁰Mbali huhuwile mbuli yangu yondailawilile kwa lusita lwake, ivo hwizadaha kulonga mbaka siku ijo mbuli zonikulongele vondazilawilile.”²¹Wanhu wowakalile womgozela Zakaliya wazanywa kwaviya viyakalame muna Ikaye ya Mulungu.²²Viyalawile kunze, hadahile kulonga nawo, ivo wavimanya kuwa kawona malaguso Mwiikaye ya Mulungu. Kwaviya hadahile kulonga, kasang'hanila vilaguso kwa makono yake kulonga nawo.²³Zamu yake ya usang'hano viimalile, Zakaliya kabwela ukaye.²⁴Siku za hamwande chidogo, mke wake kapata wimo, na kwa lusita lwa miyezi mitano halawile ukaye yake. Kalonga,²⁵“Mndewa kanitendela yano. Sambi kanilagusa ubazi wake. Kanisegezela chinyala chonikalile nacho haulongozi ha wanhu!”

Kwelekigwa kwa Yesu kwolagusigwa

²⁶Muna umwezi wa sita wa wimo wa Elizabeti, Mulungu kamtuma msenga wa kuulanga yoyatangigwe Gabuliyeli yahite kudibululu doditangigwa Nazaleti muna iisi ya Galilaya.²⁷Keza na usenga kwa mwali imwe mhambe yoyatangigwe Maliya. Imwali iyo kalondeka kufudikiligwa na mbwanga imwe yoyatangigwe Yosefu wa lukolo lwa Mfalume Daudi.²⁸Msenga wa kuulanga kamuhitila na kumulongela, “Nokulamsa! Mndewa kahamwe na weye, nayo kakutemela mate g'hani!”²⁹Maliya viyahulike usenga uwo wa msenga wa kuulanga, kapata fondogolo ng'hani muumoyo wake, iviya kazanywa mbuli iyo ina fambulo jaki.³⁰Mbali msenga wa kuulanga ija kamulongela, “Maliya, sekeudumbe! Mana Mulungu kakulagusa unovu wake.³¹Kwizapata wimo, na kwizakweleka mwana wa chilume, nayo kwizamtanga Yesu.³²Nayo kezakuwa mkulu, kezatangigwa Mwana wa yeli Uchanyha Ng'hani. Na Mndewa Mulungu kezamtenda yawe Mfalume, fana Daudi wasaho yake viyakalile.³³Kezakuwa Mfalume wa lukolo lwa Yakobo siku zose, ufalume wake hawizakuwa na uhelelo bule!”³⁴Maliya kamuuza msenga wa kuulanga ija, “Niye namhambe. Lelo yano yezadahikaze?”³⁵Msenga wa kuulanga ija kamwidika, “Muhe Yelile kezakuhulumukila, na udahi wa Mulungu yeli Uchanyha Ng'hani lwa Mulungu lwizakugubika. Kwa ichimu chino Mwana Yelile yondayelekwe kezatangigwa Mwana wa Mulungu.³⁶Mkumbuke ndugu yako Elizabeti. Ilongigwa hadaha kulela bule, mbali sambi kana wimo wa miyezi sita hamwe na ulala wake.³⁷Kwaviya habule chinhu hachidahika kwa Mulungu!”³⁸Maliya kalonga, “Niye na msang'hani wa Mndewa, nhendiligwe ivo viulongile.” Maabaho msenga wa kuulanga ija kasegela.

Maliya komulaula Elizabeti

³⁹Siku chidogo hamwande, Maliya kahita hima hima mbaka bululu dili muimilima ya Yudeya.⁴⁰Uko kengila muna ikaye ya Zakaliya, kamulamsa Elizabeti.⁴¹Elizabeti viyahulike ndamsa ya Maliya, mwana ching'hele kakwesa mwiinda yake. Elizabeti kamemezigwa Muhe Yelile⁴²nayo kalandula dizi, kalonga, “Mulungu kakutemela mate kufosa wanaake wose, nayo mwana yondaumweleke katemeligwa mate!⁴³Vilihi mbuli zino ng'hulu zinilawilila niye mbaka mama wa Mndewa wangu yanilaule?⁴⁴Vinihulike ndamsa yako, mwana ching'hele muinda yangu kakwesa kwa deng'ho.⁴⁵Kudeng'helela ng'hani weye yuutogole mbuli ya Mndewa, kwaviya izakuwa kweli kumwako.”

Wila wa nhogolwa wa Maliya

⁴⁶Maliya kalonga,“Moyo wangu womtunhiza Mndewa,⁴⁷na muhe wangu wodeng'helelakwa ichimu cha Mulungu Mulopozi wangu,⁴⁸kwaviya kanikumbuka, msang'hani wake mnyendanyenda!Kusongela sambi na kugendelelawanhu wose wezanitanga nili na heli⁴⁹kwa vinhu vikulu Mulungu yeli na Ludabwa voyanhendele.Zina da Mulungu jela.⁵⁰Kusongela ulelwa uno na kugendelelakowalagusa ubazi waja wowondumba.⁵¹Katenda vinhu vikulu kwa mkono wake.Kawapwililisa weli na magoda munaimizoyo yawo.⁵²Kawahulumusa wafalume weli na ludabwa kulawa kuna ivigoda va chifalume vawo,na kawenula wanyendanyenda.⁵³Weli na nzala kawegutiza yanogile,na kawasegeza matajili makono muhala.⁵⁴Kamtaza Isilaeli msang'hani wake,kakumbuka kulagusa ubazi wake⁵⁵kwa Bulahimu na lukolo lwakesiku zose!”⁵⁶Maliya kakala na Elizabeti kwa lusita lwa miyezi mitatu, maabaho kabwela ukaye yake.

Kwelekigwa kwa Yohana Mbatizi

⁵⁷Lusita lwa Elizabeti kuibasula vilufikile, kaibasula mwana wa chilume.⁵⁸Wakaya wayage na ndugu zake viwahulike vinhu vinogile Mndewa viyamtendele, wadeng'helela hamwe nayo.⁵⁹Maabaho vidifikile siku da nane, weza kumwingiza ulungwana imwana. Walonda kumtanga Zakaliya, zina da tati yake.⁶⁰Mbali mami yake kalonga, “Siivo! Zina jake kezatangigwa Yohana.”⁶¹Wamulongela, “Mbona mulukolo wenu habule munhu yeli na zina ijo?”⁶²Maabaho wamuuza tati yake kwa chilaguso, wavimanye kolonda yamtange mwanage zina dilihi.⁶³Zakaliya kapula chibawo cha kwandikila, maabaho kandika vino, “Zina jake Yohana.” Wose wazanywa!⁶⁴Bahobaho Zakaliya kadaha kulonga kaidi, nayo kandusa kumwing'ha nhogolwa Mulungu.⁶⁵Wakaya wayage wafikigwa na lugano, na mbuli zino zenela muna imilima ya isi ya Yudeya.⁶⁶Chila munhu yoyahulike mbuli izo kaiuzagiza muna umoyo wake, “Mwana ino kezakuwa mwana waki?” Ioneka kweli ludabwa lwa Mndewa yahamwe nayo.

Ulaguzi wa Zakaliya

⁶⁷Zakaliya tati yake Yohana kamemezigwa Muhe Yelile, nayo kalonga ulaguzi uno kulawa kwa Mulungu,⁶⁸“Yeng'higwe nhogolwa Mndewa, Mulungu wa Isilaeli!Kwaviya keza kuwataza wanhu wake na kuwakombola.⁶⁹Kaching'ha cheye Mulopozi yeli na ludabwa,mzukulu wa Daudi msang'hani wake.⁷⁰Kalonga kufosela kwa walotezi wa Mulungu wake welile kusongela umwaka⁷¹kuwa kezachikombola kulawa kwa wehi wetu,na kulawa muna uludabwa lwa wanhu wose wowochihila.⁷²Kalonga kezawawonela ubazi wasaho zetu,na kezakumbuka lagano jake jelile.⁷³Kamulahila Bulahimu wasaho yetu⁷⁴kezachikombola kulawa muna yamakono ya wehi wetu.Na kezachitenda chidahe kumsang'hanila bila ya lugano,⁷⁵kwa kwela na kuwoneka munoga haulongozi hake,siku zose ya ugima wetu.

⁷⁶“Na weye mwanangu, kwizatangigwa mulotezi wa Mulungu yeli Uchanyha Ng'hani.Kwizamulongolela Mndewa,kumsasalila nzila yake.⁷⁷Kwizawalongela wanhu wake kuwa wezakomboligwa,kwa kusegeziligwa uhasanyi wawo.⁷⁸Mulungu wetu ni kana ubazi na moyo unogile.Kezachimwemwesela mwemweso da ukombola kulawa kuchanyha⁷⁹kwizawamwemwesela wose wowokala muna diziza na sisila da ifa,yalangulize hatuwa zetu muna inzila ya tindiwalo.”⁸⁰Mwana kakula lukuli na muhe. Kakala mudibwilingu mbaka siku viyawalawilile wanhu muumwingi wa Isilaeli.