Read LUKU 1

LUKU1bus_sim

¹Gbɛ̃ paridee ↄ kpà, lɛ wà yã kɛ̀ kɛ̀ wa tɛ́ tↄ̃kɛ̃ takada guu zɛ́azɛa,²lán gbɛ̃ kɛ̀ aↄ̃ↄ dɛ yã pì sèedadeenↄ ũ kↄ̃n a baarukparinↄↄ òwe nà zaa káaku.³Tia sa mapi sↄ̃, lán ma wɛ́ɛ tɛ̀ yã pìnↄzi nà doodo zaa a daɛna, má è à maa mà kɛ̃nnɛ zɛ́azɛa, ma gbɛ̃ bɛ̀ɛde Tiofilu,⁴lɛ ǹ yã kɛ̀ wà dànnɛɛ sãnsãn dↄ̃.

Malaika gĩakɛ à Yaaya Batisikɛri ina yã ò

⁵Yudea bùsu kí Hɛrↄdu gurↄ sa'ori kee kuu, à tↄ́n Zakari. À kú Abia sa'orinↄ gãli guumɛ. À naↄ̃ tↄ́n Ɛlizabɛti, Aruna boriimɛ dↄ.⁶Aↄ̃ plaaa ń píngi maa Ludanɛ. Aↄ̃ègↄ̃ kuu taari sai, aↄ̃ↄ Dii doka kↄ̃n yã kɛ̀ à dìɛnↄ kũna.⁷Mↄde aↄ̃ nɛ́ vĩro, zaakɛ Ɛlizabɛti nɛ́ pãaamɛ, ben aↄ̃ gↄ̃ↄn plaaa ń píngi zi kũ̀.⁸Gurↄↄ kɛ̀ sa'ona kà ń gãlia, Zakari bé èe sa'ona Ludaa zĩi kɛɛ.⁹Lán sa'ori pìnↄ è kɛ nà, aↄ̃ kàbankpɛ kɛ̀, ben kàbankpɛ Zakari kũ̀, lɛ à gá tuaetiti kpata Dii kpɛ́n.¹⁰Tuaetitikpatagurↄ parii kàkↄ̃a kpɛɛlɛa píngi aↄ̃ↄe adua kɛɛ.¹¹Ben Dii malaika bↄ̀ à mↄ̀zi à zɛ̀ tuaetitikpataki ↄplazi.¹²Kɛ̀ Zakari à è, à kɛ̀ gìri, vĩa à kũ̀.¹³Ben malaika pì bènɛ: Ǹton tó vĩa n kũro Zakari. Luda n wɛ́ɛkɛɛ sì, n naↄ̃ Ɛlizabɛti é nɛ́ i gↄ̃gbɛ̃ ũ, nɛ́ tↄ́ kpánɛ Yaaya.¹⁴N pↄↄ é kɛ nna, nɛ́ yáa dↄ, gbɛ̃nↄ é pↄnnaa kɛ à ina yã musu pari,¹⁵zaakɛ eégↄ̃ dɛ Diinɛ gbɛ̃nsi ũmɛ. Eé wɛ̃ɛ ke í gbãa ke miro, Luda Nini égↄ̃ kúa zaa à da gbɛɛɛmmɛ.¹⁶Eé tó Isarailinↄ aɛ dↄ Dii ń Ludaa pari,¹⁷eé dↄ Diinɛ aɛ kↄ̃n Luda Nini gbãaa kɛ̀ Ilia vĩ yãao. Eé tó denↄ lɛ́ kɛ do kↄ̃n ń nɛ́nↄ, eé tó swãyãmarisaideenↄ gbɛ̃ maaanↄ ↄ̃ndↄ̃ↄ sɛ́. Eé tó gbɛ̃nↄ gↄ̃ kú soru guu Diinɛ.¹⁸Ben Zakari bè malaika pìnɛ: Mɛ́ yã pì sãnsãn dↄ̃ diamɛ? Zaakɛ mare zikũnan ma ũ, ben ma naↄ̃ zi kũ̀ dↄ.¹⁹Ben malaika pì wèàla à bè: Mámbe Gabliɛli ũ, mɛɛ̀gↄ̃ zɛna Luda aɛzĩ. Àmbe à ma zĩ mà yã pì onnɛ mà baaru nnaa pì kpánnɛ.²⁰Ǹ ma, n nɛ́nɛ é naɛ, nɛ́ fↄ̃ ǹ yã oro ai yã pì gá kɛo, kɛ̀ nɛ́ɛ ma yã kɛ̀ eé kɛ a gurↄↄa síro yãnzi.²¹Gurↄↄ mↄ̀a sↄ̃ wèe Zakari dãa. À gìkɛna Luda kpɛ́n bↄ̀ ń saɛ.²²Kɛ̀ à bↄ̀, èe fↄ̃ à yã òńyoro, ben wà dↄ̃̀ kɛ̀ à wɛ́ɛgupu è Luda kpɛ́mmɛ. Lán à nɛ́nɛ nàɛ nà, ben èe yã oońnɛ kↄ̃n ↄↄo.²³Kɛ̀ Zakari sa'ogurↄↄ pàpa, ben à tà bɛ.²⁴Beee gbɛra à naↄ̃ Ɛlizabɛti nↄ̀ sì, ben à a zĩnda ùtɛ ai mↄ sↄↄro à bè:²⁵Dii yã kɛ̀ kɛ̀mɛ, à ma wɛ̃nda gwà, à ma bↄ wín.

Malaika gĩakɛ à Yesu ina yã ò

²⁶À mↄ swɛɛdodee guu Luda malaika Gabliɛli zĩ̀ Galili lakutu kɛ̀ wè be Nazarɛti guu.²⁷À gàa nↄkparɛ lɛzii kɛ̀ à tↄ́n Mariama kiia. À gↄ̃kpamma vĩ Dauda borii ũ. À tↄ́n Yusufu.²⁸Kɛ̀ malaika pì gɛ̃̀ à kiia, à bènɛ: Fↄↄ aubarikade! Dii kúnyo.²⁹Mariama bídi kɛ̀ maamaa yã pìa, à laasuu lɛ̀ à bè: Ì beee mì dɛ diamɛ?³⁰Ben malaika pì bènɛ:Mariama, ǹton tó vĩa n kũro,zaakɛ Luda gbɛ̃kɛɛ kɛ̀nnɛmɛ.³¹Ǹ ma! Nɛ́ nↄ̀ sí ǹ nɛ́ i gↄ̃gbɛ̃ ũ,nɛ́ tↄ́ kpánɛ Yesu.³²Eégↄ̃ dɛ gbɛ̃nsi ũ,weé à sísi Luda Musude Nɛ́.Dii Luda é à kpáà dezi Dauda kpatan,³³eégↄ̃ kí blee Yakubu boriinↄnɛ gurↄ píngi,à kíblena égↄ̃ yãana vĩro.³⁴Ben Mariama bè malaika pìnɛ: Kɛ̀ má gↄ̃gbɛ̃ dↄ̃ zikiro, beee é sí kɛ diamɛ?³⁵Malaika wèàla à bè:Luda Nini é summa,Luda Musude gbãaa é danla.Beee yãnzi nɛ́ kɛ̀ nɛ́ ii pì kuuna égↄ̃ adona,weé à sísi Luda Nɛ́.³⁶N danɛ Ɛlizabɛti nɛ́gↄ̃gbɛ̃ nↄ̀sina se a zikũ guu. Nↄgbɛ̃ kɛ̀ wà dìɛ pãaa ũu pì kú kↄ̃n nↄ̀ mↄ swɛɛdooo tia.³⁷Zaakɛ Luda kiian baabↄ píngi è sí kɛn.³⁸Ben Mariama bè: Dii zↄ̀blerin ma ũ. À kɛmɛ lán ń ò nà. Ben malaika pì tà à à tòn.

Mariama gana Ɛlizabɛti gwa

³⁹Gurↄↄ mↄ̀a Mariama fɛ̀ɛ à gàa lakutu kɛ̀ kú Yudea bùsu gusĩsĩdeen gↄ̃ↄ.⁴⁰À gàa Zakari bɛ, ben à ì kpà Ɛlizabɛtia.⁴¹Kɛ̀ Ɛlizabɛti Mariama ì pì mà, à nɛ́ vĩ̀ à gbɛɛɛ guu, ben Luda Nini sù Ɛlizabɛtia,⁴²à wii gbãaa lɛ̀ à bè: Aubarikadeen n ũ dɛ nↄgbɛ̃ píngila. Aubarikadeen nɛ́ kɛ̀ kú n gbɛɛɛn ũ dↄ.⁴³Bↄ́n ma ũ kɛ̀ ma Dii da mↄ̀ ma gwaa?⁴⁴Gurↄↄ kɛ̀ ma n ì mà dé, nɛ́ kɛ̀ kú ma gbɛɛɛn vĩ̀ kↄ̃n pↄnnaao.⁴⁵Aubarikadeen n ũ, mmↄn kɛ̀ n yã kɛ̀ Dii ònnɛɛ sì, kɛ̀ eé kɛ.

Mariama Dii tↄ́ sɛna lezĩ

⁴⁶Ben Mariama bè:Mɛ́ɛ Dii tↄ́ sɛɛ lezĩ ma swɛ̃̀ guu,⁴⁷ma pↄↄ e kɛɛ nna Luda ma Mìsiria,⁴⁸zaakɛ à ma yã dà,mamↄma à zↄ̀bleri kɛ̀ mɛ́ɛ ká pↄ́ke lɛ́zĩroo.Zaa tia ai gurↄ píngi weé bemɛ aubarikadeemɛ,⁴⁹zaakɛ Luda gbãade yã bíta kɛ̀mɛ.À tↄ́ kú adona.⁵⁰È wɛ̃nda dↄ̃ gbɛ̃ kɛ̀ aↄ̃è a vĩa kɛɛnↄnɛai ń boriia.⁵¹À a gã̀sã pòro à a gbãaa ↄ̀dↄańnɛ,à ĩadãrinↄ fã̀akↄ̃a kↄ̃n ń laasuunↄ.⁵²À gbãadeenↄ bↄ̀ kpatan,à talakanↄ sɛ̀ lezĩ.⁵³À pↄ́ maaanↄ kpà nↄadɛrinↄa aↄ̃ kã̀,mↄde à ↄↄdeenↄ gbàrɛ ↄkori.⁵⁴À a zↄ̀bleri Isarailinↄ ĩan ká,aↄ̃ yã e sãnlo.⁵⁵À wɛ̃nda dↄ̃̀ Ibraĩnɛ kↄ̃n a borii pìnↄlán à ò wa dezinↄnɛ nà.⁵⁶Mariama vɛ̃̀ɛ kↄ̃n Ɛlizabɛtio lán mↄ aagↄ̃ↄ bà, ben à tà bɛ.

Yaaya Batisikɛri ina

⁵⁷Ɛlizabɛti nɛ́'igurↄↄ kà, ben à nɛ́ ì gↄ̃gbɛ̃ ũ.⁵⁸Kɛ̀ à fáandideenↄ kↄ̃n à danɛnↄↄ mà lán Dii wɛ̃nda dↄ̃̀nɛ nà, aↄ̃ pↄnnaa kɛ̀o.⁵⁹À gurↄ sↄraagↄ̃dee zĩ aↄ̃ mↄ̀ bã̀ngu kɛ nɛ́ pìnɛ, lɛ wà à de Zakari tↄ́ kpánɛ,⁶⁰ben à da bè: Auo! Weé à sísi Yaayamɛ.⁶¹Aↄ̃ bènɛ: Gbɛ̃kee kú n danɛnↄ tɛ́ kɛ̀ à tↄ́ beee vĩro.⁶²Ben aↄ̃ yã ò à denɛ kↄ̃n ↄↄo, lɛ wà dↄ̃ dian à yezi wà tↄ́ kpánɛ nà.⁶³Zakari walaa gbèka, ben à kɛ̃̀a: À tↄ́n Yaaya. Yã pì bↄ̀ ń saɛ ń píngi.⁶⁴Gwe gↄ̃ↄ à nɛ́nɛ gùɛ, à lɛ́ bↄ̀ èe yã oo èe Luda sáabu kpaa.⁶⁵Ben vĩa ń fáandideenↄ kũ̀ ń píngi, ben Yudea bùsu gusĩsĩde gbɛ̃nↄↄ e yã pì tↄ̃kɛ̃ɛ ń píngi.⁶⁶Ben gbɛ̃ kɛ̀ aↄ̃ yã pì mànↄ kũna ń nↄ̀sɛ guu wà bè: Bↄ́n nɛ́ pì égↄ̃ dɛ a ũ ziaa? Zaakɛ Dii ↄↄ ligazimɛ.

Zakari annabikɛyã'ona

⁶⁷Luda Nini sù à de Zakaria, ben à annabikɛyã ò à bè:⁶⁸Wà Dii Isarailinↄ Luda sáabu kpá!À mↄ̀ à a gbɛ̃nↄ bò.⁶⁹À Mìsiri gbãadee bↄ̀wea zↄ̀bleri Dauda bori tɛ́,⁷⁰lán à ò a annabinↄ gãzĩ nà zaa gìkɛna.⁷¹Aↄ̃ bè eé wa sí wa ibɛɛnↄa,eé wa bↄ gbɛ̃ kɛ̀ aↄ̃ zàwaguu pìnↄ ↄzĩ.⁷²Lɛmɛ à wa dezinↄ wɛ̃nda gwà lɛ,à bà kuunańyo yã e sãnlo.⁷³À la dà wa dezi Ibraĩnɛ⁷⁴à bè é wa bↄ wa ibɛɛnↄ ↄzĩ,é wa gba zɛ́ wà dↄazi vĩa sai,⁷⁵lɛ wa kuuna gↄ̃nɛ adona gbɛ̃ maaanↄ ũai wa wɛ̃̀ndi lɛ́n.⁷⁶Mpi sↄ̃ ma nɛ́,weé n sísi Luda Musude annabi,zaakɛ ḿbe nɛ́ dↄ Diinɛ aɛ ǹ zɛ́ kɛkɛnɛ.⁷⁷Nɛ́ tó à gbɛ̃nↄ dↄ̃ lán eé ń mì sí nà,lán eé ń durunnↄ kɛ̃ńnɛ nà.⁷⁸Zaakɛ wa Ludaa sùu vĩ,bↄna musu eé mↄ́ wa gwa lán gudↄna bà,⁷⁹lɛ à guu pu gbɛ̃ kɛ̀ aↄ̃ↄ kú gusiaa guunↄnɛkↄ̃n gbɛ̃ kɛ̀ aↄ̃ↄ kú gaa lɛ́zĩnↄ,lɛ à wa gbá da aafia zɛ́n.⁸⁰Nɛ́ pì bíta kũ̀ à gↄ̃̀ kãgbãadee ũ. A kú gbáan ai gurↄↄ kɛ̀ à bↄ̀ Isarailinↄnɛ gupuraaa.