Read LUKU 1

LUKU1bqp_sim

¹Gbɛ̃nↄ ↄ kpà dasi, de ò yã kũ à kɛ̀ ó tɛ́ baba takada gũn zɛ́azɛa,²lákũ gbɛ̃ kũ ò de yã pìi sèedadenↄ ũ kũ a baarukparinↄ òwɛrɛ nà zaa káaku.³Tera sà makũ sↄ̃, lákũ ma wɛ́ pɛ̀ yã pìnↄi nà dodo zaa a naana, ma è à mana mà kɛ̃nnɛ zɛ́azɛa, ma gbɛ̃ bɛ̀ɛrɛde Tiofilu,⁴de ǹ yã kũ ò dànnɛ sãnsãn dↄ̃.

Malaika gĩnakɛ à Yahaya Da'itɛkɛri ina yã'onaa

⁵Yudea bùsu kína Hɛrↄdu gↄrↄ sa'ori ke kun, a tↄ́n Zakari. À kú Abia sa'orinↄ gã̀a gũmmɛ. A nanↄ tↄ́n Ɛlizabɛti. Haruna burimɛ dↄ.⁶Ń pla ń pínki mana Ludanɛ. Òdigↄ̃ kun taari sari, ò Dikiri doka kũ yã kũ à dìtɛnↄ kũna.⁷Ama ò nɛ́ vĩro, zaakũ Ɛlizabɛti bi paramɛ, akũ ń gbɛ̃nↄn pla ń pínki zĩ kũ̀.⁸Gↄrↄ kũ sa'onaa kà ń gã̀aa, Zakari mɛ́ àtɛn sa'ona Ludaa zĩ kɛ.⁹Lákũ sa'orii pìnↄ dì kɛ nà, ò kàpaa kpà, akũ kàpa Zakari kũ̀ de à gɛ́ turaretiti kpata Dikiri kpɛ́n.¹⁰Turaretitikpatana gↄrↄ pari kàkara kpɛ́lɛlɛa ń pínki, òtɛn adua kɛ.¹¹Akũ Dikiri malaikaa bò a sùa, à zɛ̀ turaretitikpataki ↄplai.¹²Kũ Zakari a è, à kɛ̀ gìri, vĩna a kũ̀.¹³Akũ malaikaa pìi pìnɛ: Ǹsun tó vĩna n kũro Zakari. Luda n wɛ́kɛ sì, n nanↄ Ɛlizabɛti ni nɛ́ i gↄ̃gbɛ̃ ũ, ǹ tↄ́ kpánɛ Yahaya.¹⁴N pↄ ni kɛ nna, ǹ yáa dↄ, gbɛ̃nↄ ni pↄnna kɛ a ina yã musu dasi,¹⁵zaakũ anigↄ̃ de Dikirinɛ gbɛ̃ zↄ̃kↄ̃ ũmɛ. Ani wɛ̃ ke í gbãna ke miro, Luda Nini nigↄ̃ kúa zaa a da gbɛrɛmmɛ.¹⁶Ani tó Isarailanↄ arɛ dↄ Dikiri ń Ludaa dasi,¹⁷ani do Dikirinɛ arɛ kũ Luda Nini gbãna kũ Iliasu vĩ yão. Ani tó denↄ lɛ́ kɛ do kũ ń nɛ́nↄ, ani tó sãyãmarisaridenↄ gbɛ̃ mananↄ ↄ̃ndↄ̃ sɛ́. Ani tó gbɛ̃nↄ gↄ̃ kú soru gũn Dikirinɛ.¹⁸Akũ Zakari pì malaikaa pìinɛ: Deran mani yã pì yãpura dↄ̃ↄ? Zaakũ mare zĩkũnaan ma ũ, akũ ma nanↄ zĩ kũ̀ dↄ.¹⁹Akũ malaikaa pìi wèa à pì: Makũmɛ Gibirilu ũ, madìgↄ̃ zɛna Luda arɛ. Àkũ mɛ́ à ma zĩ mà yã pì onnɛ, mà baaru nna pì kpánnɛ.²⁰Ǹ ma, n nɛ́nɛ ni natɛ, ĩni fↄ̃ ǹ yã oro ari yã pì gɛ́ kɛo, kũ ńdi ma yã kũ ani kɛ a gↄrↄa síro yãi.²¹Gↄrↄ kũ̀a sↄ̃ òtɛn Zakari dã. A gìkɛnaa Luda kpɛ́n bò ń sarɛ.²²Kũ à bò, adi fↄ̃ à yã ò kũńworo, akũ ò dↄ̃̀ kũ à wɛ́gupu è Luda kpɛ́n. Lákũ a nɛ́nɛ nàtɛ nà, akũ àtɛn yã ońnɛ kũ ↄo.²³Kũ Zakari sa'ogↄrↄ pàpa, akũ à tà bɛ.²⁴Abire gbɛra a nanↄ Ɛlizabɛti nↄ̀ↄ sì, akũ à a zĩda ùtɛ ari mↄ sↄↄro à pì:²⁵Dikiri yã dí kɛ̀mɛnɛ, à ma wɛ̃nda gwà, à ma bo wé'iyãn.

Malaika gĩnakɛ à Yesu ina yã'onaa

²⁶A mↄ suddode gũn Luda malaika Gibirilu zĩ̀ Galili lakutu kũ òdi pi Nazɛra gũn.²⁷À gɛ̀ɛ nↄkpare bũnu kũ a tↄ́n Mariama kĩnaa. À gↄ̃kpamma vĩ Dauda buri ũ. A tↄ́n Yusufu.²⁸Kũ malaikaa pìi gɛ̃̀ a kĩnaa, à pìnɛ: Fↄↄ arubarikade! Dikiri kú kũnwo.²⁹Mariama bídi kɛ̀ manamana yã pìia, à laasun lɛ̀ à pì: Fↄↄ bire mì de deraa?³⁰Akũ malaikaa pìi pìnɛ:Mariama, ǹsun tó vĩna n kũro,zaakũ Luda gbɛ̃kɛ kɛ̀nnɛmɛ.³¹Ǹ ma! Ĩni nↄ̀ sí ǹ nɛ́ i gↄ̃gbɛ̃ ũ,ǹ tↄ́ kpánɛ Yesu.³²Anigↄ̃ de gbɛ̃ zↄ̃kↄ̃ ũ,oni a sísi Luda Musude Nɛ́.Dikiri Luda ni a káa dizi Dauda kpatan,³³anigↄ̃ kí ble Yakubu burinↄa gↄrↄ sĩnda pínki,a kíblena nigↄ̃ lakana vĩro.³⁴Akũ Mariama pì malaikaa pìinɛ: Mádi gↄ̃gbɛ̃ dↄ̃ zikiro, abirekũ ni sí kɛ deraa?³⁵Malaikaa wèa à pì:Luda Nini ni summa,Luda Musude gbãna ni danla.Abire yãi nɛ́ kũ ĩni i pì kunna nigↄ̃ adona,oni a sísi Luda Nɛ́.³⁶N danɛ Ɛlizabɛti nɛ́gↄ̃gbɛ̃ nↄ̀sina se a zĩkũnaa gũn. Nↄgbɛ̃ kũ ò dìtɛ para ũ pì kú kũ nↄ̀ mↄ suddoo tera.³⁷Zaakũ Luda kĩnaan pↄ́ sĩnda pínki dì sí kɛn.³⁸Akũ Mariama pì: Dikiri zↄ̀bleriin ma ũ. À kɛmɛnɛ lákũ n ò nà. Akũ malaikaa pìi tà à a tòn.

Mariama gɛna Ɛlizabɛti kĩnaa

³⁹Gↄrↄ kũ̀a Mariama fùtɛ à gɛ̀ɛ lakutu kũ à kú Yudea bùsu gusĩsĩden gↄ̃̀nↄ.⁴⁰À gɛ̀ɛ Zakari bɛa, akũ à fↄ kpà Ɛlizabɛtia.⁴¹Kũ Ɛlizabɛti Mariama fↄↄ pìi mà, a nɛ́ vĩ̀ a gbɛrɛ gũn, akũ Luda Nini sù Ɛlizabɛtia,⁴²à wiki gbãna lɛ̀ à pì: Arubarikademɛ n ũ de nↄgbɛ̃ sĩnda pínkila. Arubarikaden nɛ́ kũ à kú n gbɛrɛn ũ dↄ.⁴³Bↄ́n ma ũ, kũ ma Dikiri da sù ma gwaa?⁴⁴Gↄrↄ kũ ma n fↄkpammanaa mà dé, nɛ́ kũ à kú ma gbɛrɛn vĩ̀ kũ pↄnnaomɛ.⁴⁵Arubarikademɛ n ũ, mↄkↄ̃n kũ n yã kũ Dikiri ònnɛ sì, kũ ani kɛ.

Mariama Dikiri tↄ́ sɛna lei

⁴⁶Akũ Mariama pì:Matɛn Dikiri tↄ́ sɛ́ lei ma swɛ̃̀ɛ gũn,⁴⁷ma pↄ tɛn kɛ nnaLuda ma Surabariia,⁴⁸zaakũ à ma yã dà,makũ a zↄ̀bleri kũ mádi ká pↄ́ke ũro.Zaa tera ari gↄrↄ sĩnda pínki oni pimɛnɛ arubarikademɛ,⁴⁹zaakũ Luda gbãnade yã zↄ̃kↄ̃ↄ kɛ̀mɛnɛ.A tↄ́ kú adona.⁵⁰Àdi wɛ̃nda dↄ̃ gbɛ̃ kũ òdi a vĩna kɛnↄnɛari ń buria.⁵¹À a gã̀a pòro, à a gbãna mↄ̀ńnɛ,à zĩdabirinↄ fã̀kↄ̃a kũ ń laasunnↄ.⁵²À gbãnadenↄ bò kpatan,à talakanↄ sɛ̀ lei.⁵³À pↄ mananↄ kpà nàdɛrinↄa ò kã̀,ama à ↄgↄdenↄ gbàrɛ ↄkori.⁵⁴À kpà a zↄ̀bleri Isarailanↄi,ń yã dí sãaguro.⁵⁵À wɛ̃nda dↄ̃̀ Ibrahĩnɛ kũ a buri pìnↄlákũ à ò ó dizinↄnɛ nà.⁵⁶Mariama vùtɛ kũ Ɛlizabɛtio lán mↄ aakↄ̃ bà, akũ à ɛ̀ra bɛ.

Yahaya Da'itɛkɛri inaa

⁵⁷Ɛlizabɛti nɛ́'igↄrↄ kà, akũ à nɛ́ ì gↄ̃gbɛ̃ ũ.⁵⁸Kũ a fárandidenↄ kũ a danɛnↄ mà lákũ Dikiri a wɛ̃nda gwà nà, ò pↄnna kɛ̀ kãao.⁵⁹A gↄrↄ sↄraakↄ̃de zĩ ò sù tↄ̃̀ zↄ̃ nɛ́ pìinɛ, de ò a de Zakari tↄ́ kpánɛ,⁶⁰akũ a da pì: Oi! Oni a sísi Yahayamɛ.⁶¹Ò pìnɛ: Gbɛ̃ke kú n danɛnↄ tɛ́ kũ à tↄ́ bire vĩro.⁶²Akũ ò yã ò a denɛ kũ ↄo, de ò dↄ̃ deran à ye ò tↄ́ kpánɛ nà.⁶³Zakari anlo gbɛ̀ka, akũ à kɛ̃̀a: A tↄ́n Yahaya. Yã pìi bò ń sarɛ ń pínki.⁶⁴Gwe gↄ̃̀nↄ a nɛ́nɛ sɛ̀ lei, à lɛ́ bò àtɛn yã o, àtɛn Luda sáabu kpá.⁶⁵Akũ vĩna ń fárandidenↄ kũ̀ ń pínki, akũ Yudea bùsu gusĩsĩde gbɛ̃nↄ tɛn yã pì o ń pínki.⁶⁶Akũ gbɛ̃ kũ ò yã pìi mànↄ kũna ń nɛ̀sɛɛ gũn ò pì: Bↄ́n nɛ́ pì nigↄ̃ de a ũ ziaa? Zaakũ Dikiri ↄ kúa.

Zakari annabikɛyã'onaa

⁶⁷Luda Nini sù a de Zakaria, akũ à annabikɛyã ò à pì:⁶⁸Ò Dikiri Isarailanↄ Luda sáabu kpá!À sù à a gbɛ̃nↄ bò.⁶⁹À Surabari gbãnade bòwɛrɛa zↄ̀bleri Dauda buri tɛ́,⁷⁰lákũ à ò a annabinↄ gãi nà zaa gìkɛna.⁷¹Ò pì ani ó sí ó ibɛrɛnↄa,ani ó bo gbɛ̃ kũ ò zã̀ógu pìnↄ ↄĩ.⁷²Lɛmɛ à ó dizinↄ wɛ̃nda gwà lɛ,a bàka kunna kũńwo yã dí sãaguro.⁷³À la dà ó dizi Ibrahĩnɛ⁷⁴à pì áni ó bo ó ibɛrɛnↄ ↄĩ,áni ó gba zɛ́ ò doarɛ vĩna sari,⁷⁵de ó kunna gↄ̃nɛ adona gbɛ̃ mananↄ ũari ó wɛ̃̀ndi lɛ́n.⁷⁶Mↄkↄ̃n sↄ̃ ma nɛ́,oni n sísi Luda Musude annabii,zaakũ mↄkↄ̃n mɛ́ ĩni do Dikirinɛ arɛ ǹ zɛ́ kɛkɛnɛ.⁷⁷Ĩni tó a gbɛ̃nↄ dↄ̃ lákũ ani ń sura ba nà,lákũ ani ń durunnanↄ kɛ̃ḿma nà.⁷⁸Zaakũ ó Luda sùru vĩ,bonaa musu ani su ó gwa lán gudↄnaa bà,⁷⁹de à gu pu gbɛ̃ kũ ò kú gusira gũnnↄnɛkũ gbɛ̃ kũ ò kú ga lɛ́inↄ,de à ó gbá da aafia zɛ́n.⁸⁰Nɛ́ pì zↄ̃kↄ̃ kũ̀, à gↄ̃̀ kãgbãnade ũ. A kú gbárannan ari gↄrↄ kũ à bò Isarailanↄnɛ gupuraa.