1Inna SIDI i Musa: “Siweř ak-d ikehhanen, arraw n Harun, uca ini asen: ‘War iɛeddeř i uřa d ijj zzaywem ad issexmej ixef nnes s ijj n umettin jar řgens nnes.2mɣir s raǧ nnes yudsen, s yemmas niɣ s babas niɣ s mmis niɣ s yeǧis niɣ s umas.3Uřa s učmas nni d taɛzarct, tenni d řaǧ nnes yudsen u war ɣares tuɣi weryaz, aqa iɛeddeř ad zzayes issexmej ixef nnes.4Bab n taddart war issxemmaj ixef nnes jar řgens nnes. S uya ittwaf issexsar ixef nnes.”5“War tteggen ca n wemcan iquccar x izeǧif nsen, u war ttḥeffin ṭṭarf n tmart nsen u war carrḍen acarreḍ deg weysum nsen.6Ad iřin d imqeddasen i AREBBI nsen uca war feṭṭḥen Isem n AREBBI nsen, minzi aqa d nitni i ittawyen tiwhibin n tmessi ɣar AREBBI, tinni d macca n AREBBI nsen. S uya ad iřin d imqeddasen.7War iɛeddeř ad awyen tamɣart nni iǧan d lfasda niɣ icten tᵉttwaɣṣeb. Uřa d ict n temɣart nni ittwaǧfen zeg weryaz nnes, war tt ttiwyen, minzi akehhan d amqeddas i AREBBI nnes.8Ad t tḥesbed d amqeddas, minzi netta ittawi macca n AREBBI nnec. Ad yiři d amqeddas i cek, minzi Necc d amqeddas, Necc d SIDI wenni kenniw issqeddsen.”9“Mařa yeǧis n ijj n weryaz nni iǧan d akehhan tessefḍeḥ ixef nnes s farq-ccɣeř nnes, xenni aqa tessefḍeḥ babas uca ittxeṣṣa as ad tᵉttwassecmeḍ s tmessi.”10“Arrays n ikehhanen jar aytmas, wenni x uzeǧif nnes tᵉttwafarreɣ zzect n wedhan u wenni ittwařeqqmen, maḥend ad yarḍ arruḍ n ukehhan, netta war izemmar ad iḍřeq i ucuwwaf x uzeǧif nnes niɣ ad icarreg arruḍ nnes.11War iɛeddeř ad dd-iqarreb ɣar ijj n umettin, ɛad s babas d yemmas war iɛeddeř ad issexmej ixef nnes.12War itteffeɣ zi Zzawect Iqeddsen, ḥima war issexsara Zzawect Iqeddsen n AREBBI, minzi ttaj n weɛzař n zzect n wedhan n AREBBI nnes aqa-t xas. Necc d SIDI!13Ad yawi ict n teɛzarect d tamɣart.14War ittiwi tajjač niɣ taneǧaft niɣ tenni ittwaɣeṣben d tamɣart, maca ad yawi ict n teɛzarect zi řgens nnes d tamɣart.15War issexsara zzariɛet nnes jar řgens nnes, minzi Necc d SIDI, wenni t issqeddsen.”16Issiweř SIDI ak-d Musa, inna:17“Siweř ak-d Harun, ini: ‘Uřa d ijj zi zzariɛet nnec di marra jjiřat nsen i di iǧa ca n uneɛḍab, ad dd-iqarreb, ḥima ad yawi macca n tewhibt n AREBBI nnes.18Minzi uřa d ijj n weryaz war dd-ittqarrib ca s yijj n řɛib, ma d adarɣař i iǧa niɣ d aqidar niɣ s ca war iḥři niɣ ɣares ṣṣifet tfarɣ19niɣ ijj n weryaz yarẓ as uḍar niɣ afus20niɣ bu-teɛrurt niɣ ḥed yařwes di ca n yijj n ttejjař niɣ s ict n tiṭṭ tuff niɣ s jdam niɣ s ict n ccamet texsar niɣ s iqeǧařen idgedgen.21War iɛeddeř i uřa d ijj n weryaz zi zzariɛet n ukehhan Harun, wenni di iǧa ca n řɛib, ad ireḥḥeg, maḥend ad iqeddem tiwhibin n tmessi n SIDI. Aqa dayes aneɛḍab, war izemmar ad iffeɣ maḥend ad iqeddem macca n tewhibt n AREBBI nnes.22Zi macca n tewhibt n AREBBI nnes iɛeddeř ad zzayes yecc, am zi min iǧan iqeddsen qaɛ am zi min iqeddsen.23Maca war iɛeddeř ad dd-iqarreb ɣar uřeḥḥaf uřa ɣar uɛalṭar, minzi dayes ict n uneɛḍab, ḥima war issexsara Tizawiyyin Iqeddsen inu, minzi Necc d SIDI wenni ten issqeddsen.’”24Ammu i issiweř Musa ak-d Harun u ak-d warraw nnes u ak-d marra ayt n Israil.