إِلَاوِييّنْ21rif_ati

أَسِيزْذڭْ ن إِكهَّاننْ

1إِنَّا سِيذِي إِ مُوسَا: ”سِيوڒْ أَكْ-ذ إِكهَّاننْ، أَرَّاوْ ن هَارُونْ، ؤُشَا إِنِي أَسنْ: ’وَارْ إِعدّڒْ إِ ؤُڒَا ذ إِجّْ زَّايْومْ أَذْ إِسّخْمجْ إِخفْ نّسْ س إِجّْ ن ؤُمتِّينْ جَارْ ڒْڭنْسْ نّسْ.2مْغِيرْ س رَادْجْ نّسْ يُوذْسنْ، س يمَّاسْ نِيغْ س بَابَاسْ نِيغْ س مِّيسْ نِيغْ س يدْجِيسْ نِيغْ س ؤُمَاسْ.3ؤُڒَا س ؤُتْشْمَاسْ نِّي ذ ثَاعْزَارْشْثْ، ثنِّي ذ ڒَادْجْ نّسْ يُوذْسنْ ؤُ وَارْ غَارسْ ثُوغِي ورْيَازْ، أَقَا إِعدّڒْ أَذْ زَّايسْ إِسّخْمجْ إِخفْ نّسْ.4بَابْ ن ثَادَّارْثْ وَارْ إِسّْخمَّاجْ إِخفْ نّسْ جَارْ ڒْڭنْسْ نّسْ. س ؤُيَا إِتّْوَافْ إِسّخْسَارْ إِخفْ نّسْ.“5”وَارْ تّڭّنْ شَا ن ومْشَانْ إِقُوشَّارْ خْ إِزدْجِيفْ نْسنْ، ؤُ وَارْ تّْحفِّينْ طَّارْفْ ن ثْمَارْثْ نْسنْ ؤُ وَارْ شَارّْضنْ أَشَارّضْ ذڭْ ويْسُومْ نْسنْ.6أَذْ إِڒِينْ ذ إِمْقدَّاسنْ إِ أَربِّي نْسنْ ؤُشَا وَارْ فطّْحنْ إِسمْ ن أَربِّي نْسنْ، مِينْزِي أَقَا ذ نِيثْنِي إِ إِتَّاوْينْ ثِيوْهِيبِينْ ن ثْمسِّي غَارْ أَربِّي، ثِينِّي ذ مَاشَّا ن أَربِّي نْسنْ. س ؤُيَا أَذْ إِڒِينْ ذ إِمْقدَّاسنْ.7وَارْ إِعدّڒْ أَذْ أَوْينْ ثَامْغَارْثْ نِّي إِدْجَانْ ذ لْفَاسْذَا نِيغْ إِشْثنْ ثتّْوَاغْصبْ. ؤُڒَا ذ إِشْثْ ن ثمْغَارْثْ نِّي إِتّْوَادْجْفنْ زڭْ ورْيَازْ نّسْ، وَارْ ت تِّيوْينْ، مِينْزِي أَكهَّانْ ذ أَمْقدَّاسْ إِ أَربِّي نّسْ.8أَذْ ث ثْحسْبذْ ذ أَمْقدَّاسْ، مِينْزِي نتَّا إِتَّاوِي مَاشَّا ن أَربِّي نّشْ. أَذْ يِيڒِي ذ أَمْقدَّاسْ إِ شكْ، مِينْزِي نشّْ ذ أَمْقدَّاسْ، نشّْ ذ سِيذِي ونِّي كنِّيوْ إِسّْقدّْسنْ.“9”مَاڒَا يدْجِيسْ ن إِجّْ ن ورْيَازْ نِّي إِدْجَانْ ذ أَكهَّانْ ثسّفْضحْ إِخفْ نّسْ س فَارْقْ-شّْغڒْ نّسْ، خنِّي أَقَا ثسّفْضحْ بَابَاسْ ؤُشَا إِتّْخصَّا أَسْ أَذْ ثتّْوَاسّشْمضْ س ثْمسِّي.“10”أَرَّايْسْ ن إِكهَّاننْ جَارْ أَيْثْمَاسْ، ونِّي خْ ؤُزدْجِيفْ نّسْ ثتّْوَافَارّغْ زّشْثْ ن وذْهَانْ ؤُ ونِّي إِتّْوَاڒقّْمنْ، مَاحنْذْ أَذْ يَارْضْ أَرُّوضْ ن ؤُكهَّانْ، نتَّا وَارْ إِزمَّارْ أَذْ إِضْڒقْ إِ ؤُشُوَّافْ خْ ؤُزدْجِيفْ نّسْ نِيغْ أَذْ إِشَارّڭْ أَرُّوضْ نّسْ.11وَارْ إِعدّڒْ أَذْ د-إِقَارّبْ غَارْ إِجّْ ن ؤُمتِّينْ، عَاذْ س بَابَاسْ ذ يمَّاسْ وَارْ إِعدّڒْ أَذْ إِسّخْمجْ إِخفْ نّسْ.12وَارْ إِتّفّغْ زِي زَّاوشْثْ إِقدّْسنْ، حِيمَا وَارْ إِسّخْسَارَا زَّاوشْثْ إِقدّْسنْ ن أَربِّي، مِينْزِي تَّاجْ ن وعْزَاڒْ ن زّشْثْ ن وذْهَانْ ن أَربِّي نّسْ أَقَا-ث خَاسْ. نشّْ ذ سِيذِي!13أَذْ يَاوِي إِشْثْ ن ثعْزَارشْثْ ذ ثَامْغَارْثْ.14وَارْ إِتِّيوِي ثَاجَّاتْشْ نِيغْ ثَاندْجَافْثْ نِيغْ ثنِّي إِتّْوَاغصْبنْ ذ ثَامْغَارْثْ، مَاشَا أَذْ يَاوِي إِشْثْ ن ثعْزَارشْثْ زِي ڒْڭنْسْ نّسْ ذ ثَامْغَارْثْ.15وَارْ إِسّخْسَارَا زَّارِيعثْ نّسْ جَارْ ڒْڭنْسْ نّسْ، مِينْزِي نشّْ ذ سِيذِي، ونِّي ث إِسّْقدّْسنْ.“
16إِسِّيوڒْ سِيذِي أَكْ-ذ مُوسَا، إِنَّا:17”سِيوڒْ أَكْ-ذ هَارُونْ، إِنِي: ’ؤُڒَا ذ إِجّْ زِي زَّارِيعثْ نّشْ ذِي مَارَّا جِّيڒَاثْ نْسنْ إِ ذِي إِدْجَا شَا ن ؤُنعْضَابْ، أَذْ د-إِقَارّبْ، حِيمَا أَذْ يَاوِي مَاشَّا ن ثوْهِيبْثْ ن أَربِّي نّسْ.18مِينْزِي ؤُڒَا ذ إِجّْ ن ورْيَازْ وَارْ د-إِتّْقَارِّيبْ شَا س يِيجّْ ن ڒْعِيبْ، مَا ذ أَذَارْغَاڒْ إِ إِدْجَا نِيغْ ذ أَقِيذَارْ نِيغْ س شَا وَارْ إِحْڒِي نِيغْ غَارسْ صِّيفثْ ثْفَارْغْ19نِيغْ إِجّْ ن ورْيَازْ يَارْژْ أَسْ ؤُضَارْ نِيغْ أَفُوسْ20نِيغْ بُو-ثعْرُورْثْ نِيغْ حذْ يَاڒْوسْ ذِي شَا ن يِيجّْ ن تّجَّاڒْ نِيغْ س إِشْثْ ن ثِيطّْ ثُوفّْ نِيغْ س جْذَامْ نِيغْ س إِشْثْ ن شَّامثْ ثخْسَارْ نِيغْ س إِقدْجَاڒنْ إِذْڭذْڭنْ.21وَارْ إِعدّڒْ إِ ؤُڒَا ذ إِجّْ ن ورْيَازْ زِي زَّارِيعثْ ن ؤُكهَّانْ هَارُونْ، ونِّي ذِي إِدْجَا شَا ن ڒْعِيبْ، أَذْ إِرحّڭْ، مَاحنْذْ أَذْ إِقدّمْ ثِيوْهِيبِينْ ن ثْمسِّي ن سِيذِي. أَقَا ذَايسْ أَنعْضَابْ، وَارْ إِزمَّارْ أَذْ إِفّغْ مَاحنْذْ أَذْ إِقدّمْ مَاشَّا ن ثوْهِيبْثْ ن أَربِّي نّسْ.22زِي مَاشَّا ن ثوْهِيبْثْ ن أَربِّي نّسْ إِعدّڒْ أَذْ زَّايسْ يشّْ، أَمْ زِي مِينْ إِدْجَانْ إِقدّْسنْ قَاعْ أَمْ زِي مِينْ إِقدّْسنْ.23مَاشَا وَارْ إِعدّڒْ أَذْ د-إِقَارّبْ غَارْ ؤُڒحَّافْ ؤُڒَا غَارْ ؤُعَالْطَارْ، مِينْزِي ذَايسْ إِشْثْ ن ؤُنعْضَابْ، حِيمَا وَارْ إِسّخْسَارَا ثِيزَاوِييِّينْ إِقدّْسنْ إِنُو، مِينْزِي نشّْ ذ سِيذِي ونِّي ثنْ إِسّْقدّْسنْ.‘ “24أَمُّو إِ إِسِّيوڒْ مُوسَا أَكْ-ذ هَارُونْ ؤُ أَكْ-ذ وَارَّاوْ نّسْ ؤُ أَكْ-ذ مَارَّا أَيْثْ ن إِسْرَائِيل.
expand_more
Search