ካ ያርሾ
1ኦንካ ካ ያርሾ ጎዳስ ያርሽያ ዎደ ሄ ያርሾይ ሎኦ ለ ግዶ፤ እያ ቦላ ዛይተነ እፃነ ጉጆ።2ሄሳ ካህነ ግድዳ አሮና ናይታኮ ኤሆ፤ ካህነት ሄ ሎኦ ልያፈ እስ ኩጫ ኤክድ፥ ዛይተነ እፃነ ኡባ ጉጅድ ያርሾ በሳ ቦላ ታማን ፁጎ። ሄስ ጎዳስ ታማን ፁገትያ ሳዎ ቶንኩ ግያ ቆፍሶ ያርሾ ግዳና።3ካ ያርሹዋፈ አትዳይስ አሮናስነ እያ ናይታስ ግዳና። ሄስ ጎዳስ ታማን ፁገትዳ ኡባፈ ጌሻ ያርሾ ግዳና።4ያርሸትያ ኡይይ ጮጨን ኮምፐትዳ ግድኮ፥ ዛይተራ ሙኑቀትዳ ሎኦ ለ ግዶ። ሄ ኡይይ እርሾይ ባይና ዛይተን ሙኑቀትዳይሳ ዎይኮ ሌኦን ኡከትድ ዛይተን ትየትዳይሳ ግዶ።5ያርሸትያ ኡይይ በሸን ኡከትዳባ ግድኮ፥ እርሾይ ባይና ዛይተን ሙኑቀትዳ ሎኦ ለ ግዶ።6እያ መንዳ እያ ቦላ ዛይተ ትጋዳ ካ ያርሾ ኦዳ ያርሻ።7ነ ያርሽያ ካይ ኦቶን ካፅዳባ ግድኮ ዛይተን ሙኑቀትዳ ሎኦ ለ ግዶ።8ሄሳዳ ሀንድ ጊግዳ ካ ያርሹዋ ጎዳስ ኤሀዳ ካህንያስ እማ፤ ካህነይ ሄሳ ኤክድ ያርሾ በሳን ያርሾ።9ካህነይ ሄ ካ ያርሹዋ ኤክድ፥ ያርሾ በሳን ፁሳ ያርሾ ኦድ ታማን ፁጎ። ሄስ ጎዳስ ታማን ፁገትያ ሳዎ ቶንኩ ግያ ቆፍሶ ያርሾ ግዳና።10ካ ያርሹዋፈ አትዳይስ አሮናስነ እያ ናይታስ ግዳና። ሄስ ጎዳስ ታማን ፁገትዳ ኡባፈ ጌሻ ያርሾ ግዳና።11ኔኒ እርሾ ዎይኮ ኤስ ጎዳስ ታማን ፁጋዳ ያርሻናዉ በሶና ግሾ ጎዳስ ህንተ ኤህያ ካ ያርሾይ እርሾይ ደእያባ ግዶፖ።12ሀይሳታ ባይራ ያርሾ ኦድ ጎዳስ ያርሻናዉ ዳንዳኤታ፥ ሽን ሳዎ ቶንኩ ግያ ያርሾ ኦድ ጎዳስ ያርሾ በሳን ፁጎፍተ።13ማፅነይ፥ ኔኒ ነ ፆሳራ ጫቅዳ ጫቁዋስ ማላ ግድያ ግሾ ነ ካ ያርሾ ኡባን ማፅነ የጋ። ነ ካ ያርሾ ኡባ ማፅነን ማልኤ።14ኔኒ ካፈ ባይራ ጎዳስ ኤህያ ዎደ ጫጨትድ ሽርከትዳ ትያ ግዳናዉ በሴስ።15ሄስ ካ ያርሾ ግድያ ግሾ እያ ቦላ ዛይተ ትጋ፤ እፃነ ዎ።16ካህነይ ሄ ጫጨትድ ሽርከትዳነ ዛይተይ ትገትዳ ካ ያርሹዋፈ ባጋ ኤክድ እፃነ ኡባራ ቆፍሶ ያርሾ ኦድ ጎዳስ ታማን ፁጎ።