ⵉⵥⵍⴰⵏ ⵙ ⵉⴳⴻⵊⴷⵓⵔⴻⵏ4rif_tti

ⵉⵣⵍⵉ ⵡⵉⵙⵙ ⴰⵔⴻⴱⵄⴰ - ⵍⵎⵓⵄⵚⵉⵢⵢⴻⵜ ⵏ ⵢⴻⴵⵉⵙ ⵏ ⵓⵔⵛⴰⵍⵉⵎ

1ⴰⵍⵉⴼ. ⵎⴰⵎⵎⴻⵛ ⵉⴳⴳⴰ ⵉⴱⴱⴰⵔⵛⴻⵏ ⵡⵓⵔⴻⵖ ⴰⵎⵎⵓ, ⵎⴰⵎⵎⴻⵛ ⵉⴱⴻⴷⴷⴻⵍ ⵡⵓⵔⴻⵖ ⵉⵛⵏⴰ ⵇⴰⵄ ⴰⵎⵎⵓ! ⵎⴰⵎⵎⴻⵛ ⵜⵜⵡⴰⴱⴻⵣⵣⵄⴻⵏ ⵉⵥⵔⴰ ⵏ ⵣⵣⴰⵡⴻⵛⵜ ⵉⵇⴻⴷⴷⵙⴻⵏ ⵅ ⵜⵖⴻⵎⵎⵓⵔⴰ ⵏ ⵉⴱⵔⵉⴷⴻⵏ!
2ⴱⵉⵜ. ⵉⵃⴻⵏⵊⵉⵔⴻⵏ ⵉⵖⵍⴰⵏ ⵏ ⵚⵉⵀⵢⵓⵏ ⵜⵜⵡⴰⵃⴻⵙⴱⴻⵏ ⴰⵎ ⵡⵓⵔⴻⵖ ⵉⵇⵇⵓⵔⴻⵏ. ⵎⴰⵎⵎⴻⵛ ⴷ ⴰⵙⴻⵏ ⵜⵜⴻⴳⴳⴻⵏ ⵍⴻⵅⵅⵓ ⴰⵎ ⵢⵉⵖⴰⵔⵔⴰⴼⴻⵏ ⵏ ⵜⵍⴰⵅⵜ, ⴰⵎ ⵍⵅⴻⴷⵎⴻⵜ ⵏ ⴱⵓ-ⵜⵍⴰⵅⵜ!
3ⴳⵉⵎⴻⵍ. ⵄⴰⴷ ⵜⵓⵛⵛⴰⵏⵉⵏ ⵏ ⵍⴻⵅⵍⴰ ⵉ ⴷⴷ-ⵉⵙⵙⵓⴼⴼⵖⴻⵏ ⵜⵉⴱⴱⵉⵛⵉⵏ, ⵙⵙⵓⵟⵟⵓⴹⴻⵏⵜ ⵉⵎⴻⵥⵢⴰⵏⴻⵏ ⵏⵙⴻⵏⵜ, ⵎⴰⵛⴰ ⵢⴻⴵⵉⵙ ⵏ ⵍⴳⴻⵏⵙ ⵉⵏⵓ ⵜⴻⴷⵡⴻⵍ ⵜⴻⵡⵄⴰⵔ, ⴰⵎ ⵏⵏⵄⴰⵎⴰⵜ ⴷⵉ ⵍⴻⵅⵍⴰ.
4ⴷⴰⵍⵉⵜ. ⵉⵍⴻⵙ ⵏ ⵡⴻⵃⴹⵉⴹ ⵉⵍⵚⴻⵇ ⵖⴰⵔ ⵡⴰⵏⴻⵖ ⵏⵏⴻⵙ ⵙ ⵓⴼⴰⴷⵉ, ⵉⵃⴻⵏⵊⵉⵔⴻⵏ ⵉⵎⴻⵥⵢⴰⵏⴻⵏ ⵜᵉⵜⵜⴰⵔⴻⵏ ⴰⵖⵔⵓⵎ, ⵎⴰⵛⴰ ⵓⵍⴰ ⴷ ⵉⵊⵊⴻⵏ ⵡⴰⵔ ⴷ ⴰⵙⴻⵏ ⵜ ⵢⴻⴱⴹⵉ.
5ⵀⵉ. ⵉⵏⵏⵉ ⵜⵓⵖⴰ ⵉⵜⵜⴻⵜⵜⴻⵏ ⵣⵉⵛ ⵎⴰⵛⵛⴰ ⵉⵍⴻⴷⴷⴻⵏ, ⵖⴰⵛⴰⵏ ⴷⴻⴳ ⵉⴱⵔⵉⴷⴻⵏ, ⵉⵏⵏⵉ ⵉⵜⵜⵡⴰⵙⵙⴻⵢⵎⴻⵏ ⴷⴻⴳ ⵡⴰⵔⵔⵓⴹ ⴰⵣⴻⴳⴳⵯⴰⵖ ⵉⵃⴻⴷⵇⴻⵏ, ⵃⴻⵏⵏⴹⴻⵏ ⵍⴻⵅⵅⵓ ⴷⵉ ⵍⴻⵖⴱⴰⵔ.
6ⵡⴰⵡ. ⵍⵎⵓⵄⵚⵉⵢⵢⴻⵜ ⵏ ⵢⴻⴵⵉⵙ ⵏ ⵍⴳⴻⵏⵙ ⵉⵏⵓ ⴷ ⵜⴰⵎⴻⵇⵇⵔⴰⵏⵜ ⵅ ⴷⴷⵏⵓⴱ ⵏ ⵜⴻⵏⴷⵉⵏⵜ ⵏ ⵙⴰⴷⵓⵎ, ⵜⴻⵏⵏⵉ ⵉⵏⵇⴻⵍⴱⴻⵏ ⴷⴻⴳ ⵉⵊⵊ ⵏ ⵓⵎⵓⵔ, ⴱⵍⴰ ⵜⵜⵙⴰⵅⵅⵓⵔ ⵏ ⵉⴼⴰⵙⵙⴻⵏ.
7ⵣⴰⵢⵉⵏ. ⵜⵓⵖⴰ ⵜⴰⵔⵡⴰ ⵏ ⵜⴰⵚⵉⵍⴻⵜ ⵏⵏⴻⵙ ⵚⴼⴰⵏ ⵅ ⵡⴻⴷⴼⴻⵍ, ⴷ ⵉⵛⴻⵎⵍⴰⵍⴻⵏ ⵅ ⵓⵖⵉ, ⴰⵔⵔⵉⵎⴰⵜ ⵏⵙⴻⵏ ⵣⴻⵡⵖⴻⵏ ⵅ ⵍⵎⴰⵔⵊⴰⵏ, ⴰⴷⴷⵓⴷ ⵏⵙⴻⵏ ⵢⴰⵔⴻⵇⵇ ⴰⵎ ⵚⴰⴼⴼⵉⵔ ⴰⵣⵉⵣⴰ.
8ⵅⵉⵜ. ⵍⴻⵅⵅⵓ ⵉⴱⴻⴷⴷⴻⵍ ⵡⴰⴷⴷⵓⴷ ⵏⵙⴻⵏ, ⵉⴷⵡⴻⵍ ⴷ ⴰⴱⴰⵔⵛⴰⵏ ⵅ ⵜⴰⴵⴻⵙⵜ, ⵡⴰⵔ ⵜⵜⵡⴰⵄⵇⵉⵍⴻⵏ ⴷⴻⴳ ⵉⴱⵔⵉⴷⴻⵏ ⵄⴰⴷ. ⵜⵉⵍⵎⴻⵛⵜ ⵏⵙⴻⵏ ⵜⴻⵍⵚⴻⵇ ⵅ ⵢⴻⵖⵙⴰⵏ ⵏⵙⴻⵏ, ⵜⵓⵥⴻⵖ, ⵜⴻⴷⵡⴻⵍ ⴰⵎ ⵓⴽⴻⵛⵛⵓⴹ.
9ⵜⵉⵜ. ⵉⵃⵍⴰ ⵉⵏⵏⵉ ⵉⵜⵜⵡⴰⵏⵖⴻⵏ ⵙ ⵙⵙⵉⴼ, ⵅ ⵢⵉⵏⵏⵉ ⵉⵜⵜⵡⴰⵏⵖⴻⵏ ⵙ ⵍⴰⵥ, ⵎⴰⵖⴰⵔ ⵏⵉⵜⵏⵉ ⴰⴷ ⴼⴻⵙⵢⴻⵏ, ⵜⵜⵡⴰⵍⴻⵇⴼⴻⵏ ⵙ ⵡⴻⵏⵇⴰⵙ ⵏ ⵚⵚⴰⴱⴻⵜ ⵏ ⵢⴻⵢⵢⴰⵔ.
10ⵢⵓⴷ. ⵉⴼⴰⵙⵙⴻⵏ ⵏ ⵜⴻⵎⵖⴰⵔⵉⵏ ⵏⵏⵉ ⵜⵓⵖⴰ ⵉⵜⵜⵃⵉⵏⵏⴰⵏ ⵇⴱⴻⵍ, ⵙⵙⵏⴻⵏⵏⴰⵏ ⵉ ⵉⵃⴻⵏⵊⵉⵔⴻⵏ ⵏⵙⴻⵏ. ⵏⵉⵜⵏⵉ ⴷⴻⵡⵍⴻⵏ ⴰⵙⴻⵏⵜ ⴷ ⵎⴰⵛⵛⴰ, ⵣⵉ ⵙⵙⵉⴱⴱⴻⵜ ⵏ ⵜⵔⴻⵥⵥⵉⵜ ⵏ ⵢⴻⴵⵉⵙ ⵏ ⵍⴳⴻⵏⵙ ⵉⵏⵓ.
11ⴽⴰⴼ. ⵙⵉⴷⵉ ⵢⴰⵔⵅⵓ ⵉ ⵡⴻⵙⵄⴰⵔ ⵏⵏⴻⵙ, ⵉⵙⵙⴼⴰⵔⵔⴻⵖ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵙ. ⵏⴻⵜⵜⴰ ⵉⵙⵙⴰⵔⵖ ⵜⵉⵎⴻⵙⵙⵉ ⴷⵉ ⵚⵉⵀⵢⵓⵏ, ⵜⵉⵎⴻⵙⵙⵉ ⵜⴻⵏⵏⵉ ⵉⵛⵛⴻⵏ ⴷⵙⵓⵙⴰ ⵏⵏⴻⵙ.
12ⵍⴰⵎⵉⴷ. ⵄⴻⵎⵎⴰⵔⵚ ⵡⴰⵔ ⵜᵉⵜⵜⵖⵉⵍ ⵉ ⵉⵊⴻⴵⵉⴷⴻⵏ ⵏ ⵜⴻⵎⵎⵓⵔⵜ ⴷ ⵉⵎⴻⵣⴷⴰⵖ ⵏ ⴷⴷⵓⵏⴻⵛⵜ, ⴰⵇⴰ ⴰⵖⵔⵉⵎ ⴷ ⵍⴻⵄⴷⵓ ⴰⴷ ⴷⴷ-ⴰⴷⴼⴻⵏ ⵖⴰⵔ ⵜⴻⵡⵡⵓⵔⴰ ⵏ ⵓⵔⵛⴰⵍⵉⵎ.
13ⵎⵉⵎ. ⴷ ⵎⴰⵏ ⴰⵢⴰ ⴷⵉ ⵙⵙⵉⴱⴱⴻⵜ ⵏ ⴷⴷⵏⵓⴱ ⵏ ⵉⵏⴰⴱⵉⵢⵢⴻⵏ ⵏⵏⴻⵙ, ⴷⵉ ⵙⵙⵉⴱⴱⴻⵜ ⵏ ⵍⵎⵓⵄⵚⵉⵢⵢⴻⵜ ⵏ ⵉⴽⴻⵀⵀⴰⵏⴻⵏ ⵏⵏⴻⵙ, ⵉⵏⵏⵉ ⵉⵙⵙⵉⵣⵣⵍⴻⵏ ⵉⴷⴰⵎⵎⴻⵏ ⵏ ⵉⵎⵙⴻⴳⴳⴰⴷⴻⵏ ⴷⵉ ⵍⵡⴻⵙⵟ ⵏⵏⴻⵙ.
14ⵏⵓⵏ. ⵜⴻⵜⵜⵍⵉⵄⴻⵏ ⴰⵎⴻⵛⵏⴰⵡ ⵉⴷⴰⵔⵖⴰⵍⴻⵏ ⴷⴻⴳ ⵉⴱⵔⵉⴷⴻⵏ, ⵎⴻⵙⵍⴻⵏ ⵙ ⵉⴷⴰⵎⵎⴻⵏ, ⴰⵍⴰⵎⵉ ⵡⴰⵔ ⵉⵣⴻⵎⵎⴰⵔ ⵓⵍⴰ ⴷ ⵉⵊⵊⴻⵏ ⴰⴷ ⵉⵃⴰⴷⴰ ⴰⵔⵔⵓⴹ ⵏⵙⴻⵏ.
15ⵙⴰⵎⵉⵅ. “ⴰⴳⴳⵯⴻⵊⴻⵎ, ⴰⵇⴰ ⵉⴷⴰⵎⵎⴻⵏ ⵅⴻⵎⵊⴻⵏ!”, ⵍⴰⵖⴰⵏ ⴰⵙⴻⵏ: “ⴰⴳⴳⵯⴻⵊⴻⵎ, ⴰⴳⴳⵯⴻⵊⴻⵎ, ⵡⴰⵔ ⵜ ⵜⵜⵃⴰⴷⴰⵎ!” ⵓⵛⴰ ⵅⴻⵏⵏⵉ ⴰⵔⴻⵡⵍⴻⵏ, ⵇⵇⵉⵎⴻⵏ ⵡⴻⴷⴷⴰⵔⴻⵏ. ⵉⵜⵜⵡⴰⵏⵏⴰ ⵊⴰⵔ ⵍⴻⴳⵏⵓⵙ: “ⵡⴰⵔ ⵉⵄⴻⴷⴷⴻⵍ ⴰⴷ ⵇⵇⵉⵎⴻⵏ ⴷⵉⵏ ⵄⴰⴷ ⴽⵜⴰⵔ ⴰⵎ ⵉⴱⴰⵔⵔⴰⵏⵉⵢⵢⴻⵏ!”
16ⴱⵉ. ⴰⵖⴻⵎⴱⵓⴱ ⵏ ⵙⵉⴷⵉ ⵢⴰⵔⴻⵢⵢⴻⵛ ⵉ-ⵜⴻⵏ, ⵡⴰⵔ ⵉⵇⵇⵉⵎ ⴰⴷ ⴷⴰⵢⵙⴻⵏ ⵉⵅⵣⴰⵔ ⵄⴰⴷ. ⵜⵓⵖⴰ ⵡⴰⵔ ⵖⴰⵔⵙⴻⵏ ⴰⵡⴻⵇⵇⴰⵔ ⵉ ⵉⴽⴻⵀⵀⴰⵏⴻⵏ, ⵉⵡⴻⵙⵙⵓⵔⴰ ⵡⴰⵔ ⴷ ⴰⵙⴻⵏ ⵙⵙⴻⵛⵏⴻⵏ ⴰⵃⵉⵏⵏⵉ.
17ⵄⴰⵢⵉⵏ. ⵍⴻⴱⴷⴰ ⵜⵜⴻⴼⵛⵉⵍⴻⵏⵜ ⵜⵉⵟⵟⴰⵡⵉⵏ ⵏⵏⴻⵖ, ⵓⵎⵉ ⵅⵣⴰⵔⴻⵏⵜ ⵖⴰⵔ ⵜⵡⵉⵣⴰ. ⵜⵓⵖⴰ-ⵜ ⴱⴰⵟⴻⵍ! ⵖⴰⵔ ⵎⴰⵔⵔⴰ ⴰⵅⴻⵣⵣⴰⵔ ⵏⵏⴻⵖ ⵏⴻⵜⵜⵔⴰⵊⴰ ⵉⵊⵊ ⵏ ⵍⴳⴻⵏⵙ ⵉ ⵡⴰⵔ ⵉⵣⴻⵎⵎⴰⵔⴻⵏ ⴰⴷ ⵉⵙⵙⴻⵏⵊⴻⵎ.
18ⵜⵙⴰⴷⵉ. ⵏⵉⵜⵏⵉ ⵃⵚⴰⵔⴻⵏ ⴰⵏⴻⵖ, ⴰⵍⴰⵎⵉ ⵡⴰⵔ ⵏⴻⵇⵇⵉⵎ ⵏⵣⴻⵎⵎⴰⵔ ⴰⴷ ⵏⵓⵢⵓⵔ ⵅ ⵡⴰⵣⵣⴰⵢⴻⵏ ⵏⵏⴻⵖ. ⵇⴻⵟⵟⵓ ⵏⵏⴻⵖ ⵜⵓⵖⴰ ⵢⵉⵡⴻⴹ-ⴷⴷ, ⵓⵙⵙⴰⵏ ⵏⵏⴻⵖ ⵇⴹⴰⵏ, ⵡⴰⵀ, ⵇⴻⵟⵟⵓ ⵏⵏⴻⵖ ⵢⵓⵙⴰ-ⴷⴷ.
19ⵇⵓⴼ. ⵉⵏⵏⵉ ⴷ ⴰⵏⴻⵖ ⵉⴹⴻⴼⴼⴰⵔⴻⵏ ⵜⵓⵖⴰ ⴼⵙⵓⵙⴻⵏ ⵅ ⵉⴳⵉⴷⴰⵔⴻⵏ ⴷⴻⴳ ⵓⵊⴻⵏⵏⴰ. ⵏⵉⵜⵏⵉ ⵓⵥⵥⵍⴻⵏ ⵅⴰⵏⴻⵖ ⵅ ⵉⴷⵓⵔⴰⵔ, ⴳⴳⵉⵏ ⴰⵏⴻⵖ ⵉⵊⵊ ⵏ ⵍⴼⴻⵅ ⴷⵉ ⵍⴻⵅⵍⴰ.
20ⵔⵉⵅ. ⵏⵏⴻⴼⵙ ⵏ ⵡⴻⵏⵣⴰⵔⴻⵏ ⵏⵏⴻⵖ, ⵍⵎⴰⵙⵉⵃ ⵏ ⵙⵉⴷⵉ, ⵉⵜⵜⵡⴰⵃⴻⴱⴱⴻⵙ ⴷⵉ ⵉⵃⵓⴼⴰⵔ ⵏⵙⴻⵏ, ⵡⴻⵏⵏⵉ ⵅ ⵏⴻⵏⵏⴰ: “ⴰⴷ ⵏⴻⴷⴷⴰⵔ ⵊⴰⵔ ⵍⴻⴳⵏⵓⵙ ⴷⵉ ⵜⵉⵍⵉ ⵏⵏⴻⵙ!”
21ⵛⵉⵏ. ⵙⵍⵉⵡⵍⴻⵡ ⵓ ⴼⴰⵔⵃ, ⴰ ⵢⴻⴵⵉⵙ ⵏ ⵉⴷⵓⵎ, ⵜⴻⵏⵏⵉ ⵉⵣⴻⴷⴷⵖⴻⵏ ⴷⵉ ⵜⴻⵎⵎⵓⵔⵜ ⵏ ⵄⵓⵚ! ⵎⴰⵛⴰ ⵓⵍⴰ ⴷ ⵛⴻⵎ ⴰⴷ ⵖⴰⵔⴻⵎ ⴷⴷ-ⵢⴰⵙ ⵍⴽⴰⵙ, ⵛⴻⵎ ⴰⴷ ⵣⵣⴰⵢⴻⵙ ⵜⴻⵙⵛⴰⵔⴻⴷ, ⴰⴷ ⵜᵉⵜⵜⵡⴰⵄⴰⵔⵔⵉⴷ.
22ⵜⴰⴼ. ⵖⴰⵔ ⵍⵎⵓⵄⵚⵉⵢⵢⴻⵜ ⵏⵏⴻⵎ ⴰⴷ ⵢⵉⵍⵉ ⵓⵏⴻⴳⴳⴰⵔ, ⴰ ⵢⴻⴵⵉⵙ ⵏ ⵚⵉⵀⵢⵓⵏ! ⵏⴻⵜⵜⴰ ⵡⴰⵔ ⵉ ⵛⴻⵎ ⵉⵜⵜⵃⴻⵡⵡⵉⵙ ⵄⴰⴷ. ⵎⴰⵛⴰ ⵏⴻⵜⵜⴰ ⴰⴷ ⵣⵣⴰⵢⴻⵎ ⵉⵅⴻⴵⴻⵚ ⵍⵎⵓⵄⵚⵉⵢⵢⴻⵜ ⵏⵏⴻⵎ, ⴰ ⵢⴻⴵⵉⵙ ⵏ ⵉⴷⵓⵎ! ⵏⴻⵜⵜⴰ ⴰⴷ ⵉⵄⴰⵔⵔⴰ ⵅ ⴷⴷⵏⵓⴱ ⵏⵏⴻⵎ.
expand_more
Search