إِزْڒَانْ س إِڭجْذُورنْ4rif_ati

إِزْڒِي وِيسّْ أَربْعَا - ڒْمُوعْصِييّثْ ن يدْجِيسْ ن ؤُرْشَالِيمْ

1أَلِيفْ. مَامّشْ إِڭَّا إِبَّارْشنْ وُورغْ أَمُّو، مَامّشْ إِبدّڒْ وُورغْ إِشْنَا قَاعْ أَمُّو! مَامّشْ تّْوَابزّْعنْ إِژْرَا ن زَّاوشْثْ إِقدّْسنْ خْ ثْغمُّورَا ن إِبْرِيذنْ!
2بِيثْ. إِحنْجِيرنْ إِغْڒَانْ ن صِيهْيُونْ تّْوَاحسْبنْ أَمْ وُورغْ إِقُّورنْ. مَامّشْ ذ أَسنْ تّڭّنْ ڒخُّو أَمْ يِيغَارَّافنْ ن ثْڒَاخْثْ، أَمْ ڒْخذْمثْ ن بُو-ثْڒَاخْثْ!
3ڭِيملْ. عَاذْ ثُوشَّانِينْ ن ڒخْڒَا إِ د-إِسُّوفّْغنْ ثِيبِّيشِينْ، سُّوطُّوضنْثْ إِمژْيَاننْ نْسنْثْ، مَاشَا يدْجِيسْ ن ڒْڭنْسْ إِنُو ثذْوڒْ ثوْعَارْ، أَمْ نّْعَامَاثْ ذِي ڒخْڒَا.
4ذَالِيثْ. إِڒسْ ن وحْضِيضْ إِڒْصقْ غَارْ وَانغْ نّسْ س ؤُفَاذِي، إِحنْجِيرنْ إِمژْيَاننْ ثتَّارنْ أَغْرُومْ، مَاشَا ؤُڒَا ذ إِجّنْ وَارْ ذ أَسنْ ث يبْضِي.
5هِي. إِنِّي ثُوغَا إِتّتّنْ زِيشْ مَاشَّا إِڒدّنْ، غَاشَانْ ذڭْ إِبْرِيذنْ، إِنِّي إِتّْوَاسّيْمنْ ذڭْ وَارُّوضْ أَزڭّْوَاغْ إِحذْقنْ، حنّْضنْ ڒخُّو ذِي ڒغْبَارْ.
6وَاوْ. ڒْمُوعْصِييّثْ ن يدْجِيسْ ن ڒْڭنْسْ إِنُو ذ ثَامقّْرَانْثْ خْ دّْنُوبْ ن ثنْذِينْثْ ن سَاذُومْ، ثنِّي إِنْقڒْبنْ ذڭْ إِجّْ ن ؤُمُورْ، بْڒَا تّْسَاخُّورْ ن إِفَاسّنْ.
7زَايِينْ. ثُوغَا ثَارْوَا ن ثَاصِيڒثْ نّسْ صْفَانْ خْ وذْفڒْ، ذ إِشمْڒَاڒنْ خْ ؤُغِي، أَرِّيمَاثْ نْسنْ زوْغنْ خْ ڒْمَارْجَانْ، أَدُّوذْ نْسنْ يَارقّْ أَمْ صَافِّيرْ أَزِيزَا.
8خِيثْ. ڒخُّو إِبدّڒْ وَادُّوذْ نْسنْ، إِذْوڒْ ذ أَبَارْشَانْ خْ ثَادْجسْثْ، وَارْ تّْوَاعْقِيڒنْ ذڭْ إِبْرِيذنْ عَاذْ. ثِيڒْمشْثْ نْسنْ ثڒْصقْ خْ يغْسَانْ نْسنْ، ثُوژغْ، ثذْوڒْ أَمْ ؤُكشُّوضْ.
9ثِيث. إِحْڒَا إِنِّي إِتّْوَانْغنْ س سِّيفْ، خْ يِينِّي إِتّْوَانْغنْ س ڒَاژْ، مَاغَارْ نِيثْنِي أَذْ فسْينْ، تّْوَاڒقْفنْ س ونْقَاسْ ن صَّابثْ ن ييَّارْ.
10يُوذْ. إِفَاسّنْ ن ثمْغَارِينْ نِّي ثُوغَا إِتّْحِينَّانْ قْبڒْ، سّْننَّانْ إِ إِحنْجِيرنْ نْسنْ. نِيثْنِي ذوْڒنْ أَسنْثْ ذ مَاشَّا، زِي سِّيبّثْ ن ثْرژِّيثْ ن يدْجِيسْ ن ڒْڭنْسْ إِنُو.
11كَافْ. سِيذِي يَارْخُو إِ وسْعَارْ نّسْ، إِسّْفَارّغْ ڒْحَاذُوقْ ن وغْضَابْ نّسْ. نتَّا إِسَّارْغْ ثِيمسِّي ذِي صِيهْيُونْ، ثِيمسِّي ثنِّي إِشّنْ ذْسُوسَا نّسْ.
12لَامِيذْ.عمَّارْصْ وَارْ ثتّْغِيڒْ إِ إِجدْجِيذنْ ن ثمُّورْثْ ذ إِمزْذَاغْ ن دُّونشْثْ، أَقَا أَغْرِيمْ ذ ڒعْذُو أَذْ د-أَذْفنْ غَارْ ثوُّورَا ن ؤُرْشَالِيمْ.
13مِيمْ. ذ مَانْ أَيَا ذِي سِّيبّثْ ن دّْنُوبْ ن إِنَابِييّنْ نّسْ، ذِي سِّيبّثْ ن ڒْمُوعْصِييّثْ ن إِكهَّاننْ نّسْ، إِنِّي إِسِّيزّْڒنْ إِذَامّنْ ن إِمْسڭَّاذنْ ذِي ڒْوسْطْ نّسْ.
14نُونْ. ثتّْلِيعنْ أَمشْنَاوْ إِذَارْغَاڒنْ ذڭْ إِبْرِيذنْ، مسْڒنْ س إِذَامّنْ، أَڒَامِي وَارْ إِزمَّارْ ؤُڒَا ذ إِجّنْ أَذْ إِحَاذَا أَرُّوضْ نْسنْ.
15سَامِيخْ. ”أَڭّْوجمْ، أَقَا إِذَامّنْ خمْجنْ!“، ڒَْاغَانْ أَسنْ: ”أَڭّْوجمْ، أَڭّْوجمْ، وَارْ ث تّْحَاذَامْ!“ ؤُشَا خنِّي أَروْڒنْ، قِّيمنْ ودَّارنْ. إِتّْوَانَّا جَارْ ڒڭْنُوسْ: ”وَارْ إِعدّڒْ أَذْ قِّيمنْ ذِينْ عَاذْ كْثَارْ أَمْ إِبَارَّانِييّنْ!“
16بِي. أَغمْبُوبْ ن سِيذِي يَاريّشْ إِ-ثنْ، وَارْ إِقِّيمْ أَذْ ذَايْسنْ إِخْزَارْ عَاذْ. ثُوغَا وَارْ غَارْسنْ أَوقَّارْ إِ إِكهَّاننْ، إِوسُّورَا وَارْ ذ أَسنْ سّشْننْ أَحِينِّي.
17عَايِينْ. ڒبْذَا تّفْشِيڒنْثْ ثِيطَّاوِينْ نّغْ، ؤُمِي خْزَارنْثْ غَارْ ثْوِيزَا. ثُوغَا-ث بَاطڒْ! غَارْ مَارَّا أَخزَّارْ نّغْ نتّْرَاجَا إِجّْ ن ڒْڭنْسْ إِ وَارْ إِزمَّارنْ أَذْ إِسّنْجمْ.
18ثْسَاذِي. نِيثْنِي حْصَارنْ أَنغْ، أَڒَامِي وَارْ نقِّيمْ نْزمَّارْ أَذْ نُويُورْ خْ وَازَّاينْ نّغْ. قطُّو نّغْ ثُوغَا يِيوضْ-د، ؤُسَّانْ نّغْ قْضَانْ، وَاهْ، قطُّو نّغْ يُوسَا-د.
19قُوفْ. إِنِّي ذ أَنغْ إِضفَّارنْ ثُوغَا فْسُوسنْ خْ إِڭِيذَارنْ ذڭْ ؤُجنَّا. نِيثْنِي ؤُژّْڒنْ خَانغْ خْ إِذُورَارْ، ڭِّينْ أَنغْ إِجّْ ن ڒْفخْ ذِي ڒخْڒَا.
20رِيخْ. نّفْسْ ن ونْزَارنْ نّغْ، لْمَاسِيحْ ن سِيذِي، إِتّْوَاحبّسْ ذِي إِحُوفَارْ نْسنْ، ونِّي خْ ننَّا: ”أَذْ ندَّارْ جَارْ ڒڭْنُوسْ ذِي ثِيڒِي نّسْ!“
21شِينْ. سْڒِيوْڒوْ ؤُ فَارْحْ، أَ يدْجِيسْ ن إِذُومْ، ثنِّي إِزدّْغنْ ذِي ثمُّورْثْ ن عُوصْ! مَاشَا ؤُڒَا ذ شمْ أَذْ غَارمْ د-يَاسْ ڒْكَاسْ، شمْ أَذْ زَّايسْ ثسْشَارذْ، أَذْ ثتّْوَاعَارِّيذْ.
22ثَافْ. غَارْ ڒْمُوعْصِييّثْ نّمْ أَذْ يِيڒِي ؤُنڭَّارْ، أَ يدْجِيسْ ن صِيهْيُونْ! نتَّا وَارْ إِ شمْ إِتّْحوِّيسْ عَاذْ. مَاشَا نتَّا أَذْ زَّايمْ إِخدْجصْ ڒْمُوعْصِييّثْ نّمْ، أَ يدْجِيسْ ن إِذُومْ! نتَّا أَذْ إِعَارَّا خْ دّْنُوبْ نّمْ.
expand_more
Search