Hiwerika3hch_wb2
1Ne nekanihɨkɨtɨni nemɨtiuka'eniexɨa 'uximatɨarikakɨKakaɨyari 'uyeha'aka yukɨyekɨ pɨnetsi'uwa.2Kaneniupitɨani yɨwipa nemuyeikanikɨ,hekɨariyatsie pɨkanetsi'upitɨari.3Yakanetini'uximatɨaka,heiwatɨma xeitukari pɨka'anukayeika.4Newaiyari meta nenawiyaritsie pɨnetsi'utawatsiɨxaxɨ,ne'umeyari pakamuraxɨa.5Pɨnetsi'ukurarutɨiyaxɨ'axamɨti'anekɨ meta nemɨtiuka'eniwanikɨ.6Waɨriyarika kaneninɨ'aka yɨwipa xeikɨari nemuyeikanikɨ,meripaitɨri memukwi wahepaɨ.7'Ukaneniyenaka, nepɨkayɨwe nemɨyuta'una,tepɨa kaunariyarikɨ mahetekɨ kaneniuhɨani.8Tsepa karima nemutahiwa tsepa parewiya nemɨwawa,mɨkɨ nenenewieri pɨka'enimɨkɨ.9Nehuyeta tetexi puyatsaxɨ,meta nehuye waɨkawa pekutunaxɨa.10Kakaɨyari pɨnetsi'awiexeiyane hutse mɨtihupie hepaɨ,meta maye hepaɨ pɨnetsihupie.11Huyeta kanenanayehanani mɨnetsititsanaxɨanikɨ,haweri ne 'anekame mɨnetsihayewakɨ.12Yutupi 'ukuha'aritɨaka,kanenimɨneni xeikɨa.13Ne'iyaritsie kaneniutamɨniyu'ɨrɨtekɨ metɨkɨta miemetekɨ.14Ne, 'atsieriwame xeikɨari nekanihɨkɨtɨni yunaime teɨteri wahɨxie,tukarikɨ nehɨxie mekaniutikwikani menetsinanaimatɨ.15Hatsiwimekɨ xeikɨa kaneniutahɨniya,meta kaneniu'itɨani tsiɨrika hepaɨ ratsiwime.16Netsi'uwiyaka kwiepa katiniukatuaxixɨani nekɨmana,tumuanari nemɨtikwanikɨ kaneniupitɨani.17Pɨnetsi'unawairi kayuwatɨ kenemɨrexeiyakai,'aixɨa 'iyari 'uyeikatɨ kemɨreu'erieka nepɨka'imateri.18Hikɨ mɨpaɨ nekaniutaineni: «Netukari pɨtixɨxime,meta neta'ikwewatɨ Yawé hetsiemieme».19Kena'eriwani kuyeikame nemɨhɨkɨ netiuka'eniwatɨ,ratsiwimekɨ nemɨmɨximekɨ.20Mɨpaɨ tsiere nepɨtiku'eriwa,'ayumieme mɨkɨkɨ nepaunutuixie ne'iyaritsie.21Peru 'akuxi tawarita mɨpaɨ nepɨtiku'eriwa,mɨkɨ waɨkawa neta'ikwewame pɨnetsihayeitɨwa:22Yawé naki'eriyaya mɨmariwe hatsuaku pɨkakumawere,meta kemɨtiyukanenimaya hatsuaku pɨkaxɨni.23Xexuime ximeriyaritsie pihekwariya kemɨtiyukanaki'erie,pɨmariwe ke'aixɨa mɨtiuka'iyari.24'Ayumieme 'imatɨrieka, mɨpaɨ neputaine:«Yawé xeikɨa kanihɨkɨtɨni tita nemɨrexeiya.'Ayumieme hetsiena xeikɨa netiwiyatɨ nepɨta'ikwewani».25Yawé 'aixɨa katiniuka'iyarini kemɨ'ane yuri memɨte'erie hetsiena wahetsie,meta kemɨ'ane memikuwautɨwe wahetsiemieme.26'Aixɨa kani'aneni kayuwatɨ 'umatɨ mitakwewieka,Yawé mayenenikɨ tatsitawikweitsitɨanike.27'Aixɨa pɨ'ane xɨka tewi retimaniyuku mɨtitɨnikɨ temaikɨyari hepaɨ.28Xekeneuhayewa yuxaɨtame xeikɨa muyuhayewanikɨ,mɨpaɨtsɨ Yawé katinipitɨani.29Tumuanaripa yɨhɨxima keheuhakeni.Heiwatɨ 'akuxi 'uparewiyani.30Tawarita ta'aurie kehaweni tapata yu'auritapa mɨtikwinitɨarienikɨ,para mɨpaɨ 'axa'itɨarietɨ muyuhayewanikɨ.31Yawé katanexɨrieni,peru yuheyemekɨ pɨkatatsihexɨrieni.32Waɨkawa temɨte'uka'eniwanikɨ pɨtatsipitɨa, peru pɨtatsitinenimayata,naki'eriyaya mɨmariwekɨ.33Ti'aitame pɨtatikwinitɨa meta pɨtatsihiweritɨaperu mɨpaɨ mɨtinakekɨ pɨkatiyuriene.34Kepauka memɨtiketsinarɨwayunaitɨ pɨretsutsixi kwiepa memɨtama,35kepauka 'Amutewi hɨxietewi heitserie kemɨrexeiya mɨpaɨ mɨkatipitɨarie,36kepauka heitseriemekɨ mɨkaparewiya,¿Yawé tamɨ mɨpaɨ karetimamateke?37¿Kemɨ'ane pɨyɨwe tixaɨtɨ hepaɨtsita mɨtiutaxata 'ariketa hekɨatsime mayeitɨaniYawé mɨpaɨ kahainekaku?38¿Tamɨ Kakaɨyari xeikɨa yahainekaku yakatikuyɨne,mɨtiutixuxuawere 'axati'anetɨ meta 'aixɨati'anetɨ?39¿Titayari 'ayeyuritɨ 'axarainenikemɨ'ane 'axatiuyurieyu mɨtiukwinitɨarienitsie?40Neuxei hikɨmɨ tepɨtatimaixɨani yateteku'eriwatɨhikɨ 'ana tepɨ'axɨani Yawé huyeya 'utɨa.41Tekaninɨawakakuni Kakaɨyari muyuawitsie makaweta'iyarikɨ meta tamamatekɨ.42'Axatepɨte'uyuri, temɨkaheu'enana tepɨhɨkɨ,'ekɨta pepɨka'awaɨriya pemɨtareuyehɨwirienikɨ.43Waɨkawa peha'atɨ pekataniuweiyani,pekatanikwika pekatatsinenimayatɨ.44Haiwitɨritsata pepɨ'ati'awiwietatanenewieri pemɨka'eniekakɨ.45Tepɨa temɨxikiyari mɨkaheuyewetse hepaɨ,pekataneutaxɨriexɨani nuiwarite watsata.46Yunaitɨ memɨtatsi'aye'unie meputiniukatahetsiemieme xeikɨa 'axamepɨtekuxata.47'Ari tepatixɨriya tete'uka'eniwatɨ temariutsietɨ,kepauka takiekari muta'unarie.48Haa muhane hepaɨ pɨyɨne ne'ukai ne'auritsie,neteɨterima wakiekari mɨmariwe muka'unariekɨ.49Nehɨxite xɨari pɨkayunixɨani 'ukaikɨ,katihayewatɨ meta xewitɨ ka'inɨtɨakaku,50kepaukake muyuawitsie paitɨYawé mɨtatsihaye'erieni mɨtatsixeiya.51Pɨnetsihekukukuine yemekɨ ne'iyari taɨta paitɨ,newaxeiyatɨ 'ukarawetsixi mete'uka'eniwame nekiekaritsie kiekatari.52Memɨnetsi'aye'unie mekaneniuweiyani nitixaɨtɨ mekatehayexeiyatɨ nehamatɨa,wiki hepaɨ mekaneniwiniyatɨweni.53Ne'ayeniereme mekaneniteukikunitetexikɨ menetsiheukananike newatiyanikɨ.54Haa nemu'utsie paitɨri kaniuku'atɨkani,'ari mɨpaɨ katinimatsiɨkɨni netukari kaniutixɨni.55Hikɨ meukatewatsie mɨki teukiyatanekameniutahɨawe, parewiya Yawé nekameniutawawirieni,56'ekɨta pepɨnetsi'u'eni kenemɨmatiwawiriekai yemekɨ,hawaikɨ pepɨkaheikanaxɨa 'a'enakareme ne kenemutainekai karima.57Ne nepɨmatsi'utahɨawixɨ, hikɨ 'ekɨ nehetsɨa pepunua,mɨpaɨ pepɨnetiutahɨawixɨ: «Pepɨkamaka».58Yawé, 'ekɨ nehetsie peputanua'ana netukari peputawikweitsitɨa.59Yawé, 'ekɨ pepunierixɨ ke'aixɨa nemɨkatixeiyariekai,nehetsiemieme kemɨtiheitserie 'aixɨa ketineuyuri.60'Ekɨ pepuwaruxei kwinimieme kemenete'aye'unietɨ memɨnetsi'uyurimeta pepɨtimaikai kememɨteku'eriwakai nehetsiemieme.61Yawé, 'ekɨ pepɨwaru'eni ke'axamemɨtate'utahɨawixɨmeta naime kememɨteku'eriwakai nehetsiemieme,62'ekɨ pepɨtimate tukarikɨ memɨnetsi'aye'uniemepɨnetsikuxata kememɨteyurieni nehetsiemieme.63Keniwaruxeiya. Tsepa kememɨteyuriemekaneninanaimaka me'utikwitɨ.64Yawé, yaketiniwarakapitɨa,naime kememɨte'uyurikɨ.65Mekatemaiwaweme keniwarayeitɨa,'axamɨti'ane wahetsie ketiunake.66Yawé, keniwaranukuweiya peha'atɨ,'ena kwiepa keniwarakumaweriya.