1Wanhu weng'ha vyowalochile lwanda lwa Yolodani, Mkulu Nguluwi nakamlonjela Yoshua,2“Mhagule walume kumi na weli hali awo Waisilaeli, munhu yumwe kulawa chila nhanzi.3Muwalajize hino, ‘Mhole maganga kumi na meli kulawa aho hagati ha lwanda lwa Yolodani, hogali magulu ga watambika, hamba mpiche maganga ago, mkagawiche honhu hala homuwasa lehano.’ ”4Yoshua nakawachema awo walume kumi na weli hali Waisilaeli yawawichile kuli mijito, chila nhanzi munhu yumwe.5Yoshua nakawalonjela, “Mlilongole isanduku lya ilagano lya Mkulu Nguluwi, Nguluwi wa hemwe, mbaka kuli lwanda lwa Yolodani. Chila yumwe wa hemwe yahole iganga miyega mwa heye, iganga limwe kwa chiwalo cha chila nhanzi ya Isilaeli.6Mbuli ayo yowa ulajilo hali hemwe. Wana wa hemwe howowauzani zuwa lilinguya, ‘Ndaze maganga ago gana mana yachi kwa hemwe?’7Hemwe mowalonjela kota isanduku lya ilagano lya Mkulu Nguluwi vyolikolezwe kuli lwanda lwa Yolodani, mazi ga lwanda alo nagalemezwa galeche kuchililika! Ahyo, maganga ago gowa chikumbuchilo kwa Waisilaeli mazuwa gose.”8Wala walume nawadita kota vyowalajizwe na Yoshua, nawahola maganga kumi na meli kulawa hagati ha lwanda lwa Yolodani, iganga limwe kwa chiwalo cha chila nhanzi ya Isilaeli, kota Mkulu Nguluwi vyoyamlajize Yoshua, nawaluta nago mbaka honhu hala howawasile, wagawika aho.9Yoshua nakemiza kahi maganga kumi na meli hagati ha lwanda lwa Yolodani, honhu hala hawele magulu ga watambika wala wapichile lila isanduku lya ilagano hogemile. Maganga ago ga kuko mbaka lehano.10Wala watambika wapichile isanduku lya ilagano, nawema hagati ha lwanda lwa Yolodani mbaka wanhu vyowagomanjize kudita chila chinhu chiwele Mkulu Nguluwi choyamlajize Yoshua yawalonjele wanhu. Yoshua nakadita geng'ha gawele Musa nayali yamlajize. Wanhu nawadita himahima kuloka.11Wanhu weng'ha vyowalochile, wala watambika nawakola hali wanhu na lila isanduku lya ilagano lya Mkulu Nguluwi.12Walume wa nhanzi ya Lubeni na ya Gadi na nusu ya nhanzi ya Manase wawele wawichigwe goya kitowa ngondo, nawali wa mwaluko kuloka lwanda hali Waisilaeli, kota vila vyowalajizwe na Musa.13Walume awo kota elufu makumi gane, wawele wewichile goya kitowa ngondo, nawakola hali Mkulu Nguluwi woluta kuli ibalalika lya muji wa Yeliko.14Kuli zuwa alyo Mkulu Nguluwi nakamlajila Yoshua kota ndo chilongozi hali Waisilaeli weng'ha, nawo nawamhulichiza Yoshua kuli kikala kwa heye kweng'ha kota vyowamhulichize Musa kuli ukomu wa heye weng'ha.15Hamba Mkulu Nguluwi nakamlonjela Yoshua,16“Walajize watambika walingulipika isanduku lya ilagano, walawe kuli lwanda lwa Yolodani.”17Lelo Yoshua nakawalonjela wala watambika, “Mlawe kuli lwanda lwa Yolodani.”18Awo watambika nawali wapichile lila isanduku lya ilagano lya Mkulu Nguluwi vyowalawile hagati ha lwanda lwa Yolodani na kubiga hafungo mwa lwanda, mazi ga lwanda lwa Yolodani nagaluka kuchililika kahi na kumema kota hamwande.19Waisilaeli nawaloka lwanda lwa Yolodani kuli zuwa lya kumi lya mwezi wa mwaluko, nawawika kambi ako Giligali, kolilawilaga isanya mwa Yeliko.20Yoshua nakagemiza gala maganga kumi na meli gowaholile kulawa kuli lwanda lwa Yolodani, ako Giligali.21Hamba Yoshua nakawalonjela Waisilaeli, “Wana wa hemwe howowauzani zuwa lilinguya, ‘Ndaze, maganga aga gana mana yachi?’22Mowalonjela hino, ‘Waisilaeli nawaloka lwanda alu lwa Yolodani honhu hakalile.’23Kwa vila Mkulu Nguluwi, Nguluwi wa hetwe, nakagakaza mazi ga lwanda lwa Yolodani kwa chiwalo cha hetwe mbaka tuloka, kota vyoyawaditile wanhu wa hetwe kuli Bahali ya Shamu,24lelo wanhu weng'ha wa isi zeng'ha wavizele kota moko wa Mkulu Nguluwi una mong'ho, namwe mumdumbe Mkulu Nguluwi, Nguluwi wa hemwe, mazuwa gose.”