1बाक यूसुफ उन सन्तान इन भाग चिट्टी हाक्कु ठहरूसकु आत, आंदुर सीमा यरीहो अन हाती इन यरदन गांगा टु मतलब पूर्व अन दी यरीहो अन झरना देल शुरू आगकु आ पहाळी द्याश टु आगतेला जो आळी दा आद बेतेल नगर इक पोहचुस्त;2बेतेल टु आव लूज क्षेत्र ताका पोहचुस्त, अदिक अर्की जाती इन सीमा टु आगतेला अतारोत मा होगकु होळ्त,:3अदिक पश्चिम इन दी यपलेती जाती इन सीमा टु ईळुकु बाक ल्यालमागोळोद बेथोरोन इन सीमा टु आगकु गेजेर हेसुर इन जागा मा पोहचुस्त, अदिक महासमुद्र दा खतम आत.4आग मनश्शे अदिक एप्रैम हेसुर ईनोर यूसुफ उन येढ्ढु पारगोळोर औलाद तान तान हिस्सा तांकोडुर.
एप्रैम उन हिस्सा
5एप्रैमगोळ्द सीमा आंदुर्द कुलगोळ्द अनुसार ईद ठहरूस्त; मतलब आंदुर भाग इन सीमा पूर्व टु चालु आगकु अत्रोतदार टु आगतेला म्याकुचवाळा बेथोरोन ताका पोहचुस्त;6अदिक उत्तरी सीमा पश्चिम इन दी मिकमतात टु चालु आगकु पूर्व इन दी तिर्गकु तानतशीला अक पोहचुस्त, अदिक अदुर हाती टु आगतेला यानोह ताका पोहचुस्त;7बाक यानोह टु अद अतारोत अदिक नारा अक ईळुतेला यरीहो अन हाती टु आगकु यरदन गांगा मा खतम आत.8बाक अदा सीमा तप्पूह टु होटकु, अदिक पश्चिम दी होगकु, काना नाला ताका आगकु समुद्र मा होळ्त. एप्रैमिगोळ्द गोत्र अन भाग आंदुर कुलगोळ अनुसार ईल्या ठहरूस्त.9अदिक मनश्शे कुल इन हिस्सा अन न्याड्या भी थ्वाळासा नगर तान तान ऊरगोळ सांगुळ एप्रैमिगोळ साटी अलग माळकु आदव.10लेकीन जो कनानी गेजेर दा बसुस्कु ईरोर आंदरी एप्रैमीगोळ अल टु ईला तेगदीदुर; इदुरसाटी आंदुर कनानी आंदुर बीच ईंद इन दिन ताका बसुस्कु आर, अदिक बेगारी दा दास इन घाई क्याल्सा माळतार.