ኤፍሬማነ ምናሰ ላታ
1ዮሰፋ ኮቻታ ጋክዳ ላታ ቢታይ ዱገሀ ባጋራ እያርኮ ማታን ደእያ ዮርዳኖሰን ዶሜስ። እያርኮ ፑልቱዋስ ዉሎሀ ባጋ ጋፃፐ ብድ፥ መላ ቢታ ካንድ፥ ደረይ ዳርያ ቢታ ኤክድ፥ ቤተለ ጋኬስ።2ቤተለፐ ብድ፥ አርከት ደእያ አፃሮት-አዳረ ካንድ፥ ሎዛ ጋኬስ።3ሄሳፈ ዉሎሀ ባጋን ደእያ ያፍሌፃታ ቢታ ዱገ ዎድ፥ ጋርሳ ቤት-ሆሮና ጋክድ፥ ያፐ ገዘራ ካንድ፥ መደትራነ አባን ዛዋቴስ።4ዮሰፋ ኮቻት፥ ምናሰነ ኤፍሬማ ኮቻት፥ ባንታና ጋክያ ቢታ ላትዶሶና።5ኤፍሬማ ኮቻ ኤንታ ኮቻን ኮቻን ጋክዳ ቢታይ ሀይሳ፤ ኤንታ ዛዋይ ዶሎሀ ባጋራ ደእያ አፃሮት-አዳረፐ ብድ፥ ቆሞ ባጋ ቤት-ሆሮና ከዬስ።6ያፐ ካንድ መደትራነ አባን ዛዋቴስ። ቃስ ፑደሀ ባጋራ ደእያ ዛዋይ ምክማታታ። ያፐ ዶሎሀ ባጋራ ደእያ ታናት-ሴሎኮ ምርቀትድ፥ ያኖሀ ጋኬስ።7ያኖሃፐ ደንድድ፥ አፃሮተነ ናአራተ ዎድ፥ እያርኮ ጋክድ፥ ዉርሰይ ዮርዳኖሰ ሻፋን ኤቄስ።8ጋፃ ዛዋይ ታፑሀፐ ብድ፥ ዉሎሀ ባጋራ ደእያ ቃና ሻፋ ላንቅያ ኦይክድ፥ መደትራነ አባን ኤቄስ። ኤፍሬማ ኮቻይ ባንታ ኮቻን ኮቻን ላትዳ ቢታይ ሀይሳ።9ሄስ ምናሰ ኮቻ ላታ ግዶን ኤፍሬማ ኮቻስ እመትዳ ካታማታነ ኤንታ ጉታታ ኡባ ጉጄስ።10ግዶሽን፥ ኤፍሬማ ኮቻይ ገዘራን ደእያ ካናነታ ጎድድ ከስቦኮና። ሄሳ ግሾ፥ ካናነት ሀች ጋካናዉ ኤፍሬማ ኮቻ ግዶን ደኦሶና። ሽን ኤፍሬማ ኮቻስ አይለትድ ኦሶና።