يُونُوسْ2rif_ati
يُونُوسْ ذڭْ وسْڒمْ
1إِسّوْجذْ سِيذِي إِجّْ ن وسْڒمْ أَمقّْرَانْ حِيمَا أَذْ إِسّغْرِي يُونُوسْ ؤُشَا يُونُوسْ إِكَّا ثْڒَاثَا ن وُوسَّانْ ذ ثْڒَاثَا نْ دْجِييَاڒِي ذڭْ ؤُعذِّيسْ ن وسْڒمْ.2ؤُشَا إِژُّودْجْ يُونُوسْ إِ سِيذِي، أَربِّي نّسْ، زڭْ ؤُعذِّيسْ ن وسْڒمْ.3إِنَّا:“زِي ڒحْصَارثْ إِنُو ڒَاغِيغْ إِ سِيذِي ؤُ نتَّا يَارَّا-د خَافِي. زڭْ وحْوِيشْ ن ڒَاخَارْثْ ڒَاغِيغْ ؤُشَا شكْ ثسْڒِيذْ إِ ثْمِيجَّا إِنُو.4ثُوغَا ثنْضَارذْ أَيِي ذِي ڒَادْجَاغْ، ذڭْ وُوڒْ ن ڒبْحُورْ، ثنّْضنْ أَيِي-د ڒمْوَاجْ. مَارَّا زّْهِيرْ نّشْ ذ ڒمْوَاجْ نّشْ كِّينْ-د خَافِي سنّجْ.5نِّيغْ: ’نشّْ تّْوَاسُّوفّْغغْ زِي زَّاثْ إِ وُوذمْ نّشْ. عَاذْ أَذْ ثْوَاڒِيغْ عَاوذْ زَّاوشْثْ نّشْ ثَامقّْرَانْثْ إِقدّْسنْ.‘6طّْفنْ أَيِي وَامَانْ أَڒْ مَانِي إِوْضنْ غَارْ ڒعْمَارْ إِنُو، أَمَانْ إِهوْڒنْ نّْضنْ أَيِي-د، إِڒْصقْ-د أَرْبِيعْ ن ڒبْحَارْ ذڭْ ؤُزدْجِيفْ إِنُو.7هْوِيغْ غَارْ طّْرُوفَا يُودْجْغنْ قَاعْ ن إِذُورَارْ، تّْوَابلّْعنْ زّكْرُونَاثْ ن ثمُّورْثْ خَافِي سنّجْ إِ ڒبْذَا، مَاشَا شكْ ثسّْڭعّْذذْ ثُوذَارْثْ إِنُو زِي ثُورْصُوضِي ذڭْ وَامَانْ، أَ سِيذِي، أَربِّي إِنُو!8ؤُمِي إِذوّخْ ڒعْمَارْ إِنُو ذَايِي، فكَّارغْ ذِي سِيذِي، ؤُ ثَاژَادْجِيثْ إِنُو ثْڭعّذْ غَاركْ، ذِي زَّاوشْثْ نّشْ ثَامقّْرَانْثْ إِقدّْسنْ.9نِيثْنِي طّْفنْ ذِي لْ-أَصْنَامْ إِبطّْڒنْ ذ إِغشّنْ، سمْحنْ ذِي ثْمخْسِيوْثْ نْسنْ إِشوَّارنْ.10مَاشَا نشّْ أَذْ شكْ حمْذغْ س يِيشْثْ ن ثْمِيجَّا ثشُّورْ س ؤُقَاذِي. مِينْ وَاعْذغْ، أَذْ ث قفْڒغْ. أَسنْجمْ زِي سِيذِي.“11إِسِّيوڒْ سِيذِي أَكْ-ذ وسْڒمْ ؤُشَا إِعُوقّْ-د يُونُوسْ ذِي ڒْبَارْ.