Read ዒዩዔኤሌ ማፃኣፖ 1

ዒዩዔኤሌ ማፃኣፖ1mdy_twf

ዓቢፃ ዒስራዔኤሌ ዓጮ ሙይ ባይዜሢ

¹ባኣቱዔኤሌ ናኣዚ ዒዩዔኤሌም ናንጊና ናንጋ ጎዳፓ ዳኪንቴ ኪኢቶ ቃኣላ ያዺኬ፦²ዒንሢ ጋርቾ ዓሳ ዋይዙዋቴ!ዪሁዳ ዓጫ ናንጋ ዓሳ ቢያ ዒናፓ ዋይዙዋቴ!ዒንሢ ናንጌ ዎዶይዳ ሃያ ጉዴ ባኣዚ፤ጊንሣ ሃሣ ዒንሢኮ ቤርታኣ ዓዶንሢ ዎዶናኣ ዓሲ ዛጊ ቤቂያ?³ዬያ ባኮ ዒንሢኮ ናኣቶም ኬኤዙዋቴ፤ዒንሢኮ ናኣታ ጊንሣ ፔ ናኣቶም ኬኤዞንጎ፤ዬያታኣ ዔያቶ ሄሊ ሙካ ሾይንቶም ኬኤዞንጎ።⁴ሜልካሢዳፓ ዓቴ ሃኣኮ ባቃሎሻዻ ዓቢፃ ሙዔኔ፤ዬካፓ ዓቴሢ ሃሣ ዢኢፓ ዒርዚጉዲ ዲኢናዓቢፃ ሙይ ባይዜኔ፤ዓቴሢያኣ ማካሢ ሙዔኔ።⁵ሃይካፓ ሴካ ዒንሢ ሙርጎ ዎይኖ ዑዦ ዻንጋ ካንሢንዱዋኣሢሮዒንሢ ማሢንታ ዓሳ ጊንዓስካፓ ጴጪ ዬኤኩዋቴ፤ዒንሢ ቢያ ዎዴ ዎይኖ ዑዦ ዑሽካ ዓሳ!ዒናፓ ቃዪ ዬኤኩዋቴ።⁶ዎልቄና ዓኣ ዑሣ ዓኣዼ ዺቤ ሜሌ ዴሬታ ዓጮ ዖሊ ባይዛኒ ሙኬኔ፤ዬያ ዖሎ ዓሶኮ ዓጫ ዞቢ ዓቺጉዲኬ፤ባንጋላ ጊንሣ ሃሣ ዒንዴ ዞቢሮጉዲኬ።⁷ታኣኮ ቱኮና ዎይኖ ቢያ ሙይ ባይዜኔ፤ቤሌሴ ሚፆዋ ቆፂ ሙዔኔ፤ዬያ ሚፆኮ ዛንዞዋ ቦኦሪሺቁኡሮ ቢያ ፒኢቲ ሙዔኔ።⁸ዒዞ ጎቺ ዴዓያታዖ ሃይቄ ዼጌሮሲዬ ፓቲሌ ማይንቲ ዬኤካዉዱሮ ናይጉዲ ዒንሢያ ዬኤኩዋቴ።⁹ናንጊና ናንጋ ጎዳ ማኣሮይዳ ዒንጎ ባኣዚ ማሂ ሺኢሾሃኣኮንታ ዎይኖ ዑዦንታ ባይቄሢሮናንጊና ናንጋ ጎዳም ማዻያ ማዔ ቄኤሳ ዬኤካኔ።¹⁰ጎዣ ጎሽኪንቴ ጎይሣ ጉሪ ዓቴኔ፤ሃኣኮ ዒኢካ ባኣያ ማዔኔ፤ቱኮና ዎይናኣ ሃይቄኔ፤ዛይታኣ ባይቄኔ፤ዬያሮ ሳዓ ዬኤካኔ።¹¹ዛርጋሢንታ ዔልዖንታ፤ ሜሌ ካፃ ሃኣካኣ ቢያ ባይቄሢሮዒንሢ ጎዦ ጎሽካ ዓሳ ዖዩዋቴ፤ዒንሢ ዎይኖ ቱካ ዓሳኣ ዬኤኩዋቴ።¹²ቱኮና ዎይኖንታ ቤሌሶ ሚፆንታ ሹሌኔ፤ሮኦማኣኔ፥ ቴሚሬ ጌይንታ ሚፃ፥ ሙቃሎንታ ሜሌ ዓኣፖ ዓኣፓ ሚፃ ቢያ ሜሌኔ፤ዬያሮ ጎኔና ዓሲ ዎዛዻ ዎዛ ባይቄኔ።¹³ዒንሢ ፆኦዛሢም ዒንሢ ዒንጋ ሃኣኮንታ ዎይኖ ዑዦ ዒንጊፆንታ ባኣሢሮዒንሢ ታ ፆኦዛሢም ማዻ ቄኤሳ!ሃኒ ዬዒ፥ ሲዬ ፓቲሌ ማይንቲ ዋንቶ ጉቤ ዬኤኩዋቴ፤ዒንሢ ዒንጎ ባኮ ዒንጎ ቤዞይዳ ማዻ ዓሳ ቃዪ ዬኤኩዋቴ።¹⁴ሙኡዚ ሃሾ ዱማ ኬሊ ሜንሡዋቴ!ፆኦሲም ዱማዼ ቡኪንቲ ዴሮ ቡኩሱዋቴ!ጋርቾንታ ዓጮይዳ ናንጋ ዓሶዋ ቢያናንጊና ናንጋ ጎዳ ማዔ ኑ ፆኦዛሢ ማኣሪ ቡኩሱዋቴ፤ዒኢካ ፆኦሲ ዒንሢም ዋይዛንዳጉዲ ዬኤኩዋቴ።¹⁵ባዴዔ! ናንጊና ናንጋ ጎዳ ኬላ ዑኬኔ!ቢያ ባኮ ዳንዳዓ ጎዳሢ ባይሲንታ ዔኬ ሙካ ኬላ ሄሌኔ።

¹⁶ሃኣኮ ኑ ዓኣፓፓዎዛና ዒላሺሢና ኑ ፆኦዛሢኮ ጌኤዦ ማኣራፓጋፒ ባይቄኔ።¹⁷ዜርቂንቴ ዜርፃ ቢያ ሳዖይዳ ሙርዒ ዓቴኔ፤ሃኣካ ባይቄሢሮ ሃኣኮ ናቶ ቤዛ ቢያ ጉሪ ማዔኔ፤ኮናኣ ዶዔኔ።¹⁸ባኣታ ሄንቃንዳ ማኣቲ ባይቄሢሮ ዖኦላኔ፤ማራታኣ ቢያ ናይዺንቲ ካራ ባይዚ ዓኣኔ።¹⁹ናንጊና ናንጋ ጎዳሢዮ! ቦኦሎይዳ ዓኣ ማኣቶ ቢያ ታሚ ሙዔሢሮካዮ ሚፆዋ ታሚ ሚቼሢሮታኣኒ ኔ ባንሢ ዒላታኔ።²⁰ዎራ ሚጬሢሮቦኦሎ ማኣታ ቢያ ሜሊ ባይቄሢሮካዮ ቦዓታዖ ዓቱዋዖ ኔ ባንሢ ዒላታኔ።

ዒዩዔኤሌ ማፃኣፖ 1 / mdy_twf

ዓቢፃ ዒስራዔኤሌ ዓጮ ሙይ ባይዜሢ

ዒዩዔኤሌ ማፃኣፖ1mdy_twf