Kuheri
1
/
hch_wb2
1
'Ikɨ Yawé niukieya kanihɨkɨtɨni, Kuheri hetsɨa munua Petuheri nu'aya.
Tekɨmemete kememɨteheuyehɨa
2
Teɨteri 'ukirawetsixi 'ikɨ xekeneu'eni,
Yemekɨ xekeneu'enana, yunaitɨ teɨteri 'ikɨ kwieyaritsie xemɨtitei.
¿Heiwamieme 'ipaɨ kapɨtiɨyɨ xeme xe'u'uwakaku
yatɨni meripaitɨ kiekatari memu'uwakaitsie?
3
'Ikɨkɨ yuniwema xeketeniwarutaxatɨa,
mɨkɨta yuniwema mepɨtewataxatɨani,
yaxeikɨata mɨkɨ xetutsima memɨtewataxatɨanikɨ.
4
'Utsikari 'amemɨnene tita memɨte'utatexi
'utsikari yakɨmemɨnene naime mekaniutikwani,
meta 'utsikari yakɨmemɨnene tita memɨte'uhayewaxɨ
'utsikari 'etsimemɨpepe naime mekateniutikwani,
'utsikari 'etsimemɨpepe tita memɨte'uhayewakai
'utsikari kwimemɨpepe mekateniutikwani.
5
Xemɨtarɨwe, xekenanutaneniereni xekeneutitsuanani.
Yemekɨ xekeneuti'aiwani winutsie xemɨyuyetua,
matsi kaxie winuyari makaka xekaniunawaiyarieni xemi'iekaikɨ.
6
Xewitɨ kiekari mɨtɨrɨkaɨye memɨkayu'inɨatsinɨa
mekaniu'axɨani nekwietsie:
Mɨkɨ mayetsi wahepaɨ mekateniutameni,
maye 'uka tameteya 'emɨtɨtɨ hepaɨ.
7
Naime mepɨte'ukakɨmixɨ kaxie xawari,
piní mepukamuraxɨ.
Mamateya naime meputimetseriyaxɨ,
naime mepukakarauxi 'ɨkaya meta xawari.
8
Neteɨterima meputitsuana 'uka 'ɨimari heiwerika 'iwiyari manahɨwa hepaɨ
mitiwitɨnikekai 'umɨku hetsiemieme.
9
Hatsite mawariyari meta kaxie winuyari mɨtiyeuriwakai,
mɨkɨri Yawé tukieyata pɨkareyetuiwa.
Mawari wewiwamete mepuyuheiwerie,
Yawé hetsiemieme te'uximayatamete.
10
Naitɨ 'ikwaxi pɨka'ukaxuxuawereri mɨraku'etsitɨretsie,
naitɨri kwie kaniuwakini,
hatsiteri naitɨ katineuyeweni,
kaxie winuyariri mɨhekwa kaniukawani
meta hatseiti kaniuxɨniri naitɨ.
11
Xemetatsiere xeke'utiwani, te'uximayatamete,
xekeneutitsuanani meta te'etsamete,
xemɨte'ekai tsewara meta tɨriku xemɨteheuyehɨakɨ,
naitɨtsɨari mɨraku'etsitɨre mɨtiuka'etsiwakai katineuyeweni.
12
Kaxie naitɨ kaniutiyɨnare,
piní kaniutawani,
'ikwaxi manitsana hepaɨ mɨ'anene kaniutiyɨnare,
takɨ meta manitsana,
naitɨ kɨyexite 'ɨtsita mɨreuka'u.
Yaxeikɨa teɨteri watemawierika kaniutiyɨnare.
Kememɨte'uta'inierie memɨtehayewanikɨ ke'axamemɨteyurie
13
Xeme mawari wewiwamete, heiwerika kamixayari xekenanakatɨkɨni xe'utitsuatɨ.
Xekeneyuheiwerieka, mawari taiyame te'uximayatamete.
'Ena xekenakɨni, xeme Kakaɨyari hetsɨa te'uximayatamete,
tɨkarikɨ hiwerika kamixayari xekenanakatɨkɨni,
hatsite mawariyari meta kaxie winuyari mɨka'atɨariwanikɨ
Kakaɨyari kiitana mɨtiuta'imaritɨxɨkɨ.
14
Xekeneyuhakieka xeyuyetuatɨ,
xekenewa'inieka teɨteri memayuxeɨrietsie.
'Ixaheritsixi teɨteriyari 'ukirawetsixi xekeniwaxeɨrieka
Yawé xekakaɨyari kiita,
yunaime teɨteri kiekari mɨtama xekeniwarukuxeɨri,
meta Yawé xekeneutahɨawi.
15
Xɨa'ui 'iya tukaritsie, Yawé tukarieya maye'aximekɨ.
Mɨkɨ tukaritsie naime katinika'unamɨkɨ Naimekɨmɨtɨrɨkaɨye.
16
Ta'ikwai kataniunawairieni
tame tenenierekaku,
te'utinawetɨ meta ketemɨteyutemamawiekai
takakaɨyari tukieyata mieme.
17
'Imɨari kaniutipɨne
muka'etsiekai.
'Imɨari muwati'utsiwatsie puyexɨ
meta naitɨ puti'unixɨ kiiyari
mɨtiuka'etsiekai mɨreuyewekɨ.
18
Tewaxi yemekɨ meputitsuana.
Hau'erietɨ mepeu'uwa wakaitsixi
hakewatsɨ metehetikwani katiniumaweni,
yaxeikɨa muxatsi mekateniuka'eniwani.
19
'Ekɨ, Yawé, ne nepɨmetsiwawirie,
'ɨxatsɨ 'ayeparitsie meuka'ukai taikɨ mutitai,
tai 'amanutiteterekɨ naime katiniutitaiya kɨyexite 'ɨtsita mɨreuka'ukai.
20
Tewaxi yeutari mepɨmetsikuwautɨwe meteheuyehɨatɨ,
wahaa 'akiitsie naitsarie mukawaxɨakɨ
tai 'ɨxa mutitaiyaxɨkɨ 'ayeparitsie.
Powered by Seed Bible API
expand_more
Search
All books
Old Testament
New Testament
chevron_left
Previous Chapter
Books
search
Search
explore
Discover
share
Share
chevron_right
Next Chapter