Read أَيُوبْ 8

أَيُوبْ8rif_ati

ڒْهَارْذْ أَمزْوَارُو ن بِيلْذَاذْ

¹خَاسْ ؤُشَا يَارَّا-د بِيلْذَاذْ، ونِّي د-يُوسِينْ زِي شُوحَا، إِنَّا:

²مشْحَاڒْ إِ غَا ثكّذْ ثسَّاوَاڒذْ أَمُّو، أَذْ إِڒِينْ وَاوَاڒنْ ن ؤُقمُّومْ نّشْ أَمشْنَاوْ أَسمِّيضْ ن ثْهَارْيَاضْثْ.³مَا أَذْ إِسّْفَارْغْ أَربِّي ثَاسْغَارْثْ، نِيغْ أَذْ إِسّْفَارْغْ ؤُمْزمَّارْ خْ كُوڒْشِي ثَاسڭْذَا؟⁴مَاڒَا أَكِيذسْ خْضَانْ إِحنْجِيرنْ نّشْ، أَقَا إِسّكّْ إِ-ثنْ ذڭْ ؤُفُوسْ ن ؤُخطُّو نْسنْ.

⁵مَاڒَا شكْ ثَارزُّوذْ أَربِّي س جّهْذْ، ثتّْزَاوْڭذْ أَحِينِّي غَارْ ؤُمْزمَّارْ خْ كُوڒْشِي،⁶مَاڒَا ثدْجِيذْ ذ أَمزْذَاڭْ ؤُ ثْسڭّْمذْ، خنِّي أَذْ أَشْ إِوْشَا ثَايْنِيثْ نِيشَانْ، أَذْ إِعْذڒْ ثَازذِّيغْثْ نّشْ إِ شكْ.⁷وَاخَّا ثَامزْوَارُوثْ نّشْ أَذْ ثِيڒِي ذ ثُوقْڒِيتْشْ، ثَانڭَّارُوثْ نّشْ أَذْ ثِيڒِي ثمْغَارْ أَطَّاسْ.

⁸وَاهْ، سقْسَا خنِّي غَارْ جِّيڒْ إِعْذُونْ، حكَّارْ ذِي ڒجْذُوذْ نْسنْ.

⁹مَاغَارْ نشِّينْ ن إِضنَّاضْ وَاهَا، وَارْ نسِّينْ وَالُو، مَاغَارْ ؤُسَّانْ نّغْ خْ ثمُّورْثْ أَمْ ثِيڒِي.¹⁰مَا وَارْ شكْ سّڒْمِيذنْ نِيثْنِي، مَا وَارْ غَاركْ سِّيوِيڒنْ، مَا وَارْ د-سُّوفُّوغنْ أَوَاڒنْ زڭْ وُوڒْ نْسنْ؟

¹¹مَا إِغمِّي ؤُغَانِيمْ ن بَابِيرُوسْ بْڒَا سّبْخثْ، مَا إِمقَّارْ ؤُغَانِيمْ غَارْ ثْمَا ن إِغْزَارْ بْڒَا أَمَانْ؟¹²خْمِي إِتّْنوَّارْ، وَارْ إِمْجَارْ عَاذْ، إِتَّاژغْ قْبڒْ مَارَّا أَرْبِيعْ نّغْنِي.¹³أَمُّو إِ دْجَانْ إِمسْرَاقْ ن مَارَّا إِنِّي إِتُّونْ أَربِّي، ڒَْايَاسْ ن ؤُمْنَافقْ أَذْ إِفْنَا.¹⁴مِينْ خفْ إِعمّذْ، أَذْ إِتّْوَاقْضعْ، مِينْ خفْ إِتّْشَاڒْ، أَذْ د-إِبَانْ ذ أَخْمَاڒْ ن قُونْذْعَا.¹⁵أَذْ إِسنّذْ خْ ثَادَّارْثْ نّسْ، مَاشَا وَارْ ثتّْبذِّي، أَذْ ذَايسْ إِشبَّارْ، مَاشَا وَارْ ثتّْغِيمِي ثْبدّْ.

¹⁶نتَّا ذ أَزِيزَا ذِي ثْفَاوْثْ ن ثْفُوشْثْ، ڒفْرُوعْ نّسْ إِمژْيَاننْ تّْبزَّاعنْ خْ وحْوِيشْ نّسْ.¹⁷إِژوْرَانْ نّسْ مُّوذنْ إِخفْ نْسنْ خْ إِجّْ ن ؤُعُورِّيشْ ن يژْرَا، إِتَّارْجَا إِشْثْ ن ثَادَّارْثْ ن يژْرَا إِ يِيخفْ نّسْ.¹⁸مَاڒَا نتَّا إِقدْجعْ إِ-ث زڭْ ومْشَانْ نّسْ، أَذْ ث إِنْكَارْ ومْشَانْ نِّي، أَذْ يِينِي: ’عمَّارْصْ وَارْ شكْ ژْرِيغْ!‘¹⁹خْزَارْ، ثَا ثدْجَا ذ ڒفْرَاحثْ ن وبْرِيذْ ن ثُوذَارْثْ نّسْ ؤُ إِنّغْنِي أَذْغمْينْ زڭْ ؤُشَاڒْ.

²⁰خْزَارْ، أَربِّي وَارْ إِنطَّارْ ونِّي إِكمْڒنْ مَاشَا وَارْ إِتِّيشْ أَفُوسْ إِ إِعفَّاننْ.²¹عَاذْ أَذْ إِشُّورْ أَقمُّومْ نّشْ س ثْضحَّاشْثْ، ؤُ إِينْشِيشنْ نّشْ س ؤُسْڒِيوْڒوْ.²²إِمشْرَاهْ نّشْ أَذْ يَارْضنْ ڒفْضِيحثْ ؤُ أَقِيضُونْ ن إِعفَّاننْ وَارْ إِتِّيڒِي عَاذْ.

أَيُوبْ 8 / rif_ati

ڒْهَارْذْ أَمزْوَارُو ن بِيلْذَاذْ

أَيُوبْ8rif_ati