Read أَيُوبْ 6

أَيُوبْ6rif_ati

ثَامْوَارِّيثْ ن أَيُوبْ خْ إِلِيفَازْ: أَفقُّوسْ نّسْ

¹يَارَّا-د أَيُوبْ، إِنَّا:

²أَ، مْڒِي وزْننْ ڒْهمّْ إِنُو، مْڒِي جِّينْ أَذْ إِڭعّذْ خْ ڒْمِيزَانْ س ثْنَاينْ ن طَّاوْيَاثْ ؤُڒَا ذ ڒغْبنْ إِنُو أَكِيذسْ إِمُونْ!³مَاغَارْ ڒخُّو أَقَا-ث إِذْقڒْ خْ يجْذِي ن ڒبْحُورْ، خْ ؤُيَا تّفّْغنْ وَاوَاڒنْ إِنُو نْهْڒَا أَخمّمْ.⁴مَاغَارْ نُّوغنْثْ ذَايِي فْڒِيثْشَاثْ ن ؤُمْزمَّارْ خْ كُوڒْشِي، أَڒَامِي بُوحْبڒْ إِنُو إِسسّْ أَرّْهَاجْ نْسنْثْ. إِنخْڒِيعنْ زِي أَربِّي كَّارنْ-د أَكِيذِي.

⁵مَا إِسّْحُونْذْرُوثْ وغْيُوڒْ ن ڒخْڒَا غَارْ أَرْبِيعْ أَزِيزَا؟ نِيغْ إِسّْمُوهْرُوثْ ؤُفُونَاسْ غَارْ هدُّو نّسْ؟⁶مَاشَّا بْڒَا أَڒذِّي مَا أَذْ ت يشّْ بْنَاذمْ بْڒَا ثَامدْجَاحْثْ؟ نِيغْ أَقَا ذِينْ أَڒذِّي ذِي ڒْمحّْ أَشمْڒَاڒْ ن ثْمدْجَاتْشْ؟⁷مِينْ يُوڭِي ڒعْمَارْ إِنُو أَذْ ث إِحَاذَا، ڒخُّو أَيَا مَارَّا إِ نشّْ أَمْ مَاشَّا إِغُومّنْ.

⁸مْڒِي د غَا يَاسْ مِينْ تَّارغْ إِوَا، إِوْشَا أَربِّي مِينْ سِيتِّيمغْ.⁹مْڒِي ثُوغَا إِخْسْ سِيذِي مَاحنْذْ أَذْ أَيِي إِڒْبزْ، مَاحنْذْ أَذْ إِسَّارْخُو أَفُوسْ نّسْ ؤُ مَاحنْذْ أَذْ أَيِي إِقسّْ.¹⁰مَانْ أَيَا أَذْ أَيِي يِيڒِي عَاذْ ذ أَفوّجْ، أَذْ أَيِي إِنْعشْ ذِي ڒحْرِيقْ نِّي وَارْ خَافِي إِسّْعِيزِّي شَا، مَاغَارْ وَارْ نْكَارغْ شَا أَوَاڒنْ ن ؤُمْقدَّاسْ.

¹¹مِينْ إِعْنَا جّهْذْ إِنُو، أَقَا زمَّارغْ أَذْ رَاجِيغْ عَاذْ؟ نِيغْ مِينْ إِعْنَا ؤُنڭَّارُو إِنُو، ونِّي خْ تّخْسغْ أَذْ زُّوڭَارْثغْ ثُوذَارْثْ إِنُو عَاذْ؟¹²مَا جّهْذْ إِنُو أَمْ جّهْذْ ن إِژْرَا؟ مَا أَيْسُومْ إِنُو أَمْ نّْحَاسْ؟¹³مَا وَارْ دْجِيغْ قَاعْ بْڒَا ثْوِيزَا س يِيخفْ إِنُو، مَا وَارْ خَافِي إِتّْوَاكّسْ ؤُفكِّي قَاعْ؟

¹⁴ونِّي ؤُمِي إِقْضعْ ڒَايَاسْ إِتّْخصَّا أَسْ ثَامخْسِيوْثْ إِشُووَّارنْ زڭْ ؤُمدُّوكّڒْ نّسْ، مَاڒَا لَّا، إِزمَّارْ أَذْ يجّْ ثِيڭّْوُوذِي زڭْ ؤُمْزمَّارْ خْ كُوڒْشِي.¹⁵أَيْثْمَا بَاننْ-د ذ إِغدَّارنْ أَمْ ثْغزْرِينْ ذڭْ إِذُورَارْ، أَمْ ثَاسُّوثْ ن ثْغزْرِينْ نِّي إِعدُّونْ ذغْيَا،¹⁶أَمْ ثِيغزْرِينْ ثِينِّي إِتّْبَارّشْننْ س وجْرِيسْ، نِّي ذِي إِسّْنُوفَّارْ وذْفڒْ إِخفْ نّسْ.¹⁷ذڭْ وُوسَّانْ نِّي ذِي ذوْڒنْثْ حْصَارنْثْ، بدّنْثْ، خْمِي حمَّانْثْ، تَّاژْغنْثْ، إِمْحَا ومْشَانْ نْسنْثْ.

¹⁸إِبْرِيذنْ ن ثشْڒِي نْسنْ فَارْغنْ، ڭعّْذنْ ذِي ڒعْوِينْ ؤُشَا ودَّارنْ.¹⁹إِمْسبْرِيذنْ زِي ثَايْمَا قِّيمنْ تّْمژْرِينْ ذَايْسنْثْ، إِكَارَابَاننْ زِي شَابَا تّْرَاجَانْ ثنْثْ.²⁰نِيثْنِي تّْوَاشمْثنْ ذڭْ ؤُثشْڒِي نِّي غَارْسنْ. ؤُسِينْ-د غَارْ ثْغزْرِينْ ذڭْ إِذُورَارْ ؤُشَا بَارّْقنْ.²¹س ثِيذتّْ، ڒخُّو ثْذوْڒمْ ذ وَالُو، ثژْرِيمْ أَرْژِييّثْ إِنُو ؤُشَا ثڭّْوذمْ.

²²مَا نِّيغْ: ’أَوْيمْ أَيِي-د شَا!‘ نِيغْ: ’وْشمْ أَيِي ثِيرْزِيفِينْ زڭْ وَاڭْڒَا نْومْ!‘²³نِيغْ: ’فكّْ أَيِي زڭْ ؤُفُوسْ ن ونِّي إِحصَّارنْ!‘ نِيغْ: ’فْذِي أَيِي زڭْ ؤُفُوسْ ن أَيْثْ ن بُو-ڒخْشُونثْ!‘

²⁴سْغَارْ أَيِي، خنِّي أَذْ سّغْذغْ، سْشنْ أَيِي مِينْ ذِي ودَّارغْ!²⁵مَامّشْ جهّْذنْ وَاوَاڒنْ يشْنَانْ، مَاشَا مِينْ خفْ أَوبّخْ نْومْ؟²⁶مَا ثتّْخَارّْصمْ ذڭْ وَاوَاڒنْ، مَاحنْذْ أَذْ أَيِي ثتّْوبّْخمْ زَّايْسنْ؟ مَا خنِّي أَوَاڒنْ ن ونِّي ؤُمِي قضْعنْ ڒَايَاسْ أَمْ ڒعْوِينْ إِ كنِّيوْ؟²⁷عَاذْ خْ يِيجّْ ن ؤُنِيبُو أَيُوجِيڒْ أَذْ خَاسْ ثنْضَارمْ ثَاقدُّوحْثْ ؤُ عَاذْ خْ يِيجّْ ن ؤُمدُّوكّڒْ نْومْ أَذْ خَاسْ ثڭّمْ ثَامعْمُوتْشْ.

²⁸خنِّي ڒخُّو، مَاڒَا ثخْسمْ، حْضَامْ خَافِي مْلِيحْ، نشّْ وَارْ خَاومْ سّْخَارِّيقغْ ذڭْ ؤُغمْبُوبْ نْومْ.²⁹قدْجْبمْ أَيِي، وَارْ إِعدّڒْ أَذْ ذَايِي يِيڒِي دّدْجْ. قدْجْبمْ أَيِي عَاوذْ، ثَاسڭْذَا إِنُو ثْبدّْ عَاذْ نِيشَانْ.³⁰مَا أَقَا ذِينْ ڒْغشّْ خْ يِيڒسْ إِنُو؟ مَا وَارْ إِتّْڒذِّي وَانغْ إِنُو خْ مِينْ وَارْ إِحْڒِينْ؟

أَيُوبْ 6 / rif_ati

ثَامْوَارِّيثْ ن أَيُوبْ خْ إِلِيفَازْ: أَفقُّوسْ نّسْ

أَيُوبْ6rif_ati