Kuwi5hch_wb2
1»Parakuta xɨka peyɨweni keneutaniu, matsi ¿kemɨ'ane pɨmatsita'eiya?¿Ke'aneme kakaɨyari pepɨtahɨawe?2Memɨkayuwaɨriya memɨteyu'ɨkitɨakakɨ wahaxɨa kaniwakwika,memɨkayɨkɨhɨawe wa'ɨtetsarika kaniwakwika.3Ne mɨkatimaiwe nekanimaika kwitɨwa waɨkawa rexeiyatɨ kanayeikani,matsi kiiya yapauka 'axapu'itɨarie.4Waniwema teewa me'u'uwatɨ mekawikweitsitɨarietɨ mekaniyuhayewakuni,mɨrayutixanetsiwatsie mekaninanaimarieka, xewitɨtɨma wahetsie pɨkatanuani.5Wa'itsanari mekanikwaka memɨyehakakwitɨwe,xuyatsata me'ikatɨkɨtɨ,tita waɨkawa memɨtehexeiya memɨyeharikwitɨwe mekanihareka.6Tsepanetɨ 'uximatɨarika kwiepa katineika,meta kukuinari mana mɨkahatineika,7tewi kaniutinuiwa naimekɨ mɨtiuka'eniwanikɨ,tai tsipɨrikiyari kemɨtita'eke hepaɨ.8»Ne xɨka netiuka'eniwanike, Kakaɨyari hetsɨa 'ahurawa nepuyanike,hɨxiena naimekɨ nepɨnetahekɨatawe.9Mɨkɨ mariweme katiniyurieneni keyatemɨkatemate,kemɨtiyuriene yutɨrɨkariyakɨ pɨkayu'inɨatsinɨa.10Mɨkɨ wiyeri kwiepa kaneyenɨ'awanimeta haa hɨritetsie pɨtixuawitɨani 'ɨtsitsata.11Mɨkɨ tixaɨtɨ memɨkatehayuyeitɨa kaniwaranukuhapananimeta memuyuheiwerie 'aixɨa puwayurie.12Mete'akumaitɨ kememɨteyuriku mɨkɨ yamɨtiyɨnikɨ pɨkatikupitɨwa,wa'uximayatsika tixaɨtɨ pɨkatitixuawitɨani.13Memɨte'akumate Kakaɨyari yakatiniwakupitɨwani kememɨteku'eriwakaitsie memuyukaxɨrienikɨ,meta 'axamemɨte'u'iyari kememɨte'uxa hepaɨtsita katinanu'unani.14Hekɨtatɨtɨ mɨkɨ mekaniyɨrixieka,hekɨtatɨtɨ me'u'uwatɨ mekanikumetɨweni mɨyɨwini hepaɨ.15Matsi memɨte'uka'eniwa kaniwawikweitsitɨakamemɨtɨrɨkawi mewa'uximatɨakakumeta kememutiyuane 'axamewayurikutɨ.16Tixaɨ memɨkatehexeiya kememɨteta'ikwewa mɨpaɨ kani'aneni,'axamemɨte'u'iyari watenie kemɨranunamie.17»'Aixɨa kani'itɨarieka tewi, kemɨ'ane Kakaɨyari mɨti'ɨkitɨa.Naimekɨmɨtɨrɨkaɨye 'uximatɨarikakɨ meti'ɨkitɨakaku pepɨka'ixani'erieka.18Mɨkɨ katinakwinitɨamɨkɨ, matsita katina'uayemamɨkɨ,katinakuwaxɨamɨkɨ peruta katineunuitɨiriemɨkɨ.19Kamaniparewiemɨkɨ 'ataxewimexɨa pe'uximatɨariekaku,meta 'atahutarieka 'axapepɨkaranuyeyani.20Kepauka haakaxa muxuaweni, pemɨkamɨnikɨ kamanitawikweitsitɨamɨkɨ,kuyaxa kepauka muxuaweni, pemɨkamierienikɨ 'ixiparakɨ 'ahetsie kanitanuamɨkɨ.21'Axapetikɨhɨawarɨwakaku kameni'awietakamɨkɨ,meta pepɨkamaka xɨka heiwa haye'ani memɨka'unarienikɨ.22Kememɨteka'unarieni meta haakaxa hepaɨtsita pekaniutanawemɨkɨ,meta 'ɨtsita memɨtexɨawe 'ɨrawetsixi pepɨkawamakaxeni,23matsi 'ɨtsita tɨratu pekaniwewimɨkɨ tetexi wahamatɨameta 'ɨtsita memɨtexuawe 'ɨrawetsixi kaiwatɨ mehexeiyatɨ 'ahamatɨa mekaniu'uwakuni.24'Akie pematayerunitsie yapekatinetimaimɨkɨ 'aixɨa kemɨti'ane,kepauka 'atewama pemɨwa'inɨatani, nixewitɨtɨma pɨkaheuyewekani.25Tɨɨri yɨwaɨkawame pewarexeiyatɨ pekanayeimɨkɨ,meta 'anuiwarima tupiriya 'ɨtsita mieme hepaɨ.26Pe'ukiratsitɨtɨri mɨkite memakateukiwa pekani'atɨariemɨkɨ matsi 'aixɨa 'akuxi pereu'erietɨ,tɨriku 'aixɨa 'anenekaku ka'inɨiwatɨ kemɨtikuxexeɨriwa hepaɨ.27»'Ikɨ kaniyuritɨni tekatenetimani.'Ayumieme keneu'eni meta 'ahetsie yaketineuyuri».