Riyotana-kiro Job iyotani Tajorentsi
1Rakanaki Job ikantana-kiri Tajorentsi:2Niyotzimi naaka pimatziro maawoeni pithotyeero,Niyotzimi eeroka ashitawori maawoeni kenkishiryaantsi. Tema tekatsi omani-mo-temini.3¿Jempema noetaka naaka, eero otzimi-motantana niyotani, nokijo-shire-wentantyaawori pikaminaan-tziri?Noñaawae-tashi-waetaka naaka, teemaeta nokemathatziro noñaawae-tziri,Tema omapokakina tee noñaapiintziro naaka awijimotakinari, osheki okompi-tzimo-takina.4Pikemi, nokoyi noñaanatemi.Pakina okaatzi nojampi-timiri, piyoteena eejatzi.5Tema nokema-shitzimi piñaawaetzi, tee noñiimae-tzimi,Rooma nimaeka noñaakimi, naminakimi koñaatziro.6Rootaki owatsima-waeta-kinari naaka,Noñiiro nojeeka-waematsitaki jamampoki, eejatzi kaahashi-mashiki iñaantee-tinari nopakahaero noñaawae-tashi-waetari.Rapiiteeniri Tajorentsi irika Job Otzimi-moteeri
10Ikanta ramana-kotakari Job itsipamintha-tani-paeni, ikantakaa-kawo Tajorentsi awijimo-teeri ikemaatsi-waeta-kari. Tema ipaperoteeri osheki tzimimo-teerini Job, awijanakiro osheki-perotzi okaatzi tzimimo-witariri ketziroeni.11Ipokaeya-kini rirentzi, ritsiro-paeni, eejatzi ikaatzi yotziriri paerani. Rakiyoteeya-kirini ipankoki. Osheki imoshireta-kayitakiri, ikantziri: “¡Aapa! Osheki rowashironkaa-kimi Tajorentsi, patsipe-takawo pikemaatsi-waeta-ka.” Ipashiyi-tapaakari ikaatzi areetaka-riri ipankoki, eenitatsi pakiriri koriki, itsipa ipayitakiri kantatepokitachari ooro.12Itajonka-wenteeri Tajorentsi irika Job, rawijakaa-kiri jempe ikantawita ketziroeni. Osheni-pero-tanee ipirayitari.13Itzimae 7 itomi, eejatzi mawa rishinto.