Kuwi41hch_wb2
1»¿Haxi kwaitsɨkɨ pemukwaitsɨpiya petiyɨwe,yatɨni nenieya tihɨayamekɨ pemɨhuani?2¿Petiyɨwe kaunari mɨtse'ikɨ tsurieyatsie pemenuhɨanikɨ,yatɨni 'aurieyatsie 'iwipamekɨ pemanuyexawariya?3¿'Aixɨa 'anemekɨ metitahuaweyatɨni kename pe'inenimayaka tiutaineni?4¿Kamɨtsɨ tɨratu tiwewieni 'ahamatɨayuheyemekɨ ti'a'uximayatsiriwame mayanikɨ?5¿Mɨkɨ hamatɨa petiutiwaikawe wikixi kepemɨtiwarutiwaika hepaɨ,yatɨni pemihɨanikɨ 'aniwema memixeiyanikɨ?6¿Tetuayamete memituanikɨ meteyɨwawe,yatɨni 'etsipepeme memɨtixitexɨanikɨ me'ituanike?7¿Pitsikate nawieya hetsie pemuyehatɨaxɨani petiyɨwe,yatɨni 'ɨrɨ mu'uyatsie?8Xɨka hetsiena 'amamakɨ peheutimeni,hatsuaku mɨkɨ kemetiutamikɨ pepɨkahatɨmaiya,meta tawari yapemiyurienikɨ pepɨka'awaɨriyari.9Yakɨ xeikɨa mɨyapepɨtiku'eriwa pe'iwiyamɨtɨ,xɨka 'ixeiyatɨtɨ xeikɨa kaneuyuyehɨamɨkɨ.10Xewitɨ kaniumawe miyehaxɨatɨanikɨ.¿Kemɨ'ane kamɨtsɨ pɨyɨwe mitamienikɨ?11¿Kemɨ'ane tixaɨtɨ pɨrexeiya nemɨrekapitɨanikɨ?Naitɨ mɨtixuawe muyuawi hetɨa mɨkɨ katininepiinitɨni.12»Mɨkɨ teuriteya kemɨ'anenekɨ nepɨkayɨwe ne'ikuxatatɨ nemɨtihayewanikɨ,kemɨtitɨrɨkaɨyekɨ meta witsikemɨ'anekɨ.13¿Kepaikɨ pɨyɨwe mitikemaripienikɨ 'ixiparaya minawairienikɨ?¿Kepaikɨ paye'awe hetsɨana tepɨa mitakeitsitɨanikɨ?14¿Kepaikɨ puyuwaɨriya menutatetapienikɨ,tameteya mɨtsetse'i mɨxeiyakɨ mumamariwawe?15Yuwari'ɨtɨa 'etsiyeyeutɨ tepɨa memanetɨkani hepaɨ kani'aneni,mɨkɨ naitɨ yuwiyatɨkaitɨ tɨrɨkawitɨ,16yemekɨ hurawa kani'uka,'eka tɨma watsata pɨkaheuyeyeika,17xexuitɨ kaniyuwiyatɨkani,yunaitɨ kaniyuwiyatɨkani, 'ateewa mi'uitɨani pɨkayɨwe.18Yuhɨtsiyakɨ xawatɨriya kanitanenetsitɨwani,hɨxiteya tau 'ɨrɨya ximeri mieme hepaɨ katinimatsiɨkɨni.19Tetana tai kanayeneikani,tai tsipurikiyari kaniwayeneikani.20Yutsurita kɨtsi kaniwakanenetsitɨwani,xari haka taiyari hetsie 'uyekaitɨ mukwanani hepaɨ.21Yu'iiyakɨ tɨxari kanikutaiyani,meta tai tetana kanayeneikani.22Kɨipieyatsie tɨrɨkariyaya kaniyekani,mɨkɨ hɨxie, yunaitɨ teɨteri mepɨkayukuwawaɨriya.23Nawiyari tse'itɨ kaniyuwiyani,pɨtiwiya yemekɨ pɨkayuyuitɨarinɨa.24Tawieya kanitse'ini, 'ayepari hepaɨ,tse'itɨ tete tɨxɨme hepaɨ,25Kepauka manukukenitsie, memɨtɨrɨkawi mekaniutimamaweni,kepauka muyutakatsetsie mekaniuyuta'unani.26Tsepa 'ixipara menuku'axixɨ 'atsipɨka'iyurieni,meta 'ɨrɨ pɨkatikwinitɨani,meta pitsika meta 'ɨrɨ 'amɨtɨtɨ.27Tepɨa mɨaxa hepaɨ pɨtimate,purunitseta kɨye mɨpɨnini hepaɨ.28'Ɨrɨkɨ mitaweiya pɨkayɨwe,tete tewɨpametsie mieme xatsi hepaɨ katinixeiyani.29Tete tsunamekɨ xeikɨa kanikutsikɨtɨwani,kaniutanaweni pitsika yuariyayakɨ.30Yutawitsie xari tarimeyari kaneuka'uitɨakakwietsanari huyerieya pewewietɨyeika.31'Ameukatewa watsu tikwaniyameta hepaɨ katinikwaniyani,haramara putatake witsimu'ɨa puteyutsie mɨyemaka hepaɨ.32Hamewari tuxame 'utimerɨkame yu'ɨtɨma kaniuhayewarɨmeni,'ameukatewa kɨpaya mutuxani hepaɨ pɨtiyuxexeiya.33Mɨkɨ mumariwe tixaɨtɨ mɨkatimakaxe kanihɨkɨtɨni,xewitɨ kwiepa kaniumaweni hepaɨna 'anetɨ.34Yunaime memɨtɨrɨkawi tixaɨtɨ memɨkatehɨmetɨni hepaɨ katiniwaxeiyani,memuyuti'ɨre yunaime katiniwa'aitɨwametɨni».