Obulangâlire kuli Nyamuzinda
1Oku bundi Elifazi w’e Temani, acîhira eluhya aderha, erhi:2K’owakubwîra akanwa wankakalinda obu? Ci kwône kurhi omuntu ankabulaga bwaderha!3Kengêra oku wahanwîre bantu banji, amaboko gajogonokirwe wakazigahà ensimikiro;4ihano lyâwe lyakazizibuhya àbalikola bagwâgwâbira, lyakazizibuhya amadwî galikola gakomanya.5Lêro obu olwâwe lwamabimba, w’oyu warhiba olujò, okwenge wamâhikwako, gukolaga mutula n’obwôba!6K’orhankacîkubagirage obukûnda-Lulema bwâwe, n’obushinganyanya bw’enjira yâwe, kali bwo bulangâlire bwâwe?7Ocîdôse bwinjà: k’okola obwîne omwêru-kwêru aherêrekera? Ngahi wabwîne abashinganyanya baholoka?8Nabwîne ebyâhira n’ebyahirûka, ebiru n’ebidukula, abahinga amaligo, bamîre n’amahanya, byo banasârûla.9Nyamuzinda akanabarhulirakwo omûka gwâge, banalàngalire, omuhusi gw’oburhè bwâge gwonene gunabahungumule.10Omulûmbo gw’entale, omukûngulo gw’ec’erubala, kuhuba guhuba kula amîno g’entale ntò gahôhoka.11Entale ekabula eci yalya enafè, n’abâna bâyo bashandabane.12Nâni nabwîne nayaganwa bushâla-shâla, nanayumva amarhwîri gâni gahema.13Omu ntuliranyè y’ebilôrho, gala mango irò linene ligonza abantu,14nayûmva nagurumanwa, nageramwo ogwa nyegenye, orhuvuha rhwâni rhwajuguma.15Okubundi ehy’olubohôlolo hyangera ebusû, olôya lwandiko lwashingalala.16Oli nka muntu ayimanga, ntamanyiriraga obusù bwâge, ci enshusho yâge yambêra omu masù. Harhengibà akahwenyenye…, buzinda nayumva izù, erhi:17«K’omuntu ankabà mushinganyanya embere za Nyamuzinda? K’omuntu ankabà mwêru-kwêru omu masù gw’Owamulemaga?18Ciru Nyamuzinda arhacîkubagira lwoshi bambali bâge, na bamalahika anababonekwo obubî.19Ntà buderhe oku bantu bayûbaka muli eri ibumba, abà eciriba câbo cibà cihûmbe omu katulo? Anabasinogole nka nsîrhu;20Abanaganukira oku lusiku luguma, abaherêrekera na ntâye wacibakengera.21Omugozi gw’ecihando câbo gukonoke, banafè n’okubula oburhimanya».