Read أَيُوبْ 4

أَيُوبْ4rif_ati

ڒْحَارْضْ أَمزْوَارُو ن إِلِيفَازْ: كْسِي أَوبّخْ ن أَربِّي!

¹خنِّي يَارَّا-د إِلِيفَازْ، ونِّي د-يُوسِينْ زِي ثَايْمَانْ، إِنَّا:

²مَاڒَا حذْ يَارْزُو مَاحنْذْ أَذْ كِيكْ إِسِّيوڒْ، مَا وَارْ ثتّْوَاشضْنذْ قَاعْ س مَانْ أَيَا؟ مَاشَا مَانْ ونْ إِزمَّارنْ أَذْ إِسّْبدّْ ڒْهَارْذْ نّسْ؟³خْزَارْ، ثسّْغَارذْ أَطَّاسْ ن إِوْذَانْ ؤُ إِفَاسّنْ يَارْخُونْ ثسّْمحْضذْ إِ-ثنْ.⁴ونِّي إِنْقَارْضنْ، ثسّْبدّذْ إِ-ث س وَاوَاڒْ نّشْ، ؤُ إِفَادّنْ إِفشْڒنْ ثوْشِيذْ أَسنْ جّهْذْ عَاوذْ.⁵مَاشَا ڒخُّو إِمْسَارْ أَيَا إِ شكْ، ثتّْوَاشضْنذْ قَاعْ، ڒخُّو إِڒْقفْ إِ شكْ أَيَا ؤُشَا ثَارجْفذْ.

⁶مَا وَارْ ثدْجِي ثِيڭّْوُوذِي زِي أَربِّي ذ ڒَامَانْ نّشْ ؤُ ڒصْفَايثْ ن إِبْرِيذنْ نّشْ ذ ڒَايَاسْ نّشْ؟⁷خمّْ مَاشَا! مَانْ ونْ إِتّْوَاهلّْكنْ أَمْ إِدْجَا ذ أَمزْذَاڭْ ؤُ مَانِي تّْوَاثحَّانْ إِنِّي إِڭُّورنْ نِيشَانْ؟⁸ژْرِيغْ أَقَا إِنِّي إِشَارّْزنْ دّدْجْ ذ يِينِّي إِزَارّْعنْ ڒغْبنْ، أَذْ ث مْجَارنْ عَاوذْ.⁹أَذْ هلّْكنْ زڭْ ؤُسُوضِي ن نّفْسْ ن أَربِّي، أَذْ فْنَانْ س ؤُسُوضِي زڭْ ونْزَارنْ نّسْ.¹⁰زّْهِيرْ ن ويْرَاذْ ذ ثْمِيجَّا ن يِيزمْ أَمژْيَانْ أَذْ تّْوَاسّْبدّنْ ؤُ ثِيغْمَاسْ ن وَايْرَاذنْ إِمژْيَاننْ أَذْ تّْوَارْژَانْثْ.¹¹أَذْ إِهلّكْ وَايْرَاذْ، مِينْزِي وَارْ يُوفِي زَّارْذثْ، ثَارْوَا ن ثَايْرَاذْثْ أَذْ تّْوَابزّْعنْ.

¹²ذِي ثْنُوفّْرَا يِيوضْ أَيِي-د إِجّْ ن وَاوَاڒْ، أَمزُّوغْ إِنُو إِطّفْ زَّايسْ ڒحْمِيسْ،¹³أَمْ ثُوغَا غَارّْقغْ ذڭْ إِخَارِّيصنْ إِسِّيڭّْوِيذنْ زڭْ إِوحَّانْ ن دْجِيڒثْ، ڒَْامِي د-إِوْضَا يِيضصْ يُودْجْغنْ خْ إِوْذَانْ.¹⁴ثڒْقفْ أَيِي ثِيڭّْوُوذِي ذ ثَارْجِيجِيثْ، مَارَّا إِغْسَانْ إِنُو نّْخڒْعنْ.¹⁵إِجّْ ن بُوحْبڒْ إِحْرَارَا خْ ؤُغمْبُوبْ إِنُو، إِسّْبدّْ أَشُوَّافْ ذِي أَرِّيمثْ إِنُو.¹⁶نتَّا إِبدّْ، مَاشَا وَارْ عْقِيڒغْ خْ ثفْرَاسْ نّسْ. إِجّْ ن وَادُّوذْ إِبدّْ زَّاثْ إِ ثِيطَّاوِينْ إِنُو. خنِّي سْڒِيغْ إِ ثْمِيجَّا ثتّمْثِيمْ، ثقَّارْ:

¹⁷’مَا إِزمَّارْ إِجّْ ن بْنَاذمْ أَذْ يِيڒِي إِسڭّذْ خْ أَربِّي؟ مَا إِزمَّارْ إِجّْ ن ورْيَازْ أَذْ يِيڒِي إِصْفَا خْ ونِّي ث إِڭِّينْ؟‘¹⁸خْزَارْ، وَارْ إِتّْشِيڒِي ؤُڒَا خْ إِمْسخَّارنْ نّسْ، إِڭَّا ڒْعِيبْ عَاذْ أَكْ-ذ لْمَالَاكَاثْ نّسْ ؤُمِي ودَّارنْثْ.¹⁹مَاهُو إِنِّي إِزدّْغنْ ذِي ثُوذْرِينْ ن ؤُشَاڒْ، إِنِّي غَارْ ثدْجَا ثْعجَّاجْثْ ذ ذْسَاسْ نْسنْ. أَقَا أَذْ تّْوَاڒبْزنْ أَمزْوَارْ خْ ثْشِينْذَا.²⁰زِي ثُوفُّوثْ ن صّْبحْ أَڒْ ثَامذِّيثْ أَذْ تّْوَافَارْثْكنْ. بْڒَا إِ إِوْشَا بْنَاذمْ ثَايْنِيثْ إِ مَانْ أَيَا، أَذْ فْنَانْ إِ ڒبْذَا.²¹مَا وَارْ د-ثتّْوَاقْڒعْ غَارْسنْ ثسْغُونْثْ ن ؤُقِيضُونْ نْسنْ ن أَرِّيمثْ؟ أَذْ مّْثنْ، مَاشَا وَارْ إِدْجِي ذِي ثِيغِيثْ.

أَيُوبْ 4 / rif_ati

ڒْحَارْضْ أَمزْوَارُو ن إِلِيفَازْ: كْسِي أَوبّخْ ن أَربِّي!

أَيُوبْ4rif_ati