Kuwi39hch_wb2
1»¿Petimate kepauka kwaxuri memɨtitawaya?¿Maxatsi petiwaxexeiya kepauka memɨtiniweyatsie?2¿Petimate kepaɨmexɨa metseriyari memukuyuruwa?¿Petimate kepauka memɨtiniweya?3Kepauka yuniwema muwarayexeiya kananakatutsitani,kukuiniyaya mana kaniu'axeni kepauka mɨtiniwenitsie.4Niwemama mekanitiwawereni meta yeuta metɨrɨkawitɨ mekanakɨkani,hikɨ mehekɨkatɨ mepɨkahanunuwari.5»¿Kemɨ'ane puxu yeutanaka putatua?¿Kemɨ'ane kaunarieya puxɨnaxɨ?6Ne kwie makumawe nekaniyetuirieni,kiena mayanikɨ mɨkarakuteitɨtsie.7Kiekaritsie tiyuariyaya pɨ'atse,meta ti'ikatɨwame hiwarieya pɨka'enie.8Yemuritsie puyeika yu'ikwai tikuwaunetɨ,kwiepa mɨtitsitsiɨrawi tiwaunetɨ.9»¿'Ekɨ yuri peti'erie kename turu yeutanaka yuwaɨriya matita'uximayatsirienikɨ?¿'Akuraruta tɨkarikɨ tiuyuhayewawe?10¿Petiyɨwe xɨka pe'itamu'uyaritɨani kaunarikɨ xuruku mɨtiwewienikɨ?¿'A'ɨtɨma mumieni 'ukwietsanarɨmetɨ tiyɨwe?11¿'Ekɨ hetsiena petiwiya mɨkɨ waɨkawa mɨtɨrɨkaɨyekɨ?¿Waɨkawame kepemɨti'uximaya petipitɨawe mɨkɨ pɨta mɨtita'uximayatakɨ?12¿Yuri peti'erie mɨkɨ 'a'ikú mɨtitɨanikɨmeta mikuxeɨrienikɨ hakewa pemeiti'unitsie?13»'Aru 'amɨnena kaniyutemawieka yu'anate tikatsetɨ,matsi 'anateya kuaxu 'amɨnena 'anateya hepaɨ pɨka'anene.14Mɨkɨ kwiepa kanititawayani,xiekaripata kaniku'e'eiriwani mɨtitsinekɨ,15tsepanetɨ mitiketsi pɨka'ikweriwayurie,yatɨni tsepa memɨmamariwawe yeutari memitiketsi.16Yuniwema 'aixɨa pɨkatiwaxeiya hetsɨana memɨkamiemetetɨni hepaɨ,pɨkayɨhɨawe tsepanetɨ 'uximayatsikaya yakɨxeikɨa mɨratɨa,17Kakaɨyari mɨtimaiwenikɨ mɨka'ipitɨakɨmeta meitimaitɨyeikanikɨ pɨka'iyetuiri.18Matsi kepauka mutanautsatsie kwinimieme kananayeyɨneni,kawayutsixi meta yaxikemete kaniwatawe'erieka.19»¿Kawayu tɨrɨkariyaya petiyetuiri?¿Kɨipieya petiutakemaritɨa kɨpateya 'atɨtɨmekɨ?20¿'Ekɨ petihɨkɨ 'utsika hepaɨ pemɨtitsunatsitɨwa,ha'atɨ 'utapuxerɨkatɨ kemɨtiwamariuta?21Kawayu yu'utɨa kemɨranuyeketsina, yuhetsie hauyu'ɨtɨ mɨtɨrɨkaɨyekɨ,meta makuweritsie kaniutananautsani.22Marika pɨtawe'erie, tixaɨtɨ pɨkareumakaxe,pɨka'utimamawe tsepa 'ixiparakɨ mutamierie.23'Auriena 'ɨrɨ kaniukuyuatɨyeikani,kaniutixawatɨreni pitsika 'amɨtɨtɨ meta 'ɨrɨ 'amɨtɨtɨ.24Waɨkawa munautsarɨmekɨ kwitɨ kaniuye'axeni,kepauka kuxineta mutahɨtsierienitsie muwaketɨani pɨkayɨwe.25Kepauka kuxineta metayuani, kanitatsuriximɨkɨ tiyu'iwamɨtɨ,mɨreyukwitɨne 'ateewa paitɨ kani'ɨkweni,meta yukukuyamete wahiwari kani'enieka metatsiere kuyaxi tewa'aitɨwamete wahiwari.26»¿'Ekɨ kepemɨtimaiwekɨ piwame mukuwienenikɨ petipitɨameta tatsutɨa paitɨ mɨye'anikɨ 'uwiximetɨ?27¿Yapehainekaku kwixɨ 'ateewa tiuyewiwiere kuwienetɨmeta 'aheutitewakaku yu'itɨa mɨtawewienikɨ?28'Aitsie kanikieka, muwa kaniyekukutsuni,mukatataritsie 'aitsie kaniyu'awietani.29Manapaitɨ tita mɨtitakwani kanitaxeiyani,'ateewa paitɨ hɨxiteya katinikuxexeiyani.30Niwemama 'etsimemupepe mekaniyutemamawieka 'imieri xuriyayatsie,hakewa timɨkitɨ mɨreka, mana piwame kaniuyekani».