Arebbi issiweř ak-d Ayub x wexřaq n marra min iǧan
1Awarni as yarra-dd SIDI x Ayub zi tḥaryaḍt, inna:2Man wen issbarrcnen acawar, s wawařen břa tussna?3Byes xenni tijɛinnatin nnec am weryaz. Necc xseɣ ad cek sseqsiɣ u cek, arr-dd xafi!4Mani cek tuɣa umi ggiɣ Necc dsas n tammurt? Ini t mařa ɣarek řefhamet s tidett.5Man wen iggin řeɛbar nnes, wah, cek tessned tt, ma war iǧi amenni? Man wen xas imeḥḍen afiřu n řeɛbar?6Min xef hwan dsusa nnes, niɣ man wen issarsen aẓru n teɣmart nnes,7umi itran n ṣṣbeh ɣennjen jmiɛ s řefraḥet, umi sřiwřewen marra arrawen n AREBBI?8Man wen ibellɛen řebḥar s tewwura, umi dd-idduqqez uca iffeɣ-dd zeg uɛeddis n yemmas,9umi d as ggiɣ iseynuten d arruḍ nnes, ijj n useynu ibbumbes d amendiř maḥend ad dayes t ssehnunnḍeɣ,10umi d as arẓiɣ afray inu am ijj n weḥfur yuǧɣen, u umi d as ggiɣ aɛmud i ubelleɛ d tewwura,11nniɣ: ‘Ař da i dd ɣa tased, war ɛeddu. Danita ad tᵉttwassbedd nnfaxet n řemwaj nnec.’12Ma tumured cek ateffu n ṣṣbeḥ deg wussan nnec? Ma tesscaned i tfawt n řefjar amcan nnes,13maḥend ad tᵉṭṭef afriwen n temmurt, ařami ad zzayes zzerzen iɛeffanen?14Ad tedweř temmurt am tarrist sadu ṭṭabeɛ, marra timesřayin ad xas ttwassbeddent ɛawed am mammec i teǧa ijj n warruḍ.15Iɛeffanen ad asen tᵉttwakkes tfawt nsen u aɣiř ittwassgeɛɛden ad ittwarẓ.16Ma tiwḍed ɣar řɛunṣarat n řebḥar, ma tuyured ɛemmarṣ x wudem n temmurt n waman ihewřen?17Ma ttwaɛarrant tewwura n řmewt i cek, ma teẓrid tiwwura n tiři n řmewt?18Ma tᵉttawi-dd řefhamet nnec ař ineggura n temmurt? Ini t mařa tessned aya marra.19Mani iǧa webrid ɣar tzeddiɣt n tfawt? U taǧest, mani teǧa tzeddiɣt nnes,20ḥima ad tzemmared ad tt tnedhed ɣar wemcan nnes, u ad tessned mliḥ imesraq ɣar taddart nnes?21Cek aqa tessned man aya niɣ, minzi cek tuɣa txeřqed, niɣ lla? U ma war iǧi řqedd n wussan nnec d aṭṭas?22Ma tudfed ɣar ixxamen n řexzen n wedfeř, ma teẓrid řehrit n tebruri,23nni x ceṭṭareɣ i řweqt n řeḥṣaret, i wass n garra d umenɣi?24Mani iǧa webrid ittbeṭṭan tifawt, uřa d abrid i zi ittwabezzeɛ usemmiḍ n ccarq x temmurt?25Man wen ifeǧeq řmizab i řḥemřet n wenẓar, uřa d abrid i wassam n wajjajen26ḥima ad issekk anẓar x temmurt nni di war izdiɣ ḥed, x řexřa i war di izdiɣ uřa d ijj,27ḥima ad issarwa jjwayeh ixřan u ittwaxřan u ḥima ad isseɣmi arbiɛ d ṭṭri?28Ma anẓar ɣares ca n babas, niɣ man wen i dd-ittejjan tuddimin n nnda?29Zi man aɛeddis i zi dd-iffeɣ wejris, u nnda ijersen n ujenna, wi i-t-i-dd-yurwen?30Ddakkwařen waman am weẓru uca ijars wudem n waman ihewřen.31Ma tzemmared ad tcedded Agraw n Sebɛa n Yetran, niɣ tfessyed ssnaseř n yetran n Uriyun?32Ma tzemmared ad dd-tessuffɣed itran n Zudyak ɣar řḥař nsen, uřa d Ddub Ameqqran ak-d tarwa nnes?33Ma tessned izerfan n ujenna, niɣ tzemmared ad tḍebbared x uqarri nsen di temmurt?34Ma tzemmared ad tessgeɛɛded ɣar iseynuten tmijja nnec, ařami cek i ɣa tdeř ict n řḥemřet n waman?35Ma tzemmared ad tessekked assamen maḥend ad qeǧqen, ad ac inin: ‘Aqa-neɣ da’?36Man wen issarsen tiɣit di daxeř n bnadem? Niɣ man wen iwcin řefhamet i řeɛqeř?37Man wen ifarrzen iseynuten s řeɛqeř, iɣarrafen n waman n ujenna wi ten ittzeǧaɛen,38ařami ittwafsiy ucař, idweř d abeǧaɛ, uca řesqen ibursa n temmurt?39Ma tzemmared ad tᵉṭṭfed zzardet i tayradt, niɣ ad tesseřhud řaẓ n wayraden imeẓyanen,40řami nuffaren deg ifran nsen, u ttḥaman zi řemrageḥ nsen?41Man wen issewjaden i ubaɣeř macca nnes, xmi sɣuyyun imeẓyanen nnes ɣar Arebbi, xmi ttemhafan nhřa macca?