Read أَيُوبْ 38

أَيُوبْ38rif_ati

أَربِّي إِسِّيوڒْ أَكْ-ذ أَيُوبْ خْ وخْڒَاقْ ن مَارَّا مِينْ إِدْجَانْ

¹أَوَارْنِي أَسْ يَارَّا-د سِيذِي خْ أَيُوبْ زِي ثْحَارْيَاضْثْ، إِنَّا:

²مَانْ ونْ إِسّْبَارّْشْننْ أَشَاوَارْ، س وَاوَاڒنْ بْڒَا ثُوسّْنَا؟³بْيسْ خنِّي ثِيجْعِينَّاثِينْ نّشْ أَمْ ورْيَازْ. نشّْ خْسغْ أَذْ شكْ سّقْسِيغْ ؤُ شكْ، أَرّْ-د خَافِي!

⁴مَانِي شكْ ثُوغَا ؤُمِي ڭِّيغْ نشّْ ذْسَاسْ ن ثَامُّورْثْ؟ إِنِي ث مَاڒَا غَاركْ ڒفْهَامثْ س ثِيذتّْ.⁵مَانْ ونْ إِڭِّينْ ڒعْبَارْ نّسْ، وَاهْ، شكْ ثسّْنذْ ت، مَا وَارْ إِدْجِي أَمنِّي؟ مَانْ ونْ خَاسْ إِمحْضنْ أَفِيڒُو ن ڒعْبَارْ؟⁶مِينْ خفْ هْوَانْ ذْسُوسَا نّسْ، نِيغْ مَانْ ونْ إِسَّارْسنْ أَژْرُو ن ثغْمَارْثْ نّسْ،⁷ؤُمِي إِثْرَانْ ن صّْبهْ غنّْجنْ جْمِيعْ س ڒفْرَاحثْ، ؤُمِي سْڒِيوْڒونْ مَارَّا أَرَّاونْ ن أَربِّي؟

⁸مَانْ ونْ إِبلّْعنْ ڒبْحَارْ س ثوُّورَا، ؤُمِي د-إِدُّوقّزْ ؤُشَا إِفّغْ-د زڭْ ؤُعذِّيسْ ن يمَّاسْ،⁹ؤُمِي ذ أَسْ ڭِّيغْ إِسيْنُوثنْ ذ أَرُّوضْ نّسْ، إِجّْ ن ؤُسيْنُو إِبُّومْبسْ ذ أَمنْذِيڒْ مَاحنْذْ أَذْ ذَايسْ ث سّهْنُونّْضغْ،¹⁰ؤُمِي ذ أَسْ أَرْژِيغْ أَفْرَايْ إِنُو أَمْ إِجّْ ن وحْفُورْ يُودْجْغنْ، ؤُ ؤُمِي ذ أَسْ ڭِّيغْ أَعْمُوذْ إِ ؤُبلّعْ ذ ثوُّورَا،¹¹نِّيغْ: ’أَڒْ ذَا إِ د غَا ثَاسذْ، وَارْعدُّو. ذَانِيثَا أَذْ ثتّْوَاسّْبدّْ نّْفَاخثْ ن ڒمْوَاجْ نّشْ.‘

¹²مَا ثُومُورذْ شكْ أَثفُّو ن صّْبحْ ذڭْ وُوسَّانْ نّشْ؟ مَا ثسّْشَانذْ إِ ثْفَاوْثْ ن ڒفْجَارْ أَمْشَانْ نّسْ،¹³مَاحنْذْ أَذْ ثطّفْ أَفْرِيونْ ن ثمُّورْثْ، أَڒَامِي أَذْ زَّايسْ زّرْزنْ إِعفَّاننْ؟¹⁴أَذْ ثذْوڒْ ثمُّورْثْ أَمْ ثَارِّيسْثْ سَاذُو طَّابعْ، مَارَّا ثِيمسْڒَايِينْ أَذْ خَاسْ تّْوَاسّْبدّنْثْ عَاوذْ أَمْ مَامّشْ إِ ثدْجَا إِجّْ ن وَارُّوضْ.¹⁵إِعفَّاننْ أَذْ أَسنْ ثتّْوَاكّسْ ثْفَاوْثْ نْسنْ ؤُ أَغِيڒْ إِتّْوَاسّْڭعّْذنْ أَذْ إِتّْوَارْژْ.

¹⁶مَا ثِيوْضذْ غَارْ ڒْعُونْصَارَاثْ ن ڒبْحَارْ، مَا ثُويُورذْ عمَّارْصْ خْ وُوذمْ ن ثمُّورْثْ ن وَامَانْ إِهوْڒنْ؟¹⁷مَا تّْوَاعَارَّانْثْ ثوُّورَا ن ڒْموْثْ إِ شكْ، مَا ثژْرِيذْ ثِيوُّورَا ن ثِيڒِي ن ڒْموْثْ؟¹⁸مَا ثتَّاوِي-د ڒفْهَامثْ نّشْ أَڒْ إِنڭُّورَا ن ثمُّورْثْ؟ إِنِي ث مَاڒَا ثسّْنذْ أَيَا مَارَّا.¹⁹مَانِي إِدْجَا وبْرِيذْ غَارْ ثْزذِّيغْثْ ن ثْفَاوْثْ؟ ؤُ ثَادْجسْثْ، مَانِي ثدْجَا ثْزذِّيغْثْ نّسْ،²⁰حِيمَا أَذْ ثْزمَّارذْ أَذْ ت ثْنذْهذْ غَارْ ومْشَانْ نّسْ، ؤُ أَذْ ثسّْنذْ مْلِيحْ إِمسْرَاقْ غَارْ ثَادَّارْثْ نّسْ؟²¹شكْ أَقَا ثسّْنذْ مَانْ أَيَا نِيغْ، مِينْزِي شكْ ثُوغَا ثْخڒْقذْ، نِيغْ لَّا؟ ؤُ مَا وَارْ إِدْجِي ڒْْقدّْ ن وُوسَّانْ نّشْ ذ أَطَّاسْ؟

²²مَا ثُوذْفذْ غَارْ إِخَّامنْ ن ڒخْزنْ ن وذْفڒْ، مَا ثژْرِيذْ ڒهْرِيثْ ن ثبْرُورِي،²³نِّي خْ شطَّارغْ إِ ڒْوقْثْ ن ڒحْصَارثْ، إِ وَاسّْ ن ڭَارَّا ذ ؤُمنْغِي؟²⁴مَانِي إِدْجَا وبْرِيذْ إِتّْبطَّانْ ثِيفَاوْثْ، ؤُڒَا ذ أَبْرِيذْ إِ زِي إِتّْوَابزّعْ ؤُسمِّيضْ ن شَّارْقْ خْ ثمُّورْثْ؟²⁵مَانْ ونْ إِفدْجقْ ڒْمِيزَابْ إِ ڒْحمْڒثْ ن ونْژَارْ، ؤُڒَا ذ أَبْرِيذْ إِ وَاسَّامْ ن وَاجَّاجنْ²⁶حِيمَا أَذْ إِسّكّْ أَنْژَارْ خْ ثمُّورْثْ نِّي ذِي وَارْ إِزْذِيغْ حذْ، خْ ڒخْڒَا إِ وَارْ ذِي إِزْذِيغْ ؤُڒَا ذ إِجّْ،²⁷حِيمَا أَذْ إِسَّارْوَا جّْوَايهْ إِخْڒَانْ ؤُ إِتّْوَاخْڒَانْ ؤُ حِيمَا أَذْ إِسّغْمِي أَرْبِيعْ ذ طّْرِي؟

²⁸مَا أَنْژَارْ غَارسْ شَا ن بَابَاسْ، نِيغْ مَانْ ونْ إِ د-إِتّجَّانْ ثُوذِّيمِينْ ن نّْذَا؟²⁹زِي مَانْ أَعذِّيسْ إِ زِي د-إِفّغْ وجْرِيسْ، ؤُ نّْذَا إِجرْسنْ ن ؤُجنَّا، وِي إِ-ث-إِ-د-يُورْونْ؟³⁰دَّاكّْوَاڒنْ وَامَانْ أَمْ وژْرُو ؤُشَا إِجَارْسْ وُوذمْ ن وَامَانْ إِهوْڒنْ.

³¹مَا ثْزمَّارذْ أَذْ ثْشدّذْ أَڭْرَاوْ ن سبْعَا ن يثْرَانْ، نِيغْ ثْفسّْيذْ سّْنَاسڒْ ن يثْرَانْ ن ؤُرِييُونْ؟³²مَا ثْزمَّارذْ أَذْ د-ثسُّوفّْغذْ إِثْرَانْ ن زُوذْيَاكْ غَارْ ڒْحَاڒْ نْسنْ، ؤُڒَا ذ دُّوبْ أَمقّْرَانْ أَكْ-ذ ثَارْوَا نّسْ؟³³مَا ثسّْنذْ إِزرْفَانْ ن ؤُجنَّا، نِيغْ ثْزمَّارذْ أَذْ ثْضبَّارذْ خْ ؤُقَارِّي نْسنْ ذِي ثمُّورْثْ؟

³⁴مَا ثْزمَّارذْ أَذْ ثسّْڭعّْذذْ غَارْ إِسيْنُوثنْ ثْمِيجَّا نّشْ، أَڒَامِي شكْ إِ غَا ثْذڒْ إِشْثْ ن ڒْحمْڒثْ ن وَامَانْ؟³⁵مَا ثْزمَّارذْ أَذْ ثسّكّذْ أَسَّامنْ مَاحنْذْ أَذْ قدْجْقنْ، أَذْ أَشْ إِنِينْ: ’أَقَا-نغْ ذَا‘؟³⁶مَانْ ونْ إِسَّارْسنْ ثِيغِيثْ ذِي ذَاخڒْ ن بْنَاذمْ؟ نِيغْ مَانْ ونْ إِوْشِينْ ڒفْهَامثْ إِ ڒعْقڒْ؟³⁷مَانْ ونْ إِفَارّْزنْ إِسيْنُوثنْ س ڒعْقڒْ، إِغَارَّافنْ ن وَامَانْ ن ؤُجنَّا وِي ثنْ إِتّْزدْجَاعنْ،³⁸أَڒَامِي إِتّْوَافْسِييْ ؤُشَاڒْ، إِذْوڒْ ذ أَبدْجَاعْ، ؤُشَا ڒسْقنْ إِبُورْسَا ن ثمُّورْثْ؟

³⁹مَا ثْزمَّارذْ أَذْ ثطّْفذْ زَّارْذثْ إِ ثَايْرَاذْثْ، نِيغْ أَذْ ثسّڒْهُوذْ ڒَْاژْ ن وَايْرَاذنْ إِمژْيَاننْ،⁴⁰ڒَامِي نُوفَّارنْ ذڭْ إِفْرَانْ نْسنْ، ؤُ تّْحَامَانْ زِي ڒمْرَاڭحْ نْسنْ؟⁴¹مَانْ ونْ إِسّوْجَاذنْ إِ ؤُبَاغڒْ مَاشَّا نّسْ، خْمِي سْغُويُّونْ إِمژْيَاننْ نّسْ غَارْ أَربِّي، خْمِي تّمْهَافَانْ نْهْڒَا مَاشَّا؟

أَيُوبْ 38 / rif_ati

أَربِّي إِسِّيوڒْ أَكْ-ذ أَيُوبْ خْ وخْڒَاقْ ن مَارَّا مِينْ إِدْجَانْ

أَيُوبْ38rif_ati