Kuwi38hch_wb2

Kakaɨyari Kuwi kemɨtiuta'ei

1Yawé Kuwi kaniuta'eiya 'eka waɨkawa tɨrɨkaɨyemetsie. Mɨpaɨ katinitahɨawe:2«¿Kemɨ'ane 'ikɨ pɨyɨane, ne'ɨxatsi hepaɨtsita mɨ'iyɨrie,'atsikatiyumainɨakamekɨ 'utaniutɨ?3Kene'akuha'aritɨa pemɨnetsita'eiyakɨ,ne nepɨmatsita'iwawiya, 'ekɨta pepɨnetsita'eiya.
4»¿Hakewa pepeyeikakai kepauka kwie tsutɨmeyari nemutawewitsie?Keneneutaxatɨa, xɨka 'aku yemekɨ petiuyemaika.5Xɨari pepɨtimate kemɨ'ane miti'inɨataxɨmeta kemɨ'ane ti'inɨnɨatamekɨ mi'inɨataxɨ.6¿Tsutɨmeyari ketita hetsie ratei,yatɨni kemɨ'ane tete tsikuritana mieme pukaye7mexixi me'utikwikakai xurawetsixi ximeri miemetemeta yunaitɨ niuki tuayamete meyutemamawietɨ me'utihiwakai?
8»¿Kemɨ'ane haramara muwatinetsie pɨreunakepauka kwie taɨta muwatitekixɨtsie?9¿Kepauka haiwitɨrikɨ nemitikemaritɨameta kepauka yɨriya 'e'ayetsuimekɨ nemita'eimaxɨ?10¿Kepauka hakewa meye'atɨkanikɨ nemipitɨameta kitenieyatsie mɨreukukeka nemeukutetsie?11¿Yatɨni kepauka 'ipaɨ nemɨtitahɨawixɨ: “'Ena xeikɨa pepɨye'atɨyeikani,'ena 'ahamewari 'amɨnene pɨka'anutitsukwakani”?
12»¿Heiwamiemeri pe'uyeikatɨ ximeri petiuta'aitɨa,yatɨni tau 'ɨrɨya hakewa meukakɨxé petitaxatɨa,13kwie kemɨyewa manuye'atɨkatsie paitɨ mɨye'anikɨmeta mɨkɨkɨ yunaime 'axamemɨte'u'iyari muwakuyuitɨanikɨ?14Kwie puyukupata, haxu tseyu hetɨa hepaɨ,'ixuriki witsimɨ'ane mukatutuni hepaɨ 'anetɨ kanayuyeitɨwani.15'Axateyuruwamete hekɨaripana mepayeweweiyarɨwa,meta watɨrɨkariya mɨyuti'ɨre pɨka'unarɨwa.
16»¿Haramara haixayari hakewa metineika peremarie,meta perekuyeixɨari meukatetewatsie paitɨ?17¿Mɨki kitenie petiuxeiyatsitɨarie?¿Waɨkawa muyeyɨwi kitenie petiuxei?18¿Petimate kwie kemɨyewa?Xɨka yurikɨ 'ikɨ naime petimaika, kenetineutaxatɨa.
19»¿Ke'anetɨ huye hekɨaripa mieme pɨhɨkɨ?¿Hakewa pɨre'ane yɨriya mexuawe?20¿Petiyɨwe wakwie manuye'atɨkatsie pemɨwarewitɨni?¿Wahuye memakuteitsie mieme kemɨreuyune petimate?21Yemekɨ pepɨtimate,'anari xɨari peputinuiwakai.Mɨixari wiyari pepuyeika.
22»¿Pe'ixeiyake pereutahari'ɨwi teeyari muyexeɨrietsie,23nemi'uta kepauka nemuwa'uximatɨanitsie,kuyaxa miemetsie meta mɨtiyutakwitɨtsie?24¿Ke'anetɨ huye pɨhɨkɨ hakewa xawatɨriya mɨtakɨkatsie,yatɨni hakewa 'eka tau manatineikatsiekwiepa mayeneika?25¿Kemɨ'ane haa peuyepiwa waɨkawa mɨkawiyekɨ,meta kemɨ'ane wiyeri mɨtɨrɨkaɨye pupitɨa,26teɨteri memɨkahakuteitsie mɨkahatuanikɨ,meta makumawetsie xewitɨtɨma mɨkahekietsie,27kwie makuwaki muyunakɨmeta mana tupiriya mɨtinenikɨ?28¿Kamɨtsɨ wiyeri yupaapa rexeiya?¿Xewitɨ haɨtsi tiutinuiwitɨa?29¿Hakewa 'ɨwi peyenunuiwa?¿Kemɨ'ane pitinuiwitɨwa tee muyuawitsie mieme?30Haa 'ayepari hepaɨ katiniutse'ireni,meta haramara 'amatiyewa kaniuxexereni.
31»¿Kamɨtsɨ Tsimanixi memɨwiwietɨka petiwarakɨwɨtɨawe,mexɨkatɨni Terɨka kaunariyari pemɨxɨna?32¿Petiyɨwe muyuawitsie memɨteka'u xurawetsixitɨtɨ ximeripaitɨ pemuwaranetɨani?¿Hararu 'Amupa petiuta'aitɨawe kepauka maneikanikɨ meta Hararu yakɨ mupe?33¿Petimate ke'anenetɨ 'aitsikate muyuawitsie mɨti'aita?¿Pemɨtiwata'aitɨanikɨ yunaime 'ena kwiepa petiyɨwe?
34»¿Petiyɨwe haiwitɨri pemutahiwieni'ahetsie wiyeri waɨkawa mɨkaxɨrienikɨ?35¿'Ekɨ petihɨkɨ mimierɨka pemɨhekɨata?¿Kamɨtsɨ mɨpaɨ memeteku'eiya: “'Ena tepɨti'u kepehaineni”?36¿Kemɨ'ane kuaxu mɨtimaiwenikɨ piyetuiri,yatɨni kemɨ'ane wakana 'ukiri meitimaitɨyeikanikɨ pupitɨa?37¿Kemɨ'ane pɨtimaiwe haiwitɨri puti'inɨatawe?¿Kemɨ'ane pɨyɨwe xarite muyuawitsie mieme metiyeuriexɨanikɨ38kepauka kwie mɨtse'iremeta hapukwa mɨnararaninitsie?
39»¿'Ekɨ mayetsi 'ukari wa'ikwai petixɨ'eriemeta mayetsi tɨɨrixi petiwahuxaitɨa40kepauka terɨta memɨyu'awietayatɨni kepauka mehupatɨ 'amemukuhe?41¿'Ekɨ petihɨkɨ kwatsari pemɨtiwamikwakepauka waniwema memɨteha'iwawa nehetsɨa,meta kepauka memeu'uwa xeikɨa mekatekwatɨ?
expand_more
Search