Akemmeř n řhard wiss arebɛa n Ilihu: řemɣaret n Arebbi di ṭṭabiɛa
1Wah, s uya ittarjij wuř inu, ineṭṭu zeg wemcan nnes.2Sřem mliḥ i zzhir n tmijja nnes, i wejdab n wajjaj i dd-ittekken zeg uqemmum nnes.3Issekk i-t sadu marra ajenna, uca issekk tafawt nnes ař ineggura n temmurt.4Awarni as izehhar s tmijja ijehden, ihemhem s tmijja n lɛaḍama nnes u war imenneɛ assamen, mařa tᵉttwaseř tmijja nnes.5Arebbi iddardiḥ s tmijja nnes s tebridt n řeɛjeb, ittegg řeḥwayej timeqqranin, neccin war asent nfehhem.6Maɣar iqqar i wedfeř: ‘Wḍa ɣar temmurt!’, uca xenni ad dd-yas wenẓar, anẓar iccaten s iɣezran nnes ijehden.7Netta ittcemmeɛ afus n mkuř bnadem, ḥima marra iwdan ad ssnen, aqa d řexdayem nnes.8Řewḥuc ttnuffaren di řemrageḥ u ttɣiman deg ifran nsen.9Tettas-dd tḥaryaḍt z eg wexxam nnes n daxeř u ak-d usemmiḍ n ccamal tᵉttas-dd uřa d tesmeḍ.10S usuḍi n nnefs nnes ittawi-dd Arebbi ajris, jemden waṭṭas n waman.11Wah, ittɛemmar iseynuten s tuffet, ittbezzeɛ aseynu n tfawt nnes.12Wanita ittraḥ ittas-dd, mammec t ineddeh Netta, ḥima ad ggen marra min i d asen yumur x wudem n temmurt, x temmurt.13Ad taf ad t tẓared am yijj n weɛmud, niɣ am i řefḍeř n temmurt, niɣ am wescan n tmexsa icuwwaren.14Ewc amezzuɣ i man aya, a Ayub, bedd, sqar, u ḥḍa x řeɛjayeb n Arebbi.15Ma tessned mammec i xasen iḍebbar Arebbi, mammec issruɣa tfawt n useynu nnes?16Ma tessned mammec tteḥraran iseynuten, ma tessned řeɛjayeb n wenni ɣar teǧa tussna tmun.17Cek, wenni umi iḥemma warruḍ, mařa Netta issarsa tammurt s arriḥ n ljanub,18ma tbezzɛed akides řqubbet n ujenna, tenni din ibedden am yict n tisit ifesyen?19Sargeb aneɣ cek min i d as ɣa nini, maɣar neccin war nzemmar ad nfessar walu mliḥ zzates zi ssibbet n taǧest.20Ma ad as hajan, aqa ssiwřeɣ ammu? Mařa ca n yijjen ad tt yini, ad ittwaṣarḍ nican.21Řexxu war ittwiři bnadem tafawt, tenni yareqqen deg iseynuten, maca mařa iɛdu usuḍi n usemmiḍ, aqa ifarreḍ i-ten.22Zi ccamal ittas-dd wureɣ, tissiqt issaggʷaden tarsa x Arebbi.23Amzemmar x kuřci, wenni war nzemmar ad t naf, wenni d ameqqran di jjehd, Netta war ittdeǧi řḥeqq d tsegda ifeyyḍen.24S uya tteggʷeden zzayes iwdan, Netta war ixezzar ɣar yinni iḥessben ixef nsen d imiɣisen.