Řhard wiss arebɛa n Ilihu x ujarreb d weɛqab ɣar Arebbi
1Yarni Ilihu deg wawař, inna:2Ṣbar cwayt akidi, xenni necc ad ac ssecneɣ, aqa din ɛad řesbab ktar di ṭṭweɛ n tmesřact n Arebbi.3Necc ad dd-awyeɣ tussna inu zi řaggʷaj, ad neɛmeɣ tasegda n wenni d ayi dd-ixeřqen.4Maɣar s tidett, awařen inu war ǧin d ixarriqen, aqa da zzatek wenni d bu-tussna s tidett.5Xzar, Arebbi imɣar aṭṭas, maca war isseḥqiri ḥed, imɣar jjhed n řefhamet nnes.6Aɛeffan war t ittejji ad iddar, maca i imezřaḍ ittaɣ asen tasɣart nsen.7Netta war issḥeyyid tiṭṭawin nnes x umsegged, maca issɣimi ten i řebda x řɛarc ak-d ijeǧiden, uca ammu i ɣa ttwassuɛřan.8Mařa ttwawten nitni di řegyuḍ, ttwaḥebbsen di ssnaseř n řeɣben,9xenni isscen asen timegga nsen d iɛeddiyen nsen, aqa mɣaren aṭṭas.10Yarezzem amezzuɣ nsen i uwebbex, iqqar asen ad dd-dewřen zi řmuɛṣiyyet nsen.11Mařa sřin u sexxaren as, ad ssqefřen deg wefřaḥ ussan nsen u di zzhar iseggʷusa nsen.12Maca mařa war sřin, ad ttwahellken s lansa, ad ssuffɣen buḥbeř am war ɣarsen teǧi bu tussna.13Nitni inni issniɛmiřen deg wuř nsen, ttsettafen aɣḍab, war tᵉttaren aɛawen mařa Netta icarf i-ten.14Řeɛmar nsen ad immet umi nitni ɛad di temẓi, maɣar ddaren jar imetleyyen.15Ad ifekk amezřuḍ di řeɣben nnes, di ddeǧ ad yarzem amezzuɣ nsen.16Ammu i ɣa iɛarren uřa d cek zeg wuḍuf n řeḥṣaret, ɣar ttasiɛ mani war ittiři ɛad unedqef, mani i ɣa tiři ṭṭabřa nnec teccur s macca i dayes tadunt.17Maca cek tennuɣed di ccreɛ ak-d uɛeffan, maca ddeɛwet d tenfuč ttasent-i-dd ak-d wayawaya.18Ḥḍa aqa asɛar war cek ittɣarri i ustehzi u řqedd n ddeyyet war cek issuffuɣ zeg webrid.19Ma iɣuyyan nnec ad cek ssaren zi řeḥṣaret, niɣ marra min tᵉttegged s marra tizemmar nnec?20War ttmeẓri di ǧiřet, xmi ɣa ttwakksen řegnus zeg wemcan nsen.21Ḥḍa ixef nnec, war ggur x uɣezdis mani ittwaff řɣecc, aqa cek ad tixdared aya x waḍar.22Xzar, Arebbi issɛuǧa s jjehd nnes, man wen iǧan d Amseřmad am Netta?23Man wen i d as isscanen abrid? Niɣ man wen i d as innan: ‘Cek teggid řɣecc’?24Ɛqeř ad tessɛuǧid řxedmet n ifassen nnes, řxedmet nnes i zi ttɣennajen iwdan.25Kuř bnadem ittwařa tt, zi řaggʷaj ttwařan tt iwdan.26Xzar, Arebbi d ameqqran, war nzemmar ad as nefhem, řqedd n iseggʷusa nnes war nzemmar ad dayes narzu.27Maɣar Netta ijebbed tuddimin n waman, tinni dd-ittwakksen zi tayyut xenni dewřent d anẓar,28anẓar nni zi ttnesnisin iseynuten, anẓar nni dd iweṭṭan s ufeyyeḍ x iwdan.29Man wen ittḥakan ɛemmarṣ deg ubezzeɛ n iseynuten, uřa d řḥess isseggwaden zi Texzant nnes?30Xzar, ittbezzeɛ tafawt nnes tiwa n Yixef nnes, ittřeḥḥaf zzayes ṭṭřufa yuǧɣen qaɛ n řebḥar.31Maɣar s uya ittcarreɛ řegnus. Itticc macca s waṭṭas.32Ittcurra ifassen nnes s tfawt, iweṣṣa tt ad teřqef tandayt.33Aḍarḍeḥ n wassamen ittbarreḥ zzayes, uřa d taḥimart tᵉttbarreḥ aqa Netta ad dd-yas.