Kuwi36hch_wb2

Naurieka 'Erihú kemutayɨ

1'Erihú kaniyeweiyakaitɨni mɨpaɨ 'utaitɨ:2«Ketinenewieka 'akuxi nepɨmatitaxatɨaniKakaɨyari hetsiemieme 'akuxi nepɨtitaxata.3Kenemɨtiuyemate 'ateewa peyetɨa,yanepɨtayɨni mɨnetsi'utawewi heitseriemekɨ pɨtiyuriene.4Yurikɨ nepaine neniuki pɨka'itarika,tewi mɨtimaiwe 'ahɨxie pepuketsa.
5»Kakaɨyari pɨtɨrɨkaɨye, 'atsimɨkatiyuruwame pɨka'anuyehɨpa,Kakaɨyari pɨtɨrɨkaɨye, meta naime pɨtimate.6'Axamɨtiuka'iyari 'amuyeikanikɨ pɨkapitɨa,matsi mu'uximatɨarie heitserie kemɨrexeiyanikɨ pupitɨa.7Heitseriemekɨ memu'uwa yuheyemekɨ puwa'ɨwiya,te'aitamete wahamatɨa memɨte'aitanikɨ puwapitɨameta yuheyemekɨ waheima puwaka'uitɨwa.8Matsi xɨka mehɨatɨkani karenakɨ,xɨka me'uximatɨarietɨkani kaunarikɨ memɨhɨatɨkani hepaɨ,9Kakaɨyari kexemɨte'uyurikɨ yapɨtayɨnimeta kexemɨteyuti'ɨrekɨ 'axaxete'uyurieka.10Yunakatekɨ memɨ'enananikɨ pɨwapitɨa mete'ɨkitɨarietɨmeta puwawawirie 'axamemɨteyuriekɨ memuyupatakɨ.11Xɨka mɨkɨ mehenu'enieni meta me'eyexeiyatɨ mehakɨne,waɨkawa metehexeiyatɨ mepuyuhayewa kepaɨmexɨa memu'uwani,meta meyutemamawietɨ mepakɨne kememɨteheutere.12Matsi xɨka meka'enu'enieni,'atsimekatemaitɨ mɨki kitenie mepeutahaxɨani.
13»Kakaɨyari memɨka'ayexeiya yu'iyaritsie haxɨa mepu'uta,parewiya mepɨkaha'iwawa tsepa Kakaɨyari mɨtiwaruka'enitsitɨwa.14'Ayumieme kwitɨwa temaritɨtɨ mekanitakukuweni,'ukitsi yuhamatɨa memukahipite tukita hepaɨ.15Kemɨ'ane memɨte'uka'eniwa, Kakaɨyari puwaxɨna mete'uka'eniwakaku,meyuhiweriekaku, pɨwanɨtɨa.
16»Kakaɨyari pɨmatsixɨna waɨkawa petiuka'eniwakaku,'ahakuyeukaku pɨmatsihɨani,'amexatsie 'ikwaite 'aixɨa mɨti'anene pɨtitahɨniya.17Matsi 'ekɨ Kakaɨyari memɨka'ayexeiya kememɨtepitɨarie mɨpaɨ pepɨtipitɨarieni,tita mɨtiheitserie meta kepemɨranutahɨiyani mepumatsi'axe.18Kene'a'ɨwiyani waɨkawa perexeiyatɨ pemayanikɨ petihiwe'erietɨ,tiyukwamaname pepɨkahe'ayeitɨwani.19Waɨkawa kepemɨrexeiya pukamatsiparewieni,meta naitɨ 'a'uximayatsika.20Yɨriya pepɨkatakwewieka,kepauka teɨteri wakiekari mati'utsie matixɨriwa.21Kene'a'ɨwiyani 'axamɨti'ane hepaɨtsita,'ayumieme hikɨ pekatiniuka'eniwani.
22»Kakaɨyari 'aixɨa katinahɨawarɨwani yutɨrɨkariyakɨ.Xewitɨ ti'ɨkitametɨtɨ hepaɨna 'anetɨ pumawe.23¿Kemɨ'ane pita'iwawiyawe kemɨtiyuriene?¿Kemɨ'ane kename heuyewe pɨtitahɨawiwe?24'Uximayatsikaya hepaɨtsita 'aixɨa pehaitɨ pepɨkaratɨtɨmaiyani,nɨawarikɨ hepaɨtsitana 'aixɨa katinaniuwani.25Yunaitɨ teɨteri memixeiya mepɨyɨwawe,tsepanetɨ 'ateewa paitɨ.26Kakaɨyari pumariwe tepɨka'imate.Pɨkayu'inɨatsinɨa kepaɨmeme wiyari mexeiya.
27»Mɨkɨ haɨtsi pɨtaxɨrɨwahaa 'aki 'utɨma wiyeri hepaɨ muhanekɨ hatɨatsie mɨye'axenikɨ,28hai wiyeri pɨkaxɨrɨwa,teɨteri wahetsie waɨkawa mɨkaxɨrienikɨ.29¿Kemɨ'ane hai 'emutayeyeure petimaitɨyeika,meta tɨranari tsatana mayuane?30Kakaɨyari xekeneuxeiya yuxawatɨriya yu'aurie kemɨrexeiya,meta mɨkɨkɨ haramara 'upaitɨ pɨhɨniya.31Kakaɨyari pɨti'aita nuiwarite wahetsiemeta 'ikwaite waɨkawame pɨtiwayetuirie.32Mimierika yumamatsie pɨti'ɨwe,meta yapɨtita'aitɨwa hakewa mɨrekamɨni.33Tɨranarieya yapaine kename wiyeri tɨrɨkaɨye,meta wakaitsixi 'ɨaritɨ mepi'enie kename 'uhamie.
expand_more
Search