Kuwi35hch_wb2

Hairieka 'Erihú kemutayɨ

1Metatsiere 'Erihú mɨpaɨ kaniutayɨni:2«¿Kuwi, heitserie pehexeiyame peti'a'erie kepauka 'ipaɨ pemutaine:“Ne matsi heitserie nepexeiya keyuri Kakaɨyari”?,3meta 'ipaɨ pemɨtita'iwawiyakɨ:“¿Titakuta rayani nehetsie xɨka 'axanekatiuyurieni?”4'Aixɨa kani'aneni, ne nekanixeta'eiyamɨkɨ'ekɨ, meta 'ahamikuma.5Muyuawitsie keneutinieri, kwi keneuyu'ɨwiya,haiwitɨri meutitewatsie keneutixeiya.6Xɨka 'axapetiuyurieni, ¿Kakaɨyari titakɨ 'axapetiyurie?Xɨka waɨkawa 'axapetiuyurieni, ¿Titakɨ petikwinitɨa?7Xɨka 'aixɨa petiuyeikani, ¿tita petipitɨa?¿Ketita ranupini 'ahetsɨa timieme?8Tsepa 'axapemɨtiyuriene yatɨni 'aixɨa pemɨtiyuriene,kemɨ'ane yamemɨ'itɨarieni 'ahepaɨ teɨteri wahetsie katininakimɨkɨ.
9»Yunaitɨ teɨteri meputihiwa 'axamɨti'ane waɨkawa manutatekekɨ wahetsie,parewiya mepa'iwawa memɨxɨnarienikɨ mɨtɨrɨkaɨye muwananaimakɨ.10Peru xewitɨ mɨpaɨ pɨkahaine: “¿Hakewa Kakaɨyari, mɨnetsi'utawewi,tɨkarikɨ tɨrɨkariya hekwame mɨnetsikupitɨwa,11waɨkawa mɨtati'ɨkitɨa keyuri yeutari memumariwawe,waɨkawa tetemaiwaweme mɨtatsi'ayeitɨa keyuri wikixi?”12Xɨka Kakaɨyari teɨteri mehahiwatɨkaikaku kawaku'eiyani,karikɨ 'axamemɨte'u'iyarikɨ memuyuti'ɨrekɨ kaniyɨaneni.13Kakaɨyari pɨkawa'enie tixaɨtɨ mɨkatihɨkɨ memuku'iwawakɨ,Naimekɨmɨtɨrɨkaɨye pɨkawa'enimɨkɨ.14Tsepa kepauka kename peka'ixeiya pemaine,kepemɨtiuyuri hɨxiena pɨti'ane, 'ayumieme peuyewetse pemikwewieka.15'Ekɨ mɨpaɨ peputaine kename Kakaɨyari kahayu'eriya meta karaka'enitsitɨani,meta kename 'atsikaretimamate waɨkawa 'axamɨti'ane hepaɨtsita,16matsi 'ekɨ Kuwi, 'atsipekatimaitɨ peputaniuka,waɨkawa peputaniuka matsi 'atsipepɨkatimate kepemutaine».
expand_more
Search