Kuwi30hch_wb2
1»Hikɨ matsi nehepaɨtsita tɨɨritɨtɨ mekaniutinaweni,ne mɨkɨ wapaapama nepɨkawaruhɨritɨawe tɨmanetsɨikɨrima nemuxatsima wahɨwemete.2¿Titakɨ tiyunaki'eriekake nehetsiemieme watɨrɨkariya,matsi tɨrɨkariya mekahexeiyakaku?3Mete'uka'eniwatɨ haakakɨ meta meteheuyehɨatɨ,makumawe 'amanutitewatsie paitɨ mepu'uwakai tɨkarikɨ,yeuta kwiepa mɨkahakietatsie.4'Ɨtsita tupiriyate ratsiwitɨkaime mepɨtekupitɨwekaimeta matsikɨi nanayari mepɨkwakai.5Mepayeweiyariekai kiekaritsie,mewahiwietɨ tenanawayamete wahepaɨ.6'Ayumieme puwakietɨkai'aki 'utɨma haa muwakitsie,'ai mukatataritɨa meta terɨta.7'Ɨtsitsata meputihiwakai,tupiriyatsata 'axeikɨa mepɨtihipitekai.8Teɨteri 'atsimemɨkatemate mekanihɨkɨtɨni, 'axamemɨtemariwa,'ayumieme yukie mepayeweiyarie.9»Hikɨ matsi ne menetsikuxatatɨ xeikɨa kenemɨ'ane mekaneni'ɨkeni.Hikɨ netsi'atsemete mekanakɨne.10Mepɨnetsi xani'erie, mepɨnetsi'uku'e'eiriwa,nehɨxie mepɨnetsihaye'aɨtsikawiya.11Hikɨri matsi Kakaɨyari tixaɨtɨ nekatiyunaki'eriekame mɨnetsi'ayeitɨa,nehɨxie 'axame'utiyuatɨ mepɨkatehayewa.12Netserieta mepɨti'u yunaitɨ teɨteri menetsimietɨwetɨ,mepɨnetsiwiniyatɨwe ne'ɨkatsiemeta mepiwewie nehetsɨa kememɨte'aye'axɨani.13Nehuyeta mepɨte'anuna,xewitɨ mɨkanetsiparewiekɨ yamepɨteyurie memɨnetsika'unakɨ.14'Amepahu ne'ixumeritsie memeu'inieni hepaɨ,kii 'u'unimetsata mepɨnetsimietɨwe mekatehayewatɨ.15Marika nehetsie punua,'aixɨa 'anemekɨ kenemɨtixeiyariekai 'eka hepaɨ petɨa,newikweitsitɨarika hai hepaɨ putiutapaparike.16»Hikɨta netukari nepɨtatɨmaiyarɨme,nekukwiniya kwinimieme pɨneti'uximatɨa.17Yɨwikɨta ne'umete pɨnetsititara,kukuiniya nehetsie pɨkaheununuwa.18Kakaɨyari yutɨrɨkariyakɨ nekamixatsie pɨnetsiwiya,pɨnetsikɨxɨipina nekamixa nekɨipitɨa mieme hepaɨ.19Karima haxuta pɨnetsiheukahɨpa,meta naxi tumuanari pɨnetsihayeitɨwa.20»Kakaɨyari 'aku, 'ekɨ nepɨmatsihahiwiwa, matsi pepɨkanetsiku'eiya,ne 'ahɨxie nepɨ'axe, matsi 'ekɨ waɨriyarika pepɨnetsikuxexeiya.21Kwinimiemeri pepɨnetinanaima,'atɨrɨkariyakɨ pepɨnetsi'anayewaya.22'Eka hetsie pepɨnetsiheutahɨpa pepɨnetsi'anuku'enitsitɨwa,wiyeri mɨtɨrɨkaɨyetsie pepɨnetsi'uyehɨpa.23Yanepɨtimate teukiyapa kepemɨnereukatuanikɨ,hakewa teyunaitɨ 'atemu'uwa temɨtakukuwe metakiekaritsie.24»Matsi kemɨ'ane ma'iwarie tawari menukawaxɨani pɨkayɨwe,tiuka'eniwatɨ mahiwa parewiya ha'iwawatɨ.25Ne memɨte'uka'eniwa wahetsiemieme neputatsuaka.Tixaɨtɨ memɨkatehexeiya wahetsiemieme nekaninehɨaweni.26Kepauka 'aixɨa mɨti'ane nemɨtikwewiekai, 'axamɨti'ane pɨtinua,kepauka hekɨariya nemukuwaunekai, yɨriya pɨnua.27Nepɨkatihayewa netaɨta neyɨhɨawetɨ,nepɨtinewie netiuka'eniwatɨ.28Nenehɨawetɨ 'anepuyeika, matsi tau mɨxɨkakɨ hawaikɨ,teɨteri wahɨxie neputakeka, parewiya newautɨ.29Yawixi memayu'eririya wa'iwa nepatɨa,nɨpexitsixi tɨkarikɨ miemete wa'iwa.30Nenawiyari pukatai, meta kanikatsanikeni,naitɨ newaiyari pɨta'a hɨiyakɨ.31Nekanari yuariyaya hiwerika pɨhɨkɨ,nepirikɨxa yuariyaya nutuixiya pɨhɨkɨ.