Read أَيُوبْ 27

أَيُوبْ27rif_ati

ڒْهَارْدْْ ن أَيُوبْ خْ إِعفَّاننْ

¹يَارْنِي إِسّْڭعّذْ أَيُوبْ ڒْهَارْذْ ن لْمَاثَالْ نّسْ، إِنَّا:

²س ثِيذتّْ أَمْ إِدَّارْ أَربِّي نِّي إِ ذ أَيِي إِكّْسنْ ثَاسْغَارْثْ إِنُو، أَمْزمَّارْ خْ كُوڒْشِي نِّي إِسَّارْزَاڭنْ ڒعْمَارْ إِنُو،³مِينْ غَا يكّْ نّفْسْ عَاذْ ذَايِي ؤُ أَرُّوحْ ن أَربِّي عَاذْ ذڭْ ونْزَارنْ إِنُو،⁴وَارْ قَّارنْ إِينْشِيشنْ إِنُو ڒْغشّْ ؤُ إِڒسْ إِنُو وَارْ إِقَّارْ إِخَارِّيقنْ!⁵إِڭّْوجْ خَافِي أَذْ ڭّغْ كنِّيوْ ذِي ثْسيَّارسْثْ ن ثِيذتّْ. أَڒْ غَا سُّوفّْغغْ بُوحْبڒْ إِنُو، وَارْ تّجِّيغْ أَذْ خَافِي كّْسنْ أَسڭّذْ إِنُو.⁶أَذْ طّْفغْ ذِي ثْسڭْذَا إِنُو، وَارْ زَّايسْ أَرخُّوغْ شَا. ؤُڒْ إِنُو وَارْ ذ أَسْ يَارخُّو ؤُڒَا خْ إِجّنْ زڭْ وُوسَّانْ إِنُو.⁷مْڒِي د-إِبَانْ ڒعْذُو إِنُو ذ أَعفَّانْ، ونِّي أَكِيذِي إِتّْمنْغَانْ ذ مِّيسْ ن ڒْمُوعْصِييّثْ.

⁸مَاغَارْ مَانْ ڒَايَاسْ ن ؤُمْنَافقْ، خْمِي غَا ثتّْوَاقْضعْ ثُوذَارْثْ نّسْ، خْمِي زَّايسْ إِ غَا إِقْڒعْ أَربِّي ڒعْمَارْ نّسْ؟⁹مَا أَذْ إِسڒْ أَربِّي إِ إِغُويَّانْ نّسْ، خْمِي خَاسْ د غَا إِوْضَا ڒْحصْرَانْ؟¹⁰مَا أَذْ إِفَارْحْ غَارْ ؤُمْزمَّارْ خْ كُوڒْشِي؟ مَا أَذْ إِڒَاغَا خْ أَربِّي مڒْمِي مَا؟¹¹نشّْ أَذْ أَومْ سّْڒمْذغْ خْ ؤُفُوسْ ن أَربِّي، مِينْ إِعوّڒْ ؤُمْزمَّارْ خْ كُوڒْشِي، وَارْ ث سّْنُوفَّارغْ.¹²خْزَارْ، كنِّيوْ مَارَّا إِذْومْ ثژْرِيمْ ث. مَايمِّي ثَارنّْيمْ ثسُّوفُّوغمْ مِينْ إِبطّْڒنْ ثقَّارمْ:

¹³”ثَا ذ ثَاسْغَارْثْ ن بْنَاذمْ أَعفَّانْ غَارْ سِيذِي، ثَاسْغَارْثْ ن أَيْثْ ن بُو-ڒخْشُونثْ نِّي إِ غَا طّْفنْ زڭْ ؤُمْزمَّارْ خْ كُوڒْشِي:¹⁴خْمِي غَا مَّارنْينْ إِحنْجِيرنْ نّسْ، إِ سِّيفْ ؤُمِي ؤُرِينْ. إِغدُّوثنْ نّسْ وَارْ تّْيَاوَاننْ أَغْرُومْ،¹⁵وِي زَّايسْ إِ غَا يَاروْڒنْ أَذْ تّْوَانضْڒنْ س طَّاعُونْ، ثِيجَّاڒْ نّسْ وَارْ تّْرُونْثْ شَا.¹⁶وَاخَّا إِجَارُّووْ نُّوقَارْثْ أَنشْثْ ن ؤُشَاڒْ، ؤُ إِسّوْجَاذْ أَرُّوضْ أَنشْثْ ن ؤُشَاڒْ،¹⁷إِوَا، وَاخَّا أَذْ ث إِسّوْجذْ، أَمْسڭّذْ أَذْ زَّايسْ يَارْضْ ؤُشَا أَمزْذَاڭْ أَذْ إِبْضَا نُّوقَارْثْ.¹⁸أَذْ إِبْنَا ثَادَّارْثْ نّسْ أَمْ ثْشِينْذَا، أَمشْنَاوْ ثَانْوَالْثْ إِ إِسّْبدَّا ؤُعسَّاسْ إِ يِيخفْ نّسْ.

¹⁹أَذْ ذَايسْ إِطّصْ ذ بُو-وَاڭْڒَا، مَاشَا وَارْ يَارنِّي ذڭْ وَاڭْڒَا نّسْ. مَاڒَا يَارْزمْ ثِيطَّاوِينْ نّسْ، وَارْ ذِينْ إِتّْغِيمِي عَاذْ وَالُو.²⁰إِنخْڒِيعنْ أَذْ خَاسْ أَرنْينْ أَمْ إِغزْرَانْ ن وَامَانْ، ثَاحَارْيَاضْثْ أَذْ ث-إِ-د-ثقْضعْ س دْجِيڒثْ.²¹أَسمِّيضْ زِي شَّارْقْ أَذْ ث إِكْسِي، إِوَا ذِينِّي إِتّْرَاحْ، أَذْ ث-إِ-د-إِقْڒعْ زڭْ ومْشَانْ نّسْ.²²أَربِّي أَذْ إِسِّيوضْ مَارَّا أَيَا خْ ؤُزدْجِيفْ نّسْ، وَارْ خَاسْ إِسّْعِيزِّي شَا. أَذْ يَارْوڒْ ذغْيَا زِي ثشْثِي ن ؤُفُوسْ نّسْ.²³إِوْذَانْ أَذْ خَاسْ وّْثنْ ذڭْ إِفَاسّنْ نْسنْ أَمْ زَّايسْ سْثْهزَّانْ ؤُشَا أَذْ خَاسْ صفَّارنْ زڭْ ومْشَانْ ن ثْزذِّيغْثْ نّسْ.“

أَيُوبْ 27 / rif_ati

ڒْهَارْدْْ ن أَيُوبْ خْ إِعفَّاننْ

أَيُوبْ27rif_ati