Read أَيُوبْ 21

أَيُوبْ21rif_ati

ثَامْوَارِّيثْ ن أَيُوبْ خْ صُوفَارْ: ڒفْڒحْ ن ورْيَازْ أَعفَّانْ

¹خنِّي يَارَّا-د أَيُوبْ، إِنَّا:

²سْڒمْ مْلِيحْ إِ وَاوَاڒنْ إِنُو، حِيمَا أَذْ أَومْ إِڒِينْ إِ ؤُسْفوّجْ.³كْسِيمْ أَيِي، خنِّي أَذْ سِّيوْڒغْ، ؤُ أَوَارْنِي ڒَامِي سِّيوْڒغْ، ثْزمَّارمْ أَذْ ثْعفَّارمْ.⁴مَا أَشثْشِي إِنُو خْ إِجّْ ن بْنَاذمْ؟ نِيغْ مَايمِّي وَارْ ذ أَيِي د-إِكَّارْ أَذْ يِيڒِي بُوحْبڒْ إِنُو بْڒَا تَّاسِيعْ ن ڒْخَاضَارْ؟⁵قڒْبمْ-د غَارِي ؤُشَا جْعَارمْ، سَارْسمْ أَفُوسْ خْ ؤُقمُّومْ.⁶مَاڒَا خمّغْ وَاهَا ذڭْ ؤُيَا، تّْنخْڒِيعغْ ؤُ ثْمنّعْ ثَارْجِيجِيثْ أَرِّيمثْ إِنُو.

⁷مَايمِّي تّْغِيمَانْ إِعفَّاننْ دَّارنْ، مَايمِّي دَّاكّْوَاڒنْ إِوسُّورَا، تّْمَارْنِينْ عَاذْ ذِي جّهْذْ نْسنْ؟⁸ثَارْوَا نْسنْ تّْغِيمَانْ بدّنْ زَّاثْ إِ ؤُغمْبُوبْ نْسنْ، أَقَا أَثنْ غَارْسنْ، ؤُ إِحنْجِيرنْ إِغدُّوثنْ نْسنْ زَّاثْ إِ ثِيطَّاوِينْ نْسنْ.⁹ثُوذْرِينْ نْسنْ أَقَا أَثنْثْ ذِي ڒهْنَا نْهْڒَا أَنخْڒِيعْ، أَعْمُوذْ ن أَربِّي وَارْ ثنْ إِشِّيثْ.¹⁰أَفُونَاسْ نّسْ إِتَّارَّا ؤُ وَارْ إِخطِّي، ثَافُونَاسْثْ نّسْ ثتَّارُو، عمَّارْصْ وَارْ ثْغطّڒْ أَعذِّيسْ.¹¹تّجَّانْ إِمژْيَاننْ نْسنْ ڭُّورنْ أَمْ يِيشْثْ ن ثْحِيمَارْثْ، إِحنْجِيرنْ نْسنْ تّجَّانْ ثنْ نڭّْزنْ.

¹²نِيثْنِي سّْڭعَّاذنْ ثْمِيجَّا نْسنْ غَارْ ؤُبنْذِيرْ ذ ڒْڭَامْبْرِي، فَارّْحنْ غَارْ ثْمِيجَّا ن ثمْجَا.¹³سّْعدُّونْ ؤُسَّانْ نْسنْ ذِي زّْهَارْ، مَاشَا هكّْوَانْ غَارْ ڒَاخَارْثْ ذڭْ ورْمَاشْ ن وَابْڒِيونْ.¹⁴قَّارنْ إِ أَربِّي: ’حيّذْ خَانغْ، مَاغَارْ وَارْ ذ أَنغْ إِعْجِيبْ أَذْ نسّنْ إِبْرِيذنْ نّشْ.¹⁵مَانْ ونْ إِدْجَانْ ذ أَمْزمَّارْ خْ كُوڒْشِي مَاحنْذْ أَذْ أَسْ نْسخَّارْ؟ مَانْ لْفَايْذَا إِ غَارْنغْ مَاڒَا نْزِييَّارْ خَاسْ س ثْژَادْجِيثْ نّغْ؟‘¹⁶خْزَارْ، زّْهَارْ نْسنْ وَارْ إِدْجِي ذڭْ ؤُفُوسْ نْسنْ. شّْوَارْ ن إِعفَّاننْ إِڭّْوجْ خَافِي.

¹⁷مشْحَاڒْ ن ثْوَاڒَاوِينْ ثْخسِّي خنِّي إِ إِعفَّاننْ ثْفَاوْثْ نْسنْ، ؤُشَا إِڒقّفْ إِ-ثنْ ؤُضيّعْ، مشْحَاڒْ ن ثْوَاڒَاوِينْ إِبطَّا نتَّا خَاسنْ ڒحْڒِيقْ ذڭْ وغْضَابْ نّسْ،¹⁸أَڒَامِي إِ غَا ذوْڒنْ أَمْ ؤُڒُومْ زَّاثْ إِ ؤُسمِّيضْ، أَمْ إِغدْجْ ثخْضفْ إِ-ث ثْحَارْيَاضْثْ؟¹⁹مَا ثقَّارمْ: ’أَربِّي إِتّْخمّڒْ لْعِيقَابْ إِ ڒْمُوعْصِييّثْ نّسْ إِ إِحنْجِيرنْ نّسْ!‘ أجّْ إِ-ث أَذْ أَسْ ت إِخدْجصْ أَڒْ غَا يَاشَا نتَّا سِيمَانْثْ نّسْ!²⁰أجّْ ثِيطَّاوِينْ نّسْ أَذْ ژَترنْثْ أَهلّكْ نّسْ، أجّْ إِ-ث أَذْ إِسُو س يِيخفْ نّشْ زڭْ وسْعَارْ ن ؤُمْزمَّارْ خْ كُوڒْشِي.²¹مَاغَارْ مَامّشْ إِ غَا يَارْضَا عَاذْ ذِي أَيْثْبَابْ ن ثَادَّارْثْ نّسْ أَوَارْنِي إِ ڒْموْثْ نّسْ، مَاڒَا ثتّْوَاڭّْ عَاذْ قدَّا ن إِيُورنْ نّسْ؟

²²مَا زمَّارنْ أَذْ سّْڒمْذنْ ثُوسّْنَا إِ أَربِّي، ونِّي إِحكّْمنْ خْ يِينِّي إِدْجَانْ ذڭْ ؤُجنَّا يُوعْڒَانْ؟²³أَقَا ذِينْ إِجّنْ إِمُّوثْ ذِي زّْهَارْ إِمُونْ، أَمْ إِدَّارْ عَاذْ قَاعْ ذِي ڒهْنَا ؤُ ذِي ڒْهُوذْنثْ.²⁴أَمْعمَّارنْ ڒمْذَاوذْ نّسْ س ؤُغِي ؤُ إِتّْوَابزّڭْ وَاذُوفْ ن يغْسَانْ نّسْ.²⁵ونّغْنِي إِمُّوثْ س ڒعْمَارْ ذ أَمَارْزَاڭْ، وَارْ د-يِيوِي ڒِيقِّي إِ وَالُو ن ڒْخَارْ.²⁶مُوننْ زّْڒنْ نِيثْنِي ذڭْ ؤُشَاڒْ ؤُ إِكشَّاونْ ذْڒِينْ ثنْ.

²⁷خْزَارْ، سّْنغْ إِخَارِّيصنْ نْومْ، ؤُڒَا ذ ثِيمعْمَاتْشْ نِّي زِي ذ أَيِي ثْذڒْممْ،²⁸خْمِي ثقَّارمْ: ’مَانِي ثدْجَا ثَادَّارْثْ ن ؤُمْشنّعْ إِتّْمژْرِينْ ذِي صُّولْطَا، مَانِي ثدْجَا ثْقِيضُونْثْ س ثْزذِّيغِينْ، ثَازذِّيغْثْ ن ؤُعفَّانْ؟‘²⁹مَاعمَّارْصْ وَارْ ثسّقْسِيمْ إِمْسبْرِيذنْ؟ أَقَا إِشيَّارنْ نْسنْ إِتّْقَارَّانْ وَارْ ثْزمَّارمْ أَذْ ثنْ ثنْكَارمْ:³⁰مَاغَارْ أَعفَّانْ أَذْ إِتّْوَاحْضَا ذڭْ وَاسّْ ن أَرْژِييّثْ، ذڭْ وَاسّْ ن ؤُذُوقّزْ ن ؤُفُوڭمْ أَذْ تّْوَاوْينْ نِيثْنِي ذِي ڒَامَانْ.³¹مَانْ ونْ إِ ث غَا إِسّشْننْ أَبْرِيذْ نّسْ ذڭْ ؤُغمْبُوبْ نّسْ؟ مَاڒَا إِڭَّا شَا ن ثُوعفّْنَا، وِي ث إِ غَا إِخدْجْصنْ؟

³²نتَّا مَاشَا أَذْ إِتّْوَاكْسِي غَارْ ونْضڒْ نّسْ ذ أَمقّْرَانْ ؤُ غَارْ ثوْرِيرْثْ ن ونْضڒْ نّسْ إِتّْعسّْ نتَّا س يِيخفْ نّسْ.³³تّْعجِيبنْ أَسْ إِبُورْسَا ن ثغْزُورْثْ، ضفَّارنْ ث مَارَّا إِوْذَانْ ؤُ إِنِّي ذ أَسْ إِتِّيزْوَارنْ، وَارْ زمَّارنْ أَذْ ثنْ حسْبنْ.

³⁴مَامّشْ ثخْسمْ أَذْ أَيِي ثْعزَّامْ س وَاوَاڒنْ إِخْوَانْ؟ زِي ثمْوَارِّيثْ نْومْ وَارْ إِتّْغِيمِي وَالُو مْغِيرْ ڒغْضَارْ وَاهَا.

أَيُوبْ 21 / rif_ati

ثَامْوَارِّيثْ ن أَيُوبْ خْ صُوفَارْ: ڒفْڒحْ ن ورْيَازْ أَعفَّانْ

أَيُوبْ21rif_ati