ⴰⵢⵓⴱ20rif_tti

ⵍⵀⴰⵔⴷ ⵡⵉⵙⵙ ⵜⵏⴰⵢⴻⵏ ⵏ ⵚⵓⴼⴰⵔ ⵅ ⵍⴻⴼⵍⴻⵃ ⴷ ⵍⵃⵓⴽⵎ

1ⵅⴻⵏⵏⵉ ⵢⴰⵔⵔⴰ-ⴷⴷ ⵚⵓⴼⴰⵔ, ⵡⴻⵏⵏⵉ ⴷⴷ-ⵢⵓⵙⵉⵏ ⵣⵉ ⵏⴰⵄⵎⴰ, ⵉⵏⵏⴰ:
2ⵉⵅⴰⵔⵔⵉⵚⴻⵏ ⵉⵏⵓ ⵜⵜⵖⵉⵎⴰⵏ ⴷⴻⴽⴽⵡⴰⵍⴻⵏ-ⴷⴷ ⵖⴰⵔⵉ ⵣⵉ ⵙⵙⵉⴱⴱⴻⵜ ⵏ ⵓⵇⴻⴵⴻⵇ ⵉ ⵡⴰⵔ ⵉⵜⵜⴱⴻⴷⴷⵉⵏ ⴷⵉ ⵍⴱⴰⵍ ⵉⵏⵓ.3ⵙⵍⵉⵖ ⵉⵊⵊ ⵏ ⵓⵡⴻⴱⴱⴻⵅ ⵉ ⴷ ⴰⵢⵉ ⵉⵙⵙⴱⴻⵀⴷⴰⵍⴻⵏ, ⵎⴰⵛⴰ ⴱⵓⵃⴱⴻⵍ ⴰⴷ ⵅⴰⴼⵉ ⴷⴷ-ⵢⴰⵔⵔ ⵙ ⵍⴻⴼⵀⴰⵎⴻⵜ ⵉⵏⵓ.4ⵉⵡⴰ ⵜⴻⵙⵙⵏⴻⴷ ⴰⵢⴰ, ⴰⵇⴰ-ⵜ ⴷⵉⵏ ⵣⴻⴳ ⵡⴻⵛⵃⴰⵍ ⵓⵢⴰ, ⵣⴻⴳ ⵡⴰⵎⵉ ⵉⵜⵜⵡⴰⵙⵙⴰⵔⵙ ⴱⵏⴰⴷⴻⵎ ⵅ ⵜⴻⵎⵎⵓⵔⵜ,5ⴰⵇⴰ ⴰⵙⵍⵉⵡⵍⴻⵡ ⵏ ⵉⵄⴻⴼⴼⴰⵏⴻⵏ ⵉⵜⵜⴻⴽⴽ ⴷⵔⵓⵙ ⵡⴰⵀⴰ, ⵍⴻⴼⵔⴰⵃⴻⵜ ⵏ ⵓⵎⵏⴰⴼⴻⵇ ⵎⵖⵉⵔ ⵉⵛⵜ ⵏ ⵜⵣⴻⵃⵣⵉⵃⵜ.
6ⵡⴰⵅⵅⴰ ⵜᵉⵜⵜⴳⴻⵄⵄⴰⴷ ⵏⵏⴼⴰⵅⴻⵜ ⵏⵏⴻⵙ ⴰⵍ ⵉⵊⴻⵏⵡⴰⵏ, ⵡⴰⵅⵅⴰ ⵉⵜⵜⵃⴰⴷⴰ ⴰⵣⴻⴵⵉⴼ ⵏⵏⴻⵙ ⴰⵍ ⵉⵙⴻⵢⵏⵓⵜⴻⵏ,7ⴰⵎ ⵎⴰⵎⵎⴻⵛ ⵉⵙⵓⴼⵖⴰⵏ ⵏⵏⴻⵙ ⴰⴷ ⵇⴹⴰⵏ ⵉ ⵍⴻⴱⴷⴰ, ⴰⴷ ⵉⵇⴹⴰ ⵓⵍⴰ ⴷ ⵏⴻⵜⵜⴰ ⵉ ⵍⴻⴱⴷⴰ. ⵉⵏⵏⵉ ⵜ ⵉⵥⵔⵉⵏ, ⴰⴷ ⵉⵏⵉⵏ: ‘ⵎⴰⵏⵉ ⵉⴵⴰ ⵏⴻⵜⵜⴰ?’8ⴰⵎ ⵉⵛⵜ ⵏ ⵜⵉⵔⵊⴰ ⴰⴷ ⵉⴹⵓⵡ, ⴰⵍⴰⵎⵉ ⵡⴰⵔ ⵉⵜⵜⵡⵉⴼ ⵄⴰⴷ, ⴰⴷ ⵉⵜⵜⵡⴰⵙⵙⴻⵜⵍⴻⵄ ⴰⵎ ⵉⵊⵊ ⵏ ⵍⴻⵡⵃⵉⵢ ⵏ ⴵⵉⵍⴻⵜ.9ⵜⵉⵟⵟ ⵉ ⵜ ⵉⵥⵔⵉⵏ ⵡⴰⵔ ⵜ ⵜⵥⴰⵔⵔ ⵄⴰⵡⴻⴷ, ⵓ ⴰⵎⵛⴰⵏ ⵏⵏⴻⵙ ⵡⴰⵔ ⵜ ⵉⵥⴰⵔⵔ ⵄⴻⵎⵎⴰⵔⵚ.10ⵉⵃⴻⵏⵊⵉⵔⴻⵏ ⵏⵏⴻⵙ ⴰⴷ ⵙⵙⵊⵉⵡⵏⴻⵏ ⵉⵎⴻⵣⵍⴰⴹ, ⴰⵎⵎⵓ ⵉ ⴷⴷ ⵖⴰ ⵢⴰⵔⵔⴻⵏ ⵉⴼⴰⵙⵙⴻⵏ ⵏⵏⴻⵙ ⴰⴳⵍⴰ ⵏⵏⴻⵙ.11ⵉⵅⵙⴰⵏ ⵏⵏⴻⵙ ⵉⵛⵛⵓⵔⴻⵏ ⵙ ⵜⴻⵎⵥⵉ, ⴰⴷ ⵣⵣⵍⴻⵏ ⴰⴽⵉⴷⴻⵙ ⴷⴻⴳ ⵓⵛⴰⵍ.
12ⵎⴰⵍⴰ ⵍⵖⴰⵔ ⴷⴻⴳ ⵓⵇⴻⵎⵎⵓⵎ ⵏⵏⴻⵙ ⴷ ⴰⵎⵉⵥⵉⴷ, ⵎⴰⵍⴰ ⵉⵙⵙⵏⵓⴼⴼⴰⵔ ⵉ-ⵜ ⵙⴰⴷⵓ ⵉⵍⴻⵙ ⵏⵏⴻⵙ,13ⵎⴰⵍⴰ ⵉⵃⴹⴰ ⵉ-ⵜ, ⵡⴰⵔ ⵉⵅⵙ ⴰⴷ ⵅⴰⵙ ⵉⵃⴻⵢⵢⴻⴷ, ⵎⴰⵛⴰ ⵉⵎⴻⵏⵏⴻⵄ ⵉ-ⵜ ⴷⴻⴳ ⵡⴰⵏⴻⵖ ⵏⵏⴻⵙ,14ⵅⴻⵏⵏⵉ ⴰⴷ ⵜⴱⴻⴷⴷⴻⵍ ⵎⴰⵛⵛⴰ ⵏⵏⴻⵙ ⴷⴻⴳ ⵓⵄⴻⴷⴷⵉⵙ ⵏⵏⴻⵙ, ⴷⵉ ⴷⴰⵅⴻⵍ ⵏⵏⴻⵙ ⴰⴷ ⵜⴻⴷⵡⴻⵍ ⴷ ⴰⵔⵔⵀⴰⵊ ⵏ ⵜⵔⴻⴼⵙⵉⵡⵉⵏ.15ⵉⵚⴰⵔⴹ ⴰⴳⵍⴰ, ⵎⴰⵛⴰ ⴰⴷ ⵜ-ⵉ-ⴷⴷ-ⵉⵄⵓⵇⵇ ⵄⴰⵡⴻⴷ. ⴰⴷ ⵜ-ⵉ-ⴷⴷ-ⵉⵏⴹⴰⵔ ⴰⵔⴻⴱⴱⵉ ⵖⴰⵔ ⴱⴰⵔⵔⴰ ⵣⴻⴳ ⵓⵄⴻⴷⴷⵉⵙ ⵏⵏⴻⵙ.16ⴰⵔⵔⵀⴰⵊ ⵏ ⵜⵔⴻⴼⵙⵉⵡⵉⵏ ⴰⴷ ⵜ ⵉⵟⵟⴻⴹ, ⵉⵍⴻⵙ ⵏ ⵓⴼⵉⵖⴰⵔ ⴰⴷ ⵜ ⵉⵏⴻⵖ.
17ⵡⴰⵔ ⵉⵥⴰⵔⵔ ⵉⵖⴻⵣⵔⴰⵏ, ⵜⵉⵖⴻⵣⵔⴰⵜⵉⵏ ⴷ ⵜⴰⵔⵢⴰⵡⵉⵏ ⵉⵜⵜⴰⵣⵣⵍⴻⵏ ⵙ ⵜⴰⵎⵎⴻⵏⵜ ⴷ ⵓⵖⵉ.18ⴰⴷ ⴷⴷ-ⵢⴰⵔⵔ ⵍⴻⴼⴹⴻⵍ ⵏ ⵓⵎⴰⵔⵔⴻⵜ ⵏⵏⴻⵙ, ⵡⴰⵔ ⵜ ⵉⵙⵙⴻⵖⵍⴰⵢ, ⵡⴰⵔ ⵉⵏⴻⴳⴳⴻⵣ ⵙ ⵍⴻⴼⵔⴰⵃⴻⵜ ⵣⵉ ⵙⵙⵉⴱⴱⴻⵜ ⵏ ⵡⴰⴳⵍⴰ ⵉ ⴷⴷ-ⵉⴽⵙⴻⴱ,19ⵎⴰⵖⴰⵔ ⵉⴷⴻⴵ ⵉⵎⴻⵣⵍⴰⴹ, ⵉⵊⵊⴰ ⵉ-ⵜⴻⵏ ⴱⵍⴰ ⵜⵡⵉⵣⴰ, ⵢⵓⵛⴰⵔ ⵜⴰⴷⴷⴰⵔⵜ ⵏⵏⵉ ⵡⴰⵔ ⵉⵙⵙⴱⴻⴷⴷ,20ⵎⴰⵖⴰⵔ ⵡⴰⵔ ⵉⵙⵙⵉⵏ ⵍⵀⵓⴷⵏⴻⵜ ⴷⵉ ⴷⴰⵅⴻⵍ ⵏⵏⴻⵙ, ⵙ ⵓⵢⴰ ⵡⴰⵔ ⵉⵏⴻⵊⵊⴻⵎ ⵙ ⵎⴰⵔⵔⴰ ⵎⵉⵏ ⴷⵉ ⵜⵓⵖⴰ ⵉⵎⵎⴻⵥⵔⵉ.
21ⵡⴰⵔ ⵉⵜⵜⵛⴻⵟⵟⵉ ⵡⴰⵍⵓ ⵉ ⵓⵎⴻⵔⵄⵉⵇ ⵏⵏⴻⵙ, ⵅ ⵓⵢⴰ ⵡⴰⵔ ⵉⵜⵜⵖⵉⵎⵉ ⵣⵣⵀⴰⵔ ⵏⵏⴻⵙ ⵉⴱⴻⴷⴷ.22ⵎⴰⵍⴰ ⵖⴰⵔⴻⵙ ⴰⴼⴻⵢⵢⴻⴹ ⵉⵎⵓⵏ, ⴰⴷ ⵉⵜⵜⵡⴰⵃⵙⴰⵔ, ⴰⴷ ⵅⴰⵙ ⵢⵉⵍⵉ ⵓⴼⵓⵙ ⵏ ⴽⵓⵍ ⵍⵎⴻⵙⴽⵉⵏ.23ⴰⵢⴰ ⴰⴷ ⵢⵉⵍⵉ ⵃⵉⵎⴰ ⴰⴷ ⵉⵛⵛⵓⵔ ⴰⵄⴻⴷⴷⵉⵙ ⵏⵏⴻⵙ, ⵡⴰⵀ, ⴰⵔⴻⴱⴱⵉ ⴰⴷ ⵅⴰⵙ ⵉⵙⵙⴻⴽⴽ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵙ, ⴰⴷ ⵜ ⵢⴰⵔⵔ ⴰⴷ ⵅⴰⵙ ⵉⵡⵡⴻⵜ ⴰⵎ ⵡⴻⵏⵥⴰⵔ ⵓⵛⴰ ⴰⴷ ⵜ ⵢⴰⵔⵔ ⴰⴷ ⵉⵛⵓⴽⴽ ⴷⵉ ⴰⵔⵔⵉⵎⴻⵜ ⵏⵏⴻⵙ.24ⵡⴰⵅⵅⴰ ⴰⴷ ⵢⴰⵔⵡⴻⵍ ⵣⵉ ⵍⴻⵙⵏⴰⵃ ⵏ ⵡⵓⵣⵣⴰⵍ, ⴰⴷ ⵜ ⵉⵙⵙⵏⵓⵇⵇⴻⴱ ⵍⵇⴻⵡⵙ ⵏ ⵏⵏⵃⴰⵙ.25ⵉⵊⴻⴱⴱⴻⴷ ⵉⵊⵊⴻⵏ ⵣⵣⴰⵢⴻⵙ ⴼⵍⵉⵜⵛⴰ, ⴰⵇⴰ ⵜⴻⴼⴼⴻⵖ-ⴷⴷ ⵣⵉ ⴰⵔⵔⵉⵎⴻⵜ ⵏⵏⴻⵙ, ⵍⵎⴰⵛⴰⵎ ⵢⴰⵔⴻⵇⵇⴻⵏ ⵉⵜⵜⴻⴼⴼⴻⵖ-ⴷⴷ ⵣⴻⴳ ⵉⵥⵉ ⵏⵏⴻⵙ, ⵡⴰⵀ ⵉⵏⴻⵅⵍⵉⵄⴻⵏ ⴰⴷ ⵅⴰⵙ ⴽⴽⴻⵏ.
26ⵜⴰⴵⴻⵙⵜ ⵜⴻⴽⵎⴻⵍ ⵜᵉⵜⵜⵃⴰⵎⴰ ⵖⴰⵔ ⵜⵅⵓⴱⴰⵢ ⵏⵏⴻⵙ ⵉⵏⵓⴼⴼⴰⵔⴻⵏ, ⵜⵉⵎⴻⵙⵙⵉ ⵡⴰⵔ ⵜⵜ ⵉⵙⵙⵉⵖ ⵓⵍⴰ ⴷ ⵉⵊⵊ, ⴰⴷ ⵜ ⵜⴻⵛⵛ, ⴰⴷ ⵜⴰⵔⵔ ⵎⴻⵥⵔⵉ ⴰⴽ-ⴷ ⵢⵉⵏⵏⵉ ⵉⵛⴻⵟⵟⴻⵏ ⴷⵉ ⵜⵇⵉⴹⵓⵏⵜ ⵏⵏⴻⵙ.27ⴰⵊⴻⵏⵏⴰ ⴰⴷ ⵉⵄⴰⵔⵔⴰ ⵍⵎⵓⵄⵚⵉⵢⵢⴻⵜ ⵏⵏⴻⵙ, ⵜⴰⵎⵎⵓⵔⵜ ⴰⴷ ⵅⴰⵙ ⵜⵖⴻⵡⵡⴻⵖ.28ⵍⵖⵉⴵⴻⵜ ⵏ ⵜⴰⴷⴷⴰⵔⵜ ⵏⵏⴻⵙ ⴰⴷ ⵜⵔⴰⵃ, ⴰⴷ ⵜⴰⵣⵣⴻⵍ ⴷⴻⴳ ⵡⴰⵙⵙ ⵏ ⵡⴻⵖⴹⴰⴱ ⵏⵏⴻⵙ.
29ⵡⴰ ⴷ ⵎⵉⵏ ⵉ ⴷⴷ-ⵉⴽⴽⴰⵔⴻⵏ ⵉ ⵉⵄⴻⴼⴼⴰⵏⴻⵏ ⵣⵉ ⴰⵔⴻⴱⴱⵉ, ⵜⴰⵙⵖⴰⵔⵜ ⵉ ⴷ ⴰⵙ ⵉⵏⵏⴰ ⴰⵔⴻⴱⴱⵉ.
expand_more
Search