1Sofale mu-Nama tubaka:2Ni yawu yina, mabanza ya munu ya manyongo ya munu ke na kunata munu na kupesa mvutu,samu ti ntima ya munu ke na kubaba.3Mu ke na kuwa bansembolo yina kele bifingu samu na munu,mpeve ya munu ke pesa munu mayela ya kupesa mvutu.4Nge zaba ve ti, katuka ntama,kubanda ntangu yina Nzambi tulaka muntu na ntoto,5lunungu ya bantu ya yimbi ke zingilaka ve bantangu mingi,mpe ti kilengi yina bantu ya masumu ke talaka, yawu ke vwandaka kaka ya mwa ntangu fyoti?
*
6Ntangu mutela ya yandi vwandaka kuma tii na dizulu,ntangu yintu ya yandi vwandaka kuma tii na matuti,7yandi ke zimbana ya mankululu mutindu ke zimbanaka matufi.Bayina vwandaka tala yandi ke tuba:«Wapi kisika yandi me kuma?»8Yandi ke zimbana mutindu ndosi,mpe ba ke tala dyaka yandi ve,ba ke bingisa yandi mutindu lumoni ya mpimpa.9Bayina vwandaka tala yandi, ke tala dyaka yandi ve,na kisika yina yandi vwandaka zinga, ba ke tala dyaka yandi kuna ve.10Bana ya yandi fwana kufuta bayina bawu salaka ti ba kuma bamputu.Na maboko ya yandi mosi, yandi ke vutula na bamputu bimvwama ya yandi.11Nzutu ya yandi nyonso vwandaka ngolo mutindu ntwenya,kasi ni yawu ke kwenda na yandi na yisi ya ntoto.
*
12Kana yimbi kele mbote na kati ya yinwa ya yandi,kana yandi bumba yawu na yisi ya ludimi ya yandi,13kana yandi bumba yawu kondwa kubika yawu,kana yandi tatamana na kubumba yawu na yinwa ya yandi,14madya ya yandi ke kituka na kati ya kivumu ya yandi.Na kati ya yandi, yawu ke kuma mutindu mante ya mpidi.15Bimvwama yina yandi minaka, yandi ke luka yawu,Nzambi ke katula yandi yawu na kivumu.16Yandi fifaka mante ya bampidi,ludimi ya bampidi ke kufwa yandi.17Yandi ke tala dyaka ve bamwila,mpe banzadi na muzumba ya mafuta ya nyosi na miliki ya mbote!18Yandi ke vutula ndandu yina yandi kuzwaka, yandi ke mina dyaka ve yawu,yandi ke yangalala dyaka ve na bima ya mumbungu ya yandi.19Samu ti, yandi nyokolaka bamputu mpe yandi mangaka bawu.Yandi labaka bima na bayinzo yina yandi tungaka ve.20Yandi yukutaka ve na bansatu ya yandi,na luzolo ya yandi ya bima ya yinza, yandi ke bikaka ata kima ve.21Mutindu yandi vwandaka yukuta ve na bansatu ya yandi,ni yawu buyenge ya yandi ke zingila ve.
*
22Na kati ya bimvwama ya yandi ya kulutila, yandi ke vwanda na kati ya bampasi,bampasi ya konso mutindu ke bwidila yandi.23Ntangu yina yandi ke na kufulusa kivumu ya yandi,Nzambi ke fidisa yandi nkele ya yandi ya kulutila,yandi ke nokisa yandi yawu mutindu mvula na nzutu.24Kana yandi kima samu na kusosa na kuvuuka na binwanunu ya bisengo,munani ya kisengo ya mbwaki ke tobola yandi nzutu.25Kana yandi katula dyonga yina me kota yandi na nzutu,mpe mbele yina ke lezimaka, yina me kota yandi na mbala ya kivumu,boma ya lufwa ke kuzwa yandi.
*
26Ba me losa bimvwama ya yandi na kati ya kitombe ya kulutila,tiya yina ke na kulema yawu mosi ke kwiza yoka yandi,tiya ke nyengisa nyonso yina ke bikana na yinzo ya yandi ya lele.27Dizulu ke lakisa yimbi ya yandi na pwelele nyonso,mpe ntoto ke balukila yandi.28Nyamba ya maza ke nata bima ya yandi,na kilumbu yina Nzambi ke lakisa nkele ya yandi.29Ni musendo yayi Nzambi kubikaka na muntu yina ke salaka yimbi,ni mvwilu yayi Nzambi salaka nsilulu ya kupesa yandi.