Sopar i varvai ure nam ba na vana rikai pire ra umana tena varpiam
1Ma Sopar ra te Nama i ga tata ma i ga biti:2A nuknukigu i tata bali iau,Tago i malamalapang ra balagu.3Iau ga valongore ra tinata varbat nina i vul iau,Ma ta kaugu minatoto ra tulungeagu i tata bali iau.4Dave, pa u ga nunure ba papa amanamana iat,Ma papa di ga vaki ra tutana ta ra rakarakan a gunagunan,5A tena varpiam pa i tia kakakalai vavuan,Ma ra gugu kai ra tutana vakuku i kom pit?6Ona i ngala tuk ta ra bala na bakut,Ba ra uluna i tadav ra bakut,7Da kamare vue da ra putana;Ma diat dia ga nunure diat a titir dari: I ki ave?8Na panie da ra ririvon, ma pa da na tadav ia;Maia, da korot vue da ra ninana ta ra marum.9Ra kiau na mata i nina i ga gire pa ia, pa na gire mule;Ma kana gunan pa na na mule.10A umana natuna diat a anan upi ra maramaravut kai ra umana luveana,Ma ra umana lima i diat diat a valilikun kana tabarikik.11Ba ra umana uruna dia dekdek boko da ra barmana,Na mat damana ta ra tobon.12Gala ra varpiam i kalami ta ra ngiene,Ma gala i ive ta ra vavai na karameana,13Ma gala i valaun vake boko ta ra ngiene,Ma pa i mainge ba na marue vue,14Gala ra nian ta ra balana na mapak,Ma na da ra taring kai ra umana vui tana.15Na marue vue ra tabarikik nina i ga konom vake,Ma God na vairop vue kan ra balana.16Na num pa ra taring kai ra umana vui;A ngie i ra vui na karat doka.17Pa na gire ra umana tava alir,Dia alir ma ra polo na livur ma ra bira na polo na u.18Nam i ga ongor upi ia, pa na konom ia, na valilikun ia ka;Ma pa na gugu ta nam i ga lu varurue.19Tago i ga ki taun ra umana luveana ma i ga nur vue diat;I ga kale pa ra pal nina pa i ga pait ia.20Ma tago pa i ga ngo ta ra parurai,Pa na tia valaun pa ta magit nina ba i mainge.21Tago pa ta magit i ga ki valili ta nina i ga ra pa ia;Damana kana kini na uviana pa na tur vatikai.22Ta kana kini na uviana na ki kaina;Ma ra dekdek na kini na malari na tadav ia.23Ba i to na vabuka ra balana,God na karangap ure,Ma kana kankan na bura taun ia ba i iaian.24Ba i lop kan ra vargal na palariam,Da ponok ia ma ra panak di pait ia ma ra palariam gobol.25Ra pu i ga vila vurpu uro ra muruna,Ma ra ngie na pu i ga toro ra katina;I burut na kaia.26A bobotoi i ki na vaninara ure kana lavur ngatngat da magit;A iap nina pa ta tutana i vu ia na tun vue;Na tun vue bula ra magit i ki valili ta ra kubana.27A bala na bakut na vaarike kana varpiam,Ma ra rakarakan a gunagunan na tut ure.28Da mulue vue ra lavur tabarikik ta ra kubana,Da kap vue diat ta ra bung na kankan kai God.29Go iat ra tiniba kai God nina i tibe ra tena varpiam me,A magit ba na kale pa ia tai God.