Kuwi20hch_wb2

Hutarieka Tsupaxi kemutayɨ

1Mɨkɨ hepaɨtsita Tsupaxi Namati kiekame mɨpaɨ kaniutayɨni:2«Ne'eriwametsie waɨkawa nemɨnehɨawekɨ yanepɨtayɨni,yemekɨ 'aixɨa nepɨkareu'erie.3Tierika ne'u'enieka yukɨnepɨreka'erietɨya,kenemɨtimaiwekɨ pɨnetsikuyuitɨwa nemɨtaniunikɨ.
4»'Ekɨ pepɨtimate meripaitɨ,kepauka Kakaɨyari tewi mukayetsie kwiepa,5'axamɨtiuka'iyari kemɨtiyutemawie 'apɨkareutere,Kakaɨyari mɨka'ayexeiya temawierikaya yakatinimieni.6Kemɨtiyuta'ɨrekɨ tsepanetɨ muyuawitsie mɨye'axemeta tsepa yumu'ukɨ haiwitɨri mukuyuituwa,7mɨkɨ kanikumawerimɨkɨ yuheyemekɨ, kwitarai hepaɨ,memeitima mɨpaɨ mekanitiyuakuni: “¿Ke'ɨyɨ?”8Yɨwikɨta mɨtiuheinɨni hepaɨ, tɨkarikɨ mɨtiuxeiyatsitɨarieni hepaɨ,yapauka pɨtapare tawariri pɨkataxeiyarieni.9Keyupaɨmetɨ memixei tawariri mepɨka'ixeiya,meta hakewa mekateitsie hutarieka pɨkanuani.10Niwemamata tixaɨtɨ memɨkatehexeiya mekateniwayetuiriekuni,wapaapa tita mɨtiunawakai.11Xe'umete mɨtɨrɨkawi hikɨ xetemaritɨkaku'uxa'atɨni warie mɨkɨ hamatɨa xekanika'uxipikuni tumuanaritsata.
12»Tsepa yuteta 'axamɨti'ane hakakame memɨ'eriemeta yuneni hetɨa mi'awieta,13tsepa mɨkahewayetuaya,matsi xɨka 'i'awietani ka'itaunietɨ,14mɨkɨ paa kwa'ameyatsie yekaitɨ kanatsiɨrimɨkɨ,mɨkɨ taɨtana yekaitɨ xaye meixeiya 'uaye mumɨya hepaɨ 'anetɨ kanayeimɨkɨ.15Waɨkawa mɨrexeiyanikɨ kemɨranukaxɨ kanitahayamɨkɨ,Kakaɨyari yakatiniyurimɨkɨ yuhuriepa menatihayanikɨ.16Kuu meixeiya 'uaye mumɨya kananatiyuinimɨkɨ,kuu nenieya mumɨya kanimiemɨkɨ.17'Aki muyehapanetsie pɨkakuyani,retsi kuneriyari meta xiete hatɨayari muyehapanetsie,18Pɨkatitikwani tita mɨra'iwaxɨ yu'uximayatsikakɨ,pɨkayukatemawieni tita waɨkawa mɨtiukaxeikɨ,19tixaɨtɨ memɨkatehexeiya mɨtiwarunawairikɨ waɨriyarika wapitɨatɨ tixatɨ mɨkatiwaruhayewikɨ,meta kii mɨka'utiwewi kutsiyari mayuyeitɨakɨ.
20»Yuhukatsie pɨka'utahɨpɨrike,tita mɨtikwaimɨkɨkai pɨkatiutatetexiwakai.21Tita mɨtikwakai pɨkakuhayeikawakai,'ayumieme kayuwatɨ kemɨrexeiyakai 'apɨkareutere.22Kepauka waɨkawa mɨrexeiya, haweri katiniyurimɨkɨ,hetsiena 'axati'anetɨ rahetetɨ katinanutatemɨkɨ.23Kepauka 'axamɨtiuka'iyari yutaɨta mɨtahɨne,Kakaɨyari waɨkawa yuhaxɨa mɨkɨ hetsie kanitatuamɨkɨ,hetsiena mukawiye hepaɨ.24Tsepanetɨ muyuta'unaxɨ tepɨakɨ mɨtiwewiyatɨka 'imieriyarikɨ,'ɨrɨ wurunitseyarikɨke kanenuyexuimɨkɨ.25Kepauka nemaya hetsie meta wari'ɨtɨana'ɨrɨ mɨtsɨmeyari xehahanake xemuyuta'inɨata,xekanitimamakuni tsiɨrika xexeiyatɨ,26tita waɨkawa mɨraye'atɨkatei mɨrexeiyakai makɨyɨwitsie kaneukaxɨriyamɨkɨ.Tai ka'anutihɨtsieriwatɨ kanitaxɨtsitɨamɨkɨmeta tinaime kiitana tita mɨreyuhayewa.27Taheima muyema muyuawi katinitahekɨatamɨkɨ ke'axamɨtiuyurikɨ,kwie meta yapɨtayɨni mitaxanetakɨ.28Kepauka Kakaɨyari haxɨaya maye'anitsie,haa tɨrɨkaɨyetɨ kaniwayenemɨkɨ kiiya kanita'unamɨkɨ.29Kakaɨyari mɨpaɨ katinikuha'aritsirieka 'axamɨtiyuriene,mɨpaɨ ti'aneme xeikɨa katinenayexeirieni».
expand_more
Search