Iyyoba Maxaafa20gof_ltw

Soofara Haasaya

1Na7ima biitta asi gidida Soofari haysada yaagidi zaaris;2“Ne oday tana lancisida gisho,ta ellesada ne odaas zaaro immana.3Ne oday ta bonchuwa qaariya gisho,ta akeekay new zaaro immana mela tana denthethees.4Asi biitta bolla de7ida wodepe doomidi,benipe hanidaba eraasa.5Iita asa ceeqoy qantha wodesa;Xoossaa eronna asaa ufaysay guutha wodesa.6Iita asa otoroy salo gakanaw dhoqu giikoka,iya huuphey shaara gakidi bochikoka,7I baana mela pitetidi dhayana;Iya kase eriya asay ‘I awun de7ii?’ yaagana.8Elmoda paallidi dhayana; simmidi bentenna;qamma amuhoda coo dhayana.9Iya kase be7ida ayfeti zaaridi iya be7okona;I ba de7iya bessaafe tim7i gidi dhayana.10Aaway bonqi ekida miishe,iya nayti banta kushen guye zaarana.11Iya meqethaa kumida na7atetha wolqayiyara issife biittan zin7ana.
12“Iitatethi iya doonan mal7iko,I ba inxarsaafe garsan qosiko,13wuronnaada ba doonan oykidi,wothi aggiko,14iya uluwan camo gidana;wodhiya shoosha marze gidana.15Iita asi mitida shaluwa zaari cuttana;iya uluwan de7iya ubbaa Xoossay cooshshana.16Iita asi miyabay iyaw marze gididi,iya wodhana.17Eessinne maathi haathada goggishin,I be7onna attana.18Ba daabura ayfiya moonna haras immana;zal7idi wodhisida wodhiyan ufaytenna.19Hessi haniday I manqota un7ethida gishonnehara asi keexida keethaa bonqida gishosa.
20“Iya iita amoy shempo diggis;shiishida shaloy iya ashshanaw danda7enna.21Iya shaloy wuriya gisho,iya duretethay gam7enna.22Iyaw aqoy kumidi de7ishin,metoy akeekona iya bolla gaki wodhana.23Iya uloy kaalliya wode,Xoossay wolqaama hanquwa iya bolla gussana.24Birata mashshafe I baqatana;shin naase birata dongey iya caddana.25He dongey iya zokora kanthi keyana;phooliya xeeray iya tiriya kanthi aadhana;dagami iya wozanaa waabaqisana.26I shiishida aqoy sakana dhuman dhayana;asi oythiboonna tami iya maana;iya keethan attida shalo ubbaa xuuggana.27Saloti iya nagaraa qoncisana;sa7ika iyaw morke gidana.28Xoossaa hanqo gallasan,iya keethaanne iyaw de7iyaba di7oy efana.29Xoossay geellatas wothida qaaday,iita asaas giigisida gatey haysa” yaagis.
expand_more
Search