Diyobi2bxh_wbt

Diyobi ana Lauꞌita Fafaluwagana

1Fuya hesa anelu sa laoma Guyau matana yai na Tau Laulau Fagilu, Satani, hinaga ya laoma.2Guyau ya libalau Tau Laulau Fagilu lisina iyen, Somo yai wa laolaoma?
Guyau alinana, Tau Laulau Fagilu ya bui iyen, Tanoꞌubu E lau tiga fataꞌiꞌili. E leu yo E sai ganahewana yai.
3Habahim Guyau ya libalau Tau Laulau Fagilu lebena iyen, Egu tau lau fayofayo, Diyobi haꞌa wa nuwatuhu fadosi e higeꞌe? Hige sai laꞌi doha in. In doga dudulaina, hige gilu hesa lisina yai. Yaubada ya fafadebasae yo heyaya ya anꞌanfaleꞌedi. Satani! Wa nuwa liuwigu bena pilipili hige aniyona hesa E felen, in moho laulau dudulaidi hola ya ginaginaulidi yo hola ya fafadebasaegu.
4Tau Laulau Fagilu iyen, Edi mwahuli debadi yai dodoga haba edi ginauli mahudoꞌidi sa nuwa afuledi, bena tabu ti peꞌi.5Haga u abilau tauna yai be u fakamkamna, haba ai nuwanuwam ya kaumanana fafaheyayam.
6Guyau ya libalau Tau Laulau Fagilu lebena iyen, Logena, nimam yai E tole afulen, in moho tabu u wunui.

Diyobi ana Asiyebo

7Habahim Tau Laulau Fagilu, Guyau ya lau afulen na ya lau be bonu kamokamoꞌuꞌu ya yala fafinahe Diyobi lisina yai. Tauna mahudoꞌina sa tupitupi, ahe laulauna yai ya hasai ee–, kuluna.8Diyobi afusa yai ya taꞌai paꞌana nuwana ya heyaya, na gulewa senana ya abi be bonu kamokamoꞌuꞌuna ya kamkam holidi.9Lahuna ya libalau lisina iyen, Paꞌana somo em kawawananaha yo laulau dudulaidi sa ota esegahi? Yaubadana u kaumananaen be u peꞌi!
10Diyobi, lahuna ena liba ya bui iyen, Wa libaliba doha waihin yauyaulena. Loholoho, Yaubada ya feleda, haba te abi. Na heyaya te ꞌwaiyoꞌoꞌen? Libadi yai te, Diyobi hige i liba heyaya.

Diyobi Haidana Faihona

11Fuyanna haidana faihona sa atahi mate pilipili ya fahoina, be sa faꞌoi esega, bena sa lau Diyobi lisina. Be ena kamkamna ganahewana yai, nuwana sa liba faꞌadidili. Afa haidana hesadi mate: Elifasi, Teman Taonna dogana, Bilidada, Suwa Nuꞌuna dogana, yo Sofala, Namati Nuꞌuna dogana.12Edaꞌeda lofalofa yai sa ita lawen na Diyobi hige ti ita lobahi. Sa fatubu sa tan laꞌilaꞌi, na adi luhuluhu sa kam giginidi yo gegebula sa pei hasa kuludi yai.13Habahim maꞌedi tanohi yai sa taꞌai amainiya ee–, lahai faligigi luwaga yo iꞌipa faligigi luwaga sa ofi. Hige ti fagagali paꞌana ena kamkamna sa ita ya laꞌi wananaha.
expand_more
Search