Ayubu alengerera omu buyêmêre, ciru ankabà abantu na Nyamuzinda bamulekêrire
1Okubundi Ayubu, anacij’eluhya aderha, erhi:2Yâgi! Mangaci mwaleka okukazimbabaza omurhima, mwandibuzize n’ebinwa binyu.3Lolagi oku bukola bwa kali ikumi obûla mwanjâcira buzira nshonyi mudwîrhe mwandibuza.4Akabâga nieki nahabusire, okwôla kuhabuka kwâni nie kuyêrekîre.5Akabà mwayumva oku mumpimire, mwanabona oku mwanantenza omu nshonyi zâni,6muyôrhe mumanyire oku Nyamuzinda yêne wanyanzire obuhashe bwâni, ye wanziririnzire n’akasirha kâge.7Lolà oku ndwîrhe nalonza hajire owayisha rhulwe, na ntâye wanshuza ndwîrhe nayâkûza ci ntâye wanshuza.8Anahizire omu njira yâni ecikûnguzo ntankahama, omukâba gwâni anaguyunjuzize mwizimya.9Anyazire irenge lyâni, Ampogwîre ishungwè omu irhwe.10Amanshambûla empande zoshi, na ncikolera, nka kula bamanyula omurhi, kw’amanywîre obulangâlire bwâni.11Anayûsize kuli nie obukunizi bwâge, anakola anganjire omu bashombanyi bâge.12Engabo zâge zamâyisha zoshi caligumiza, zamâtwa enjira kuhika emunda ndi, zamâtwa ecihando ebwa nyumpa yâni.13Anyegwîre kuli na bene wîrhu boshi, n’abîra bâni banyasire.14Abalûngu bâni bahirigisire, n’abîra bâni banyibagîre.15Ebigolo by’omu nyumpa yâni, na bambali bâni, badwîrhe bandola nka muntu warhenga kuli, ndi wa bandi bandi omu kulola kwâbo.16Ndwîrhe nayâkûza omurhumisi wâni, arhananshuze, ciru omu kanwa kâni nankamuyimbirira kurhi!17Mukânie ayâsire akabayo kw’omûka gwâni, abarhurhenga nda nguma rhweshi, mpu ndwîrhe nabaya!18Abâna nabo badwîrhe bangayaguza, erhi nakayimânga, banarhondêre banshekera,19Abàli bîra bikubagirwa, banyasire, abanarhonyagya bacîyêgwîre kuli nie.20Amavuha gâni gakola gananire oku luhù n’oku minyofu yâni, nkola ndwîrhe nacirhabâla n’oluhù lw’amîno gâni.21Mbabaliri, mbabaliri, ciru mw’oyo bîra bâni, ebwa kubà okuboko kwa Nyamuzinda kwamponîrekwo.22Bici munshimbulwîre kwo mweshi na Nyamuzinda? Ka murhaciyîgurha emyâmâ yâni?23Yajeewe! Ndi wankabona ebi binwa byâni byayandikwa? Ndi wankabona bija oku citabu,24N’omungwâra gw’ecûma n’olunyerere, bitâkwe okw’ensiku zoshi oku ibuye.25Niono mmanyire oku omwihôzi wâni anali Ozîne, n’oku ye wayîsh’iyimanga wa buzinda oku katulo.26Kandi buzinda nkola nyimanzire, mbà namâshubira omu luhù lwâni, mbà namâzongwa nalwo, n’omubiri gwâni nayîsh’ibona Nyamuzinda.27Nienene namubona amasù gâni gamulolakwo, arhali wundi, ensiko zâni zagera mw’omusisi.28Amango muderha mpu: cirhumire rhumushimbulula, mpu rhubwîne muli ye igwârhiro lya kantu kalebe?29Mucilangâge oku ngôrho mwenene, bulya obukunizi oku mabî eri ngôrho, ntyo mwanamanya oku ho kubà okutwa olubanja.