Kuwi19hch_wb2

'Ataxewirieka Kuwi kemutayɨ

1Mɨkɨ hepaɨtsita Kuwi mɨpaɨ kaniutayɨni:2«¿Kepaukakeri xepɨnetsihayewa xenetekwinitɨatɨmeta yuniukikɨ xenetsi'anukapɨnatɨ?3Mɨixari yaxepɨnete'utahɨawixɨ.Waɨkawamekɨ 'axaxepɨnetsiyurie karixepɨkaheyutetewiya.4Xɨka xeniu tiyuritɨni neri xaɨtsie neheukuyune,'axakenemɨtiuyuri nehetsie nepɨtiuyuri.5Matsi xɨka xeme 'aixɨa xe'aneneme xeyu'erieka nehepaɨtsita,meta xemamariwaweme xeyu'erieka xemaye'axɨanikɨ nehetsɨa kenemɨkatiyɨwekɨ ne,6mɨpaɨ xeketenemaika Kakaɨyari pɨta pɨnetsiyuriene kemɨ'ane mɨnetikwinitɨa,kemɨ'ane winiyarieyatsie nemuyewie.
7»Tsepa mɨpaɨ nemɨtiuhiwa: “Nepɨnanaimarie”, xewitɨ pɨkanetsiha'eiya,tsepa xekeneneuparewi nemaine, nehetsie pɨkatinuitɨ.8Kakaɨyari nehuye panunari, nepɨkayɨwe nemanutayanikɨ,nehuye 'uyɨwime kanayeitɨani.9Naime pɨnetiunawairi titakɨ 'aixɨa nemɨtixeiyariekai,nemu'utsieri kuruna pɨnetsi'anutihaniri.10Naime pɨnetsiheutiwitexɨa, kɨye hepaɨ,pɨnetsi'akumaweriyaxɨ, tita nemɨtitakwewiekai pahunaxɨ nanayaritsie paitɨ.11Nehepaɨtsitari kaniuyeha'ani,kemɨ'ane mɨkɨ muwaraye'unie kanenayeitɨani.12Kuyaximama meyuwaɨkawatɨ 'upɨta mekanahuni,yuhuye mekaniuwewiximeni nehetsɨa meye'axɨanike,nemanuka 'aurie mekanikuyaxe.
13»Yapɨtiuyuri ne'iwama memɨnetsiku'eirienikɨ,meta nehamikuma mepɨnetsihehɨari.14Nemarema nemuwamatekai mepeutayeixɨa,mepɨnetsihatɨmairi yuheyemekɨ.15Nekie memɨ'iwata, meta nete'uximayatsiriwamete memɨkanetsimateni hepaɨ xeikɨa mepɨ'anene,kwi mepɨnetsikuxexeiya mɨxeɨmatsiwa hepaɨ.16Mɨneti'uximayatsirie nepahɨawe, matsi mɨkɨ pɨkanetsiku'eiya,tsepa netɨtɨ nekatihayewatɨ nemiwawirie.17Ne'ɨya ne'iiya pɨxani'erie,yaxeikɨata ne'iwama 'axamepɨnete'ɨkwe.18Matsipaitɨri tɨɨri mepɨkanetsixeiyaku,kepauka memɨnetsikuxexeiya, mepɨnetsiyuriya.19Yunaitɨ nehamikuma mepɨnetsixani'erie,yunaitɨ memɨnetsinaki'eriekai mepɨnetsi'aye'unie.20Nenawiyari meta newaiyari ne'umetetsie pukuwewerikeri,netiuka'eniwatɨ 'etsiwa nepayeyuri.
21»Xekeneneutinenimayata nehamikuma xemɨhɨkɨ,xekenenenenimayaka, Kakaɨyari pɨnetsi'anayewaxɨa.22¿Titayari Kakaɨyari hepaɨ xenetekuweiyatɨwe?¿Xe'iyaritsie kareuyeyeika ne'ayeniereme xenetekwa'a?
23»Xɨka neniuki haka'ɨkienike,xɨka xapatsie haka'utɨarienike.24Xɨka matsi yuheyemekɨ tetetsie yuhayewake,ha'ɨkietɨ tepɨa kwaniyariekametsie ti'utɨwamekɨ.25Ne nepɨtimate nehetsie nunuwame payeyuri,meta 'imatɨrieka panukukeni tumuanaripa.26Kepaukari newaiyari mɨka'une,'akuxi Kakaɨyari nehɨxikɨ nekanexeiyamɨkɨ.27Ne nekɨmana nepixeiyamɨkɨ,ne yanepɨra'eriwakaku nemixeiyakɨ, xewitɨ kamatiwatɨ hawaikɨ.Mɨyanemɨtinekɨhɨawekɨ heiwe'erika pɨnetsitaxɨtɨaxime netaɨta paitɨ.
28»Xeme mɨpaɨ xeputiyuane: “Hikɨmɨ hetsiena tepɨtehahɨani,mɨkɨ hetsie 'axamɨti'ane katinixɨaweni”.29Matsi xekeneyɨ'ɨwiyani 'ixipara hepaɨtsita,mɨkɨkɨ haxɨaya 'ukanamieni tita 'axatemɨteyurie hepaɨtsita,xemɨtemaikakɨ kename 'itsɨkame 'a'uwe».
expand_more
Search