Read أَيُوبْ 14

أَيُوبْ14rif_ati

أَيُوبْ إِسِّيوڒْ أَكْ-ذ صُوفَارْ خْ ڒْموْثْ

¹بْنَاذمْ إِ د-إِتّْوَاخڒْقنْ زِي ثمْغَارْثْ، أَقَا ؤُسَّانْ ن ثُوذَارْثْ نّسْ ؤُذْرُوسنْ ؤُ نتَّا إِشُّورْ س ڒحْوڒْ.²نتَّا إِغمِّي أَمْ ثْنوَّاشْثْ، خنِّي إِتّْوَاقْضعْ. إِتّْرَاكّْوَاڒْ أَمْ ثِيڒِي، وَارْ إِتّْغِيمِي.³وَاخَّا أَمنِّي ثَارزْمذْ ثِيوَا نّسْ ثِيطَّاوِينْ نّشْ، ثتَّاوْيذْ أَيِي-د ذِي دّعْوثْ أَكِيذكْ.

⁴مَانْ ونْ إِزمَّارنْ أَذْ إِسُّوفّغْ إِجّْ ن ؤُمزْذَاڭْ زڭْ ؤُمخْمُوجْ؟ ؤُڒَا ذ إِجّْ!⁵مَارَا ؤُسَّانْ نّسْ ؤُرِينْ، ڒْْقدّْ ن إِيُورنْ نّسْ أَقَا إِتّْوَاسّنْ غَاركْ ؤُشَا ثڭِّيذْ أَسْ ڒحْذُوذْ نّسْ نِّي وَارْ ذ أَسْ إِعدّڒْ أَذْ ثنْ إِعْذُو،⁶نقْڒبْ خنِّي خَاسْ مَاحنْذْ أَذْ يَاريّحْ، أَڒَامِي إِزمَّارْ أَذْ يَارّْ مژْرِي أَمْ يِيجّْ ن ؤُشوَّاڒْ ذڭْ وَاسّْ نّسْ.

⁷مَاغَارْ إِ ثْشجَّارْثْ أَقَا ذِينْ عَاذْ ڒَايَاسْ! مَاڒَا ثتّْوَاقسّْ، أَذْ ثسُّوفّغْ عَاوذْ ڒفْرُوعْ، ڒفْرُوعْ نّسْ وَارْ تّْبذِّينْ زڭْ ؤُغمِّي.⁸وَاخَّا إِوْسَارْ وژْوَارْ نّسْ ذِي ثمُّورْثْ، إِمُّوثْ جّْذعْ نّسْ ذڭْ ؤُشَاڒْ،⁹أَذْ ثغْمِي ثْشجَّارْثْ عَاوذْ خْمِي غَا ثَاشَا أَكْ-ذ وَامَانْ، أَذْ ثسُّوفّغْ عَاوذْ ڒفْرُوعْ أَمْ إِشْثْ ن ثْشجَّارْثْ ژُّونْ ت بحْڒَا.

¹⁰مَاشَا مَاڒَا إِمُّوثْ إِجّْ ن ورْيَازْ، إِفنَّا، مَاڒَا إِفّغْ أَسْ بُوحْبڒْ إِ بْنَاذمْ، مَانِي إِدْجَا خنِّي؟¹¹أَمَانْ تّفّْغنْ-د زِي ڒبْحَارْ، إِغْزَارْ إِتَّاژغْ ؤُ إِخكّْوَا.¹²إِزّڒْ بْنَاذمْ ذِينْ، وَارْ إِتّكَّارْ عَاذْ. أَڒْ وَارْ تِّيڒِينْ عَاذْ إِجنْوَانْ، وَارْ ذ تّْفِيقِينْ، وَارْ تّْوَاسّكَّارنْ زڭْ إِضصْ نْسنْ.

¹³أَخْ، مْڒِي ذ أَيِي غَا ثَارّذْ غَارْ ڒَاخَارْثْ، أَذْ أَيِي ثسّْنُوفَّارذْ أَڒْ غَا إِحيّذْ وغْضَابْ نّشْ، مْڒِي ذ أَيِي ثُورِيذْ إِجّْ ن ڒْمِيجَاڒْ إِمْثنْ، حِيمَا أَذْ أَيِي ثِيذَارذْ عَاوذْ!¹⁴مَاڒَا إِجّْ ن ورْيَازْ إِمُّوثْ، مَا أَذْ د-إِذْوڒْ غَارْ ثُوذَارْثْ؟ خنِّي أَذْ قِّيمغْ تّْرَاجِيغْ مَارَّا ؤُسَّانْ ن ؤُمنْغِي إِنُو، أَڒْ د-يُوسَا ؤُفكِّي إِنُو.¹⁵مَاڒَا خنِّي شكْ ثْڒَاغِيذْ، نشّْ أَذْ شكْ د-أَرّغْ ؤُشَا شكْ أَذْ ثمّژْڒذْ غَارْ ڒْخذْمثْ ن إِفَاسّنْ نّشْ.¹⁶مَاشَا ڒخُّو ثْحسّْبذْ إِصُورَافْ إِنُو، وَارْ ثْمنّْعذْ لْغَاضَابْ نّشْ خْ دّْنُوبْ إِنُو.

¹⁷أَخطُّو إِنُو إِتّْوَاشمّعْ ذِي ثْشمُّوسْثْ، غَارْ ڒْمُوعْصِييّثْ إِنُو ثَارْنِيذْ ذَايسْ كْثَارْ.¹⁸وَاهْ، أَذْرَارْ إِوطَّانْ، إِفسِّي، جَارْفْ إِحْرُودْجذْ زڭْ ومْشَانْ نّسْ،¹⁹أَمَانْ تّدّْزنْ إِژْرَا، إِغزْرَانْ نّسْ تّكّْسنْ أَشَاڒْ ن ثمُّورْثْ، أَمُّو إِ ثَاردّْدْجذْ ڒَايَاسْ ن بْنَاذمْ.

²⁰شكْ ثَارنِّيذْ ذَايسْ إِ ڒبْذَا، خنِّي يُويُورْ. ثتّْبدَّاڒذْ ؤُذمْ نّسْ ؤُشَا ثسّكّذْ إِ-ث.²¹مَاڒَا إِحنْجِيرنْ نّسْ طّْفنْ شَّانْ، نتَّا وَارْ ث إِسِّينْ، مَاڒَا ثنْ ذدْجنْ، وَارْ كِيذْسنْ إِتِّيشِي.²²مَاشَا أَرِّيمثْ نّسْ ثتّْنزْبَارْ ذِي طّْوعْ ن يِيخفْ نّسْ وَاهَا، ؤُ ڒعْمَارْ نّسْ إِتّشْضِينْ ذِي طّْوعْ نّسْ.

أَيُوبْ 14 / rif_ati

أَيُوبْ إِسِّيوڒْ أَكْ-ذ صُوفَارْ خْ ڒْموْثْ

أَيُوبْ14rif_ati