Ayubu13shr_buk
1Ebyo byoshi, nabibwîne n’amasù gâni, nabiyumva n’aga marhwiri, nanabikirira.2Ebi mumanyire nâni byo nyîshi, ntâco mundushire muli okwo.3Ci kwône Nyamuzinda ye nâganîza Ngwêrhe binwa byâni nka binga nâbwîra Nyamuzinda.4Mw’abo, kusinga musinga ebinwa, muli bafumu ba bwihâmbi.5Ndi wankarhang’imununika munahumbârhale, lyoki mwankabona ninyu oburhimanya!6Muyumvagye nâni oku nasâmba, murhege okurhwiri, muyumve ecimbà ekanwa!7Ka mumanyire mpu mwayâza Nyamuzinda n’obunywesi, erhi binwa bya bulyâlya?8Ka mwe mwamuderhera, mubè bafungizi bâge?9Ka kurhankabîre kwinjà amuyêshûle? Ka naye ko mwamuha ebinioko kula bashekera omuntu?10Arhegimuhana kulya kw’enkwi n’amîshi, kuli obwo bulênzi bwinyu.11Ka ciru obukulu bwâge burhamuyôbohya? K’ecôbà câge cirhamuhiramwo cikango?12Emigani yinyu mukulûkulù, ebà mihigo y’omu katulo, n’okufûngira omuntu kwinyu, kunali nk’ibûmba lyâlangala.13Muhumbârhale, nie nkola naderha, oku byankabà bikubè!14Omubiri gwâni ngusêzize n’amîno, omûka gwâni aha nfune ngudwîrhe.15Yenè, ankanyîrha anyîrhe: Ci kwône ncîkubagîre okuyêrekana obushinganyanya bwâni omu masù gâge.16N’okwo kwône kwânanciza, bulya enkola-maligo erhankacîshomya mpu yayimanga omu masù gâge.17Murhege okurhwiri, muyumve ebinwa byâni, muyumve kwinjà ebi ndesire.18Nkolaga najà lubanja, erhi nnamanyire oku nyâzize!19Ndi olya onjisizagye lubanja? Kano kânya, nyêmîrage mpulike nancifîre!20Onyêmêrere bibirhi byône, okubundi ntakacicîfulika embere zâwe:21Okuboko kwâwe ombarhuzize okuyêgûle, orhanacinkângaga n’ecôbà câwe.22Enyuma z’aho ohire izù enyânya, nâni nakushuza, ci kwône nanga, nie naderha nâwe onyeshûle.23Bubî bunganaci na byâha binga nakujirîre? Ombwîre obugoma bwâni, ebyâha byâni?24Cirhumire onfulika obusùbwâwe? Cirhumire ondola nka mwânzi wâwe?25Bici wakangira ehyàsi hiyehwîrwe n’empûsi? Bici oshimbire ôlukere lwayumûsire?26We odwîrhe wantôlera emihigo midârhi, oshubinanganjira obubî najizire omu bûshûke bwâni.27We wampizire amagulu omu byûma, we genda wansholera, ojè wasingiriza ngasi aha nagezize olushândo!28N’obwo omuntu kw’ashubira omu katulo nka cibolêreza, nka mwambalo gwalîrwe n’enshwa.