ዒዮቤ ማፃኣፖ13mdy_twf
1«ሃይሾ፤ ሃያ ቢያ ታኣኮ ዓኣፓ ዛጊናኣኮኬ፤ዋያኣ ታኣኮ ዋይዚ ዒና ዔኬኔ።2ዒንሢ ዔራሢጉዲ ታኣኒያ ዔዔራኔ፤ፔቴታዖ ታ ዒንሢዳፓ ዻካያቱዋሴ።3ጋዓንቴ ታኣኮ ጌኤዛ ዼኤፖ ፆኦዛሢናኬ፤ታ ዒዛና ማርማኔ።4ዒንሢ ጋዓንቴ ሉኡዙሞና ኩሜያኬ፤ዒንሢ ዼኤሻ ዔራያታዖዖናኣ ዓውሳኒ ዳንዳዑዋ ዓሲጉዲኬ።5ሃያይዳፓ ዚቲ ዒንሢ ጌዔያታቴዒንሢ ዔራ ማዒ ጴዻንዳያታዖኬ!»6«ታኣኒ ማርማ ማርማሢ ዋይዙዋቴ፤ታና ሄሌም ታኣኒ ሞኦታ ሞኦቶ ዚቲ ጌይ ዋይዙዋቴ።7ዓይጎሮ ዒንሢ ፆኦሲ ሱንፆና ሉኡዙሞ ጌስታይ?ፆኦሲ ጌሺሢና ዒንሢ ዒዛ ዎዛሳያ ማላ?8ሃንጎ ዒዛ ዛላ ዒንሢ ማዓኒ ማላ?ዒዛኮ ታርዤ ማዒ ዒንሢ ዔቃ?9ዒዚ ዒንሢ ባኮ ዛጋያ ማዔቴዒንሢዳፓ ፔቴ ባኣዚታዎ ኮሺ ዒ ዴንቃንዳኣሲንታኔ?ዓሶ ዒንሢ ዔኤያሳሢጉዲዒዛ ዒንሢ ዔኤያሳንዳያ ዒንሢም ማላ?10ዴሜና ዓኣሺንቲ ዓሲ ዒንሢ ዱማሳያ ማዔቴጎኔና ፆኦሲ ዒንሢ ጎራንዳኔ።11ዒዛኮ ቦንቻ ዒንሢ ዒጊቹዋዓዳ?ዒዛኮ ዼኤፑማ ዒንሢ ዲቃሡዋዓዳ?12ዒንሢ ኮኦኪንሦና ጌስታ ጌኤዛ ፓሡዋያ ዲቢንሢጉዲኬ፤ዒንሢኮ ማርማሢያ ዓጪዳፓ ኮሾና ሜሄጉዲ ሃይቃያኬ።13ሂንዳ ዚቲ ጎዑዋቴ፤ታኣኒያ ጌስቶም ታኣም ቤሲ ጌሡዋቴ፤ዬካፓ ማዓ ባኣዚ ማዖንጎ። »14«ታኣኒ ዓጮ ዻይ ሜታዺ ናንጋሢ ዓይጎሮዳዖ?ታኣኮ ዬያይዲፃ ታሼምፓሢ ባይዚ ማዓኔ።15ፆኦሲ ታና ዎዼያታቴያዒዛ ጉሙርቂፆ ታ ሃሻዓኬ፤ያዺ ማዔቴያ ታ ዓኣ ጎይፆዋ ዒዛም ኬኤዛንዳኔ።16ጎሜና ዓኣ ዓሲ ፆኦሲ ቤርቶ ሺኢካኒ ዳንዳዑዋኣሢሮጎዖንቴ ሃይ ታኣኮ ጫርሹማ ዻቂንታ ካራ ማዓኒ ዳንዳዓኔ።17ሂንዳ ታ ኬኤዛ ባኮ ዒና ዔኩዋቴ፤ታ ሺኢሻ ማርካቶዋ ኮሺ ዋይዙዋቴ።18ጌኤዞ ታኣኮ ኮይሳ ጎይፆ ዔኪ ታ ሺኢሼኔ፤ታኣም ዎጊንታንዳሢያ ታ ጉሙርቃኔ።19ታና ዎጎና ዓይሢሳ ዓሲ ዓኣያ ማዔቴታ ማርሙዋዖ ዚቲ ጌይ ሃይቃንዳኔ።20ፆኦሲዮ! ኔ ቤርታፓ ታ ዓኣሺንቱዋጉዲሃንሢ ላምዖ ባኮንሢ ታኣም ማዼ፤21ዬንሢያ፦ ኔኤኮ ሜታሳ ኩጮ ታጊዳፓ ዔቂሴ፤ኔኤኮ ዒጊቻያ ማዔ ዼኤፑሞና ታና ዲቃሢፖ።»22«ፆኦሲዮ! ቤርታዺ ኔ ኬኤዜ፤ታ ኔኤኒ ኬኤዜ ባኮኮ ማሂፆ ኬኤዛንዳኔ፤ሃንጎ ቤርታዺ ታ ኬኤዜምኔኤኒ ታ ኬኤዜ ባኮኮ ማሂ ታኣም ኬኤዜ።23ታ ማዼ ዻቢንቶና ጎሞና ዎማጉዴያዳይ?ሂንዳ ታ ዻቢንቶና ጎሞና ታኣም ኬኤዜ።24ዓይጎሮ ታጊዳፓ ኔ ሃካይ?ሃሣ ዓይጎሮ ታና ኔኤኮ ሞርኬ ማሂ ኔ ዛጋይ?25ዢባሬ ዲኢኒሻ ዋላሺና ሜልዚ ጎቦናጉዲዓይጋ ዒጊቺ ኔ ታና ዳውሳይ?»26«ኔ ታ ዑፃ ዻቢንቲኬ ጌዒ ኮሺ ጫንቺ ባኣዚ ፃኣፔኔ፤ናይ ዓኣዖ ታ ዻቢንቴ ዻቢንቶታዖ ኔ ዓይሲባኣሴ፤27ቶኮ ኔ ታኣኮ ዱፄና ቱኬኔ፤ፔቴ ፔቴ ታ ሃንታ ሃንቲፆ ኔ ታኣኮ ፓይዳኔ፤ታ ሄርቄ ኮጲዞዋ ኔ ዛጋኔ።28ዬያሮ ታኣኒ ዎዔ ባኣዚ ማዒ ዓታኔ፤ቢላ ሙዔ ማኣዖጉዲያኣ ታኣኒ ባይቃኔ።»