Ayub issiweř ak-d Bildad x lɣaraḍ n Arebbi s uweddeb
1Ittɛiffi řeɛmar inu zi tudart inu, ad barrḥeɣ acetci inu ammu waha břa amnaɛ, ad ssiwřeɣ ɣar tarzugi n řeɛmar inu.2Necc ad iniɣ i Arebbi: ‘War d ayi ttegg d aɛeffan, scen ayi, mayemmi akidi tᵉttmenɣid.3Ma ɣarek řefḍeř aqa Cek tḥeṣṣared ayi, aqa tneṭṭareḍ řxedmet n ifassen nnec, am tᵉttegged tafawt x ixarriṣen n iɛeffanen?4Ma ɣarek tiṭṭawin n bnadem, ma tᵉttwařid Cek am mammec ttwařan iwdan?5Ma ussan nnec am wussan n bnadem? Ma iseggʷusa nnec am yiseggʷusa n weryaz,6aqa Cek tarezzud ammu x řmuɛṣiyyet inu, tᵉttbeqqced di ddnub inu?7Waxxa Cek tessned aqa necc war ǧiɣ d aɛeffan, war din wenni i ɣa ifekken zeg ufus nnec.8Ifassen nnec xeřqen ayi, ggin ayi, aqa ttennḍen ayi, uca řexxu Cek tṣarḍed ayi.9Ɛqeř aqa Cek teggid ayi am tarrist, u ɣar tɛejjact texsed ad ayi tarred.10Ma war d ayi tzeǧɛed am uɣi, am kisu tejjid ayi ad ccreɣ?11S teřmect d weysum tessyarḍed ayi, s iɣsan d iẓewran temmuded ayi.12Tudart d tmexsiwt icuwwaren tewcid ayi tent, aḥeṭṭu nnec iḥḍa buḥbeř inu.13Txemmřed aya deg wuř nnec, necc ssneɣ belli aya tuɣa-t ɣarek di řbař.14Mařa xḍiɣ, Cek ad ayi teḥḍid, war d ayi tᵉttbarrid zi řmuɛṣiyyet inu.15Mařa ggiɣ řɣar, uct xafi! Mařa necc d amsegged i ǧiɣ, war zemmareɣ ad ssgeɛɛdeɣ azeǧif inu. Jjiwneɣ s řefḍiḥet, ttaciɣ ak-d řemḥayen inu.16Mařa ssgeɛɛdeɣ ixef inu, ad ayi tneymared am wayrad izehharen, řebda tᵉttneqřabed xafi s řɣefřet.17Meɛlik ufiɣ ad xafi tessbedded řebda icehhaden nneɣni, ad tarnid ɛad deg weɣḍab nnec xafi, iɛessasen i ixeǧfen ijj i wenneɣni řebda, wah, ad ɣari tnedhed ijj n řɛeskar.18Mayemmi d ayi tejjid ad dd-ffɣeɣ zeg uɛeddis n yemma? Mři ssuffɣeɣ buḥbeř, war d ayi tẓar uřa d ict n tiṭṭ!’19Meɛlik ufiɣ axmi war iřiɣ ɛemmarṣ, mmeksiɣ ɣar wenḍeř zeg uɛeddis n yemma.20Ma war ǧin wussan n tudart inu udrusen? Mři d ayi ijja, ad xafi inneqřeb maḥend ad farheɣ cwayt ɛawed,21qbeř i ɣa uyureɣ - war dikkwiřeɣ ɛad - ɣar temmurt n taǧest d tiři n řmewt,22ɣar temmurt d tabarcant am tmeddit, am tiři n řmewt, war din ittbin walu, mani tegga tfawt am tmeddit.