Jon9ncf_wbt
Iesu atoaa iexa taamat matababa
1Iesu a es laa, ga lasi iexa taamat matababa, xaal sin nagaa tii taxaana.2Xan no tsi asasing di atsuraa ia, â Rabai, saa xosaraa namaang tsaxa, ilawaa taamat, o xan mom ma nagaa biaa di tii ga taxaanai ia, ga se matababa?â3Iesu a xisi, â A xap ilawaa taamat o xan mom o xan nagaa di xosaraa namaang tsaxa biaa ga matababa, oro balawaa atsap ngali Moroaa naba asen xan tinaxaa lalon xan tino.4Sin abala ta leng tsaa gita na xosaraa xan no tinaxaa aia xa ta tulen iaa. Bing naba xaalame biaa naba xap xa na pupua ngali taxaa.5Biaa iaa ta manman lalon xolkolmoxo ina inaman, iaa tsaa abia laleng ina xolkolmoxo.â6Mil sin ta paare, Iesu a xamutsa papan pula, o ga xosaraa pixaa taman xan xamutsa ma ga patsaa papan no matan aia taamat.7A paare sin, â Laa guraii no mataam lalon pu daan ulis, Silomâ (muina abala totore Silom tulen). Biaabi iwaa taamat ga laa guraii no matan, o ga mula ta se nanen.8No inaman di ta man atataaen ma biaa di ta lasi ta xaa ningning di atsura, â Ilawaa uk taamat amuila, ta xaa xale ningning was?â9Biexaal di we, â Ia mu.â Biexaal di paare, â A xap, a mat malen ia.â Oro ga asaait leng taman ia tsaa, weaatala, â Iaa mu.â10Di tiiriki, â Asen we, o no mataam ga tsalel?â11A xisi ga we, â Iwaa taamat di putsangi Iesu a xosaraa pixaa ga patsaa papan no mataaga, o ga asaaiti iaa ngali laa guraii no mataaga lalon daan Silom. Biaabi iaa ga laa guraii no mataaga, o iaa ga se nanen.â12Di atsuraa ia, â Inaai se aia taamat?â A xisi, â Iaa xap atii.âNo Paarasi di tirei amusili abia atotoaa
13Di gii laangen aia taamat matababa laa sangan no Paarasi.14Biaa leng Iesu ta xosaraa pixaa ma ga tsalali no matan aia taamat, tii Saabat.15Biaabi no Paarasi di ga atsuraa bula, asen parawe, o iu ga nanen. Iwaa taamat a xisi, â A patsaa pixaa papan no mataaga. O iaa ga laa guraii no mataaga ma talaawaa iaa ga se nanen.â16Biexaal ina no Paarasi di we, â Ilawaa taamat a xap xaal sangan Moroaa sin sa, a xap amusili Saabat.â Oro biexaal di atsura, â Asen parawe, o xa untsaxa, naba pupua ngali xosaraa no axixila xoror?â Biaabi di ga exatsep sin no xolot ta lua.17Mil di sebula putsi laa sangan aia taamat tii matababa, â Amuina tii tsalali no mataam, u ba paare wesa ngali ia?â Iwaa taamat a xisi, â Ia propet.â18No Jiu di xap mager taltaalnge we, ia tii matababa, o ga se nanen, pupua sin di ta tutule ngali xan mom ma nagaa aia taamat.19Di atsura, â Nugulu tsi aila? Ilawaa mu aila u ta we iu tii taxaana ta matababa? Asen parawe ga se nanen?â20Delu xisi, â Gelu atii ia nagelulu tsi, o gelu atii ta matababa sin nagaa tii taxaana.21Oro malen a se nanen, o saa ia ta tsalali no matan, gelu xap atii. Atsuraa ia, a se lot, a pupua ngali asaaiti gim.â22Delu asaait taman abala, amuina delu mataatinai no Jiu sinsa, di tii se xubatsi we, saa ia ta paare leng taman Iesu ia Karisito, di ba saali atsuulngi ia lalon anua sausawit.23Biaabi xan mom ma nagaa, delu ga paare, â A se lot pupua, gim atsuraa ia.â24Ma di sebula ilei ngali aia taamat ta matababa ma di ga paare sin, â U na aminaalami Moroaa! Giem atii aia taamat ta atoaa iu, ia untsaxa.â25A xisi, â Iaa xap atii, nawe ia untsaxa o a xap, was mu iaa ta atii; iaa tii matababa o talaawaa iaa se nanen.â26Di ga atsuraa ia, â Tii xosaraa sa sin iu? Asen tsalali wenangenai no mataam?â27A xisi, â Iaa se asaaiti gim tsaa, o gim ga xap lolong. Ngalisa so gim ta wena sebula alongmen? Gim wena tsap xan no tsi asasing, bula?â28Di ga tubusen weaatalaa, â Iu xan tsi asasing, oro giem xan no tsi asasing Moses.29Giem atii we Moroaa tii papaare sin Moses. Oro ngali aia taamat giem xap atii itaa axaal.â30Iwaa taamat a xisi, â Balawaa maarang asuk alolaa iaa buxa! Gim xap atii itaa axaal, oro atsalali no mataaga.31Gita atii Moroaa a xap xaa alongmen xadi no sausawit no untsaxa, a xap, a xaa alongmen xadi sausawit no untutiik, di ta amusili xan sirsiir.32Sin atiltsoli, a xap xa na alongmen xa taamat ta tsalali no matan xa di ta taxaana ta matababa.33Nawe ilawaa taamat a xap xan Moroaa naba xap pupua ngali xosaraa xawas.â34Sin abala di xisi, â Iu tii tsap lalon namaang tsaxa sin leng di tii taxaana iu, u xap pupua ngali asingan giem,â ma di ga tulen atsuulngi.Tanua baba
35Biaa Iesu ta alongmen we di se tulen atsuulngi lokobel, a tatanginai ia, ga paare, â U taltaalnge sin xan Tsi Taamat?â36Iwaa taamat atsura, â Orong, saa taamat aia? Asaaiti iaa ngalibi iaa ba taltaalnge sin ia.â37Iesu a paare, â Iu se lasi ia, aso, ia mu iwaa xaa iu ta papaare mii talaawaa.â38Mil iwaa taamat ga paare, â Orong, iaa taltaalnge,â ma ga langaari laa sin ia.39Iesu ga paare, â Iaa xaalame lalon xolkolmoxo ina inaman ngali ininte sin di, ngalibi no matababa di ba nanen, o biaa di, di ta nanen di ba tsap baba.â40Biexaa Paarasi atataaen ia di alongen abala o di ga paare, â Sawe? O giem xap matababa.â41Iesu ga paare, â Nawe gim nii matababa gim nii xap ie namaang tsaxa. Oro biaa gim ta we â giem nanenâ nagim namaang tsaxa a manman tsaa.âNo translations available.