1Gubuꞌ miamun Suntaꞌ maratait nam rungꞌ mimindan da Maria sagat Magadala ifa tauf bampun da itsangan ibi manga rimpingꞌ i tauf tsiraꞌ igi sinungꞌ tauf bampun nifun igi sib.2Ibinigi da arangan itip irunt iba da Saimon Petrus da garam atsungꞌa i Yisu aru Arangan maran arida gin da ini binaꞌ, “Rib fain iyu Nifutsarif riniuriatsan iwaꞌ sib sinungꞌ tauf bampun aga, da aga wasruꞌ i gan rima Arangan gin u!”3Ibinigi da Petrus irut garam atsungꞌa i Yisu mangan igi itangin gamp rai da ifa tauf bampun.4Rib iruꞌ igi impruꞌ ruan runta fadan, da bitsintaꞌ garam atsungꞌa gin mangan igi irunt iyus Petrus da iwaꞌ tauf bampun mungꞌ.5Da idzuangꞌ iruꞌ da yarangꞌ yatangꞌ da itsanga bruꞌ tuas aru patiꞌa Yisu gin ugu rumingꞌan, da anungꞌ yatangꞌ u.6Da Saimon Petrus irunt yatsungꞌ arangan ibawaꞌ da yatangꞌ inting tauf bampun. Da itsanga bruꞌ patiꞌa Yisu gin ugu rumingꞌan7da bruꞌ patiꞌa Aranga gudzunggan gin rumingꞌan nigi rugan i bruꞌ fain igi, ibi manga ipingꞌan.8Ida garam atsungꞌa gin mangan suda miamun i ruan ugu imus atangꞌa bampan. Arangan itsangan da imuaruts.9Gubuꞌ arigi da ribarangan anungꞌ idzidziwan i nan akaran nida bida Yisu tipa muntida marataꞌ.10Ibinigi da rib atsungꞌa gin iruꞌ igi itip ifa ungaran mpada gin.
Yisu Iwaꞌ da Maria Sagat Magadala
11Maria sagat Magadala imunti irang tauf bampun manaꞌ. Da gubuꞌ arangan rungꞌ rangan da idzuangꞌ iruꞌ i raraba atangꞌa ntsuf igi,12da itsanga angira iruꞌ mpada wasaꞌ igi. Angira iruꞌ igi yatsuf ngarukui maragamp da impa Yisu gan gingꞌa gin ugu. Mangan impa gudzun da mangan impa fagan.13Angira igi gut i Maria ibiani, “Sagat, u rang iyaꞌ?” Da arangan ini binaꞌ, “Rib iyu dzi Nifutsarifangꞌ ifan da dzi wasruꞌ i gan rima Arangan gin u.”14Gubuꞌ Maria nida nan sib, da iparim i ruan da itsanga Yisu muntidan nigi, da bitsintaꞌ wafaringꞌ Arangan u.15Yisu igut i arangan, “Sagat, u rang iyaꞌ? Da u sau mangan igi?” Maria ibuni Arangan garam mpada tayangꞌ gum igi da ini rutin, “Garam tsiraꞌ, bida agu uda Arangan fadan, da wani da dzi i u gam rima Arangan gin da dzi nafayu Arangan.”16Yisu ini da arangan, “Maria.” Da Maria iparim i maran rutin da ini i nifun nan Hibru ibiani, “Rabonai!” (wainggan ibi ‘Kidungwaga’).17Da Yisu ini, “Anungꞌ waripa ngifa dzi, i dzi anungꞌ iwarip iyab ifa da Ramangꞌ u. Wafan da wani da dzi raingꞌ rusangꞌ ugu nabiani, ‘Dzi nang i yaba fadan da Ramanggangꞌ da agam Ramanggam impruꞌ, da Anutu gangꞌ da agam Anutu gam impruꞌ.’”18Ibinigi da Maria sagat Magadala itip ifan da ini da rib atsungꞌa Yisu ibiani, “Dzi tsanga Nifutsarif sib!” Da arangan ini da ribarangan i nan santan Yisu nida rutin.
Yisu Iwaꞌ da Riban Atsungꞌa Gin
19Gubuꞌ miamun Suntaꞌ arigi idziang gan da rib atsungꞌa Yisu impruꞌ ruan impa ungar wasaꞌ da itsungin muantsi sib i ruan, i ribarangan irat i garam Yuda gudzun rusan. Da Yisu iwaꞌ imunti wasaꞌ i ribarangan da ini ibiani, “Nan nufan narut agam!”20Ini nan igi sib da isantingꞌ banginggan da saran da ribarangan. Gubuꞌ riban atsungꞌa gin tsanganda Nifutsarifan da nugun itsiaꞌ.21Da Yisu itip ini, “Nan nufan narut agam! Ramangꞌ itangin dzi iba, i sanab bida nigi da dzi tangin agam ifan.”22Ini ibinigi sib da igufi nifu pau ifan da riban atsungꞌa gin da ini, “Agam wau Marapayam Mararam.23Bida agam siata garam mangan nanggan maisan rai, da Anutu isiat rai sib. Da bida agam mamida i siata i gan nanggan maisan rai, da gan nanggan maisan rumingꞌ.”
Yisu Isantingꞌ Runggan da Tomas
24Gubuꞌ Yisu waꞌan da riban atsungꞌa gin, da riban 12 igi mangan binganggan Tomas (nida Didimas in) anungꞌ impa wasaꞌ impruꞌ u.25Ibinigi da riban atsungꞌa gin fain ini da arangan ibiani, “Aga tsanga Nifutsarif sib!” Da bitsintaꞌ Tomas ini da ribarangan ibiani, “Bida dzi mamida i tsanganda pirim nifun i Arangan bangin da mamida i tsuringꞌa bangi tsitsin atangꞌa gin da mamida i rima bangingꞌ i saran, da dzi wasangꞌ i muarutsan u.”26Suntaꞌ manga fada sib da Arangan riban atsungꞌa gin itip impruꞌ ruan impai ungar mpada gin ugu, da gubuꞌ arigi da Tomas impa wasaꞌ impruꞌ. Da itsungin muantsi sib i ruan ntuaꞌ. Da Yisu iwaꞌ imunti wasaꞌ i ribarangan da ini, “Nan nufan narut agam!”27Da ini da Tomas, “Waba tsuringꞌ bangi tsitsinggam natangꞌ dzi banginggangꞌ da watsangan. Warim banginggam ba dzi sarangꞌ. U wangum anungꞌ suda iruꞌrun u; wamuaruts angu.”28Da Tomas ini binaꞌ, “O, dzi Nifutsarifangꞌ da Anutu gangꞌ!”29Da Yisu ini da arangan, “U rarab dzi sib da u muaruts, a? Rib mamida i tsanganda dzi da bitsintaꞌ muarutsan nugun natsiaꞌ.”
Papiar Kakaran Ani Wainggan
30Yisu inang nam maran mangan ampi bingan imingꞌ riban atsungꞌa gin maranggan, da dzi anungꞌ ikakar santan iruꞌ papiar ani u.31Da bitsintaꞌ dzi kakar nan ani i agam muarutsa Yisu igi Kristus, Garam Anutu Ragadan, da Anutu Narunggan. Da bida agam muarutsan da agam bungꞌ ayu nam mpada maran taꞌan i Arangan binganggan.