1Mwerin Jesus Ah wia kapkap oauwe, Ih pwilihki Nah sohnpadahkkok ken inla jang wijahu, irai kosehla pilsik in Kidron. Mwoaswel oau mine wijahu. Ih apel Nah sohnpadahkkok inla loaloa.2Judas, ma pirin pangla Jesus, kidal doahroar wijahu, pwa pak dir Jesus apel Nah sohnpadahkkok kin suhpene o.3Judas ken inla nehn mwoaswello, uk jounpei in Rome pwi apel jilepen Umw Joarwiho pwi ma koadoaddoardo jang ipen jamwrou laplappok apel Pharisee‑ok. Irai ohroj wijik mihn pei, lahm apel dil.4Jesus kidal meohroj ma pirin wiawihoang Ih; Ih ken uhda mwohrai pwahla, “Inje ma kamwai raprapahki?”5Irai japoang, “Jesus, mihn Nazareth.” Jesus pwehng irai, “Ngoahi Ioar Ih.”Judas, ma pangla Jesus, pwili irai uhda wijahu.6Nehn Jesus Ah pwehnglahng irai, “Ngoahi Ioar Ih,”irai ken pehkla kipdihoang pohn pwirej.7Jesus pel pwuroahng idoak iparai, “Inje ma kamwai raprapahki?”Irai pwa, “Jesus, mihn Nazareth.”8Jesus pel pwa, “Ngoahi ne pwehng kamwai pwa Ngoahi ioar Ih. A doari ma kamwai raprapahki Ngoahi, kamwai mweidoahng irai pwiai en inla.”9(Ih pwahla mehpwiai pwa mehk ma Ih ne pwahla en pwoaida: “Joamoai, joh emen iraihok ma koawoa kihdoahng Ngoahi ne joaloangla.”)10Simon Peter, ma wahwahwa kodlaij pas, wijda poaloahjang loap moaun in sien nihn Jamwrou Laplap lidu. Oadoan lidu mene, Malchus.11Jesus pwehnglahng Peter, “Kajpahlihoang nihmw kodlaijjen nehn dohiahn! Koawoa lemleme pwa Ngoahi jehpirin nim mwoakin loklokko ma Joamoaiho kihdoahng Ngoahi?”
Jesus Mwohn Annas
12Jounpei in Rome‑ok pwilihki arai koaunno, apel mihn Jew ma kin wia doadoahkin jilajil, irai sipisdi apel joalihdi Jesus.13Keiou, irai ukla Jesus ipen Annas, pwa ih ma jemen pahien Caiaphas‑o. Caiaphas ioar ih ma Jamwrou Laplap nehn pahrro.14Caiaphas ioar ma pwehng mihn Jew‑ok pwa mwehu ma armaj men en mehkihdi armaj ohroj.
Peter Kahmahmkihla Jesus
15Simon Peter apel emen sohnpadahk, ira pwilihla Jesus. Jamwrou Laplappo kidal sohnpadahk meno, doar ih ken pwili Jesus inla nehn kelin umwen Jamwrou Laplappo.16A Peter mine likin kello, ipen wanihmmwo. Sohnpadahk meno, dilla siksikesikkoang lidu ma jiljiloa wanihmmwo, ken ukdo Peter nehn kello.17Lidu jerpein ma jiljiloa wanihmmwo pwehng Peter, “Jaudi koawoa emen nihn Woallo sohnpadahkkok?” Peter japoang, “Joah. Jaudi.”18Doari, liduhwok apel jounjilajillok jaunda oai siksik kij, pwa anjoaun kopou. Irai ken pidekihpene koarkoaroangroang; a Peter pel pwili irai koaroangroang.
Jamwrou Laplap Kapeideki Jesus
19Jamwrou Laplappo ken idoak ipen Jesus doahroar Nah sohnpadahkkok apel doahroar Ah padahk.20Jesus japoang, “Ngoahi kin kalap sikesik janjal oang armaj ohroj. Oai padahk ohroj ne wiawihla nehn jinakoke kan apel nehn Umw Joarwiho, wija ma mihn Jew kan ohroj kin pokonpene. Ngoahi johkin pwa mehkij in wija rir.21Dahkij kahrehda koawoa kapeideki Ngoahi? Koawoa idoak iparai ma rongjang Ngoahi doahroar mehkan ma Ngoahi padahkihoang irai; irai ma kidal dahkij Ngoahi ne pwahla.”22Nehn Jesus Ah pwahla mehpwiai, emen jounjilajillok, ma uhda ipoa, ken poki Jesus pwahla, “Ioar doahroar Oamw pajpoang oang Jamwrou Laplap men?”23Jesus japoang woallo, “Ma Oai sikesik kin japwung, a kadehdehda doahroar Oai japwung; a ma Oai sikesik kin pwung, a mihnda koawoa poki Ngoahi?”24Doari, Annas ken kadarla Jesus ipen Jamwrou Laplap Caiaphas, Ih pirapirdihoar.
Peter Pwuroahng Kahmahmkihla Jesus
25Simon Peter uhdahr wijahu koarkoaroangroang. Irai ken pwehnglahng ih, “Jaudi koawoa emen Nah sohnpadahkkok?” Peter japoang, “Joah, jaudi ngoahi.”26Lidu in Jamwrou Laplappo men, kijehn woallo ma Peter poaloahjang sioa, idoak, “Jaudi koawoa ma ngoahi kapang pwili Woallo nehn mwoaswello?”27Peter pel pwuroahng kahmahmkihla; a nehn anjoauwohr jummwa men ken joangla.
Jesus Mwohn Pilate
28Oh inminjoang irai ukjang Jesus nehn umwen Caiaphas‑o uklahng nehn umwen koapinahu. A irai joah dilloang nehn umwen koapinahu, pwa irai doar jaminla, pwa irai en kak kang kamdipw in Passover.29Pilate ken dilla likin iparai idoak, “Dahkij kamwai kadpoahki Woal mene?”30Irai pwehnglahng ih, “Kamai johpwa pirin ukdo Woal mene ipoamw ma Ih johpwa wiahda mehkij nauna.”31Pilate ken pwehnglahng irai, “Pein kamwai oaloa Woal mene kadeikda Ih in doahroar amwai kojonned.” Mihn Jew‑ok pwehnglahng ih, “Kamai johpwa mweimweioang en kojukdi armaj.”32(Me en wiawi pwa en pwoaida mehkan ma Jesus pwahkihla doahroar Ah pirin mehdi.)33Pilate pwurlahng nehn ummwo, pangin Jesus, peidek Ipoa, “Koawoa ioar ma nahmwarkihn mihn Jew kan?”34Jesus japoang, “Peidek oauwe pein oamw, ke epwi armaj ma pwehng koawoa doahroar Ngoahi?”35Pilate japoang Ih, “Da, ngoahi mihn Jew men? Sohn Oamw wei apel jamwrou laplap kan, ioar irai ma wahdo Koawoa ipoai. Dahkij Koawoa wiahda?”36Jesus japoang, “Oai wei jaudi kijehn jampah oauwe. A ma Oai wei kijehn jampah oauwe, Oai papah kan pirin peiki ngoahi, pwa joh emen en pangla Ngoahi ipen mihn Jew kan. Pwen joah! Oai wei jaudi kijehn jampah oauwe!”37Pilate pel pwehng Ih, “Doahr da, nahmwarki men Koawoa?” Jesus japoang, “Koawoa ma pwahla pwa Ngoahi nahmwarki men. A ioar, kahrpoa oauwoar ma Ngoahi noaisikdi apel indoahng jampah, pwa Ngoahi en kadehdehda doahroar me mehlello. Armaj ohroj ma kijehn mehlello kin rong ngiloaihoa.”38Pilate pel idoak Ipoa, “A dahkij me mehlello?” Jesus ne Mweimweilahng en Kojkojdi (Matthew 27:15-31; Mark 15:6-20; Luke 23:13-25) Pilate pwuroahng pel dilla likin ipen mihn Jew‑ok, pwehnglahng irai, “Ngoahi johpwa kapangda kahrpoa oau pwa Ngoahi en koalkoahki Woal mene.39A mine siahk oau ipamwai, doahroar oai en kin lapwaddahng kamwai emen sohn kalpwuhj nehn anjoau in Passover. A imdoahr, kamwai joah nimen ngoahi en lapwaddahng kamwai nahmwarkihn mihn Jew kan?”40Irai ken rahrahuda, pwahpwahpwa, “Jaudi Woal menen, a Barabbas!” (Barabbas, ioar armaj nauna men.)